Ƀơi kual Tŏng Krah dêh čar – Dăp Kơdư, hơdôm ring bruă hnoh ia pơkĕ apui lơtrik prong glăk kơƀah ia, pơkĕ apui khŏng khŏt. Phun akha Sang bruă apui lơtrik kual Tŏng Krah dêh čar glăk pok pơhai lu jơlan pơhlôm apui yua, hrom hăng anun pơtă mơnuih ƀôn sang hơdư̆ ƀiă mă yua apui amăng hơdôm mông hmâo lu mơnuih yua. Phun akha Sang bruă apui lơtrik kual Tŏng Krah dêh čar čih djă pioh rơnoh lu hloh lĕ rơbêh kơ 3.500 MW amăng lơ 21/4, đĭ 10,2% bơhmu hăng thun 2022.

Pơkă lăng hlâo amăng hơdôm hrơi pơ-iă hang pơ̆ anăp, rơnoh yua lu hloh dô̆ đĭ lu dong. Lom anun, mrô apui lơptrik mơng hơdôm hnoh ia pơkĕ apui ƀơi kual Tŏng Krah - Dăp Kơdư hmâo năng ai ñu 38%. Tơdah tơlơi phang khôt ngă kơtang ƀơi lu anih thơ tơlơi pơkĕ hyu apui lơtrik jai tơnap hloh. Ƀơi anăp tơlơi anai, Phun akha Sang bruă apui lơtrik kual Tŏng Krah dêh čar rơkâo hơdôm Sang bruă apui lơtrik tañ pơjing hăng pok pơhai jơlan gah pơhlôm pơkĕ hyu apui amăng bơyan phang; pơkă hrơi mông pơdjai apui lăp djơ̆, kơtưn mă yua hơdră phrâo pơkra apui kiăng plai ƀiă tơ̆i đưn pơkĕ hyu apui. Phun akha Sang bruă apui lơtrik kual Tŏng Krah dêh čar pơtă mơnuih ƀôn sang mă yua apui pơkrem, biă ñu amăng hơdôm mông hmâo lu mơnuih yua lom yang hrơi dŏng hăng mơmot./.