Mơ̆ng hlâo kơ hrơi ngă yang thun phrâo ƀong têt truh ră anai, amăng kual glai kyâo hơngô amuñ apui ƀong glai jing kual glai anăn mrô 263 gah să Phúc Thọ, tơring glông Lâm Hà, Lâm Đồng hơmâo na nao Khul ngă bruă pơgang glai klô Lâm Hà hăng hơdôm sang anŏ mơnuih ƀôn sang tŭ mă bruă pơgang glai klô hyu tir, sem lăng, pơpha mơnuih dŏ mă bruă re se kiăng tañ ƀuh laih anun pơgăn apui ƀong glai hmao kru. Tui hăng ơi Dương Thanh Quang, Khua grup mrô 5, gah Khul wai lăng glai pơgang plơi Lâm Hà, mơ̆ng akŏ bơyan phang mơtam, ƀing khua mua wai lăng kual glai mrô anai pơtum brơi tơhan mơnuih mă bruă hyu jah rơmet glông pơkă  guai, jơlan pơgăn apui rôk hyu laih anun pơdong rơnưh dŏ wai hŭi hơmâo apui ƀong glai.

“Ƀing adơi ayong gơmơi pơpha bruă mă pơblih nao rai hyu sem lăng ƀing tơhan jao wai lăng, kiăng pơkra hơdră dŏ wai pơgang hrơi hăng mlam. Laih dơ̆ng, kơtưn pơhrua nao mrô tơhan, mơnuih mă bruă djru ƀơi anih hŭi hơmâo apui ƀong glai, hyu tir hrom hăng ƀing adơi ayong tơhan pơgang glai rưng hrơi hăng mlăm”.

Lâm Hà, lĕ tơring glông hơmâo 34.000 ha, lu biă mă đơ đam lŏn glai kyâo hnong hnăi hăng pla pơhrua phrâo, jĕ giăm amăng anih ngă hmua mơ̆ng mơnuih ƀôn sang, anun hŭi biă mă hơmâo apui arăng čuh hmua pơđung hyu ngă ƀong glai prong. Ơi Hồ Nghĩa Nam, Kơ-iăng Khua Khul wai lăng glai pơgang plơi Lâm Hà brơi thâo, hrom hăng pơtrut bruă mă hyu tir, bruă dăp hơdră pok pơhai sa amăng plĕ lu hơdră pơhlôm pơgang apui ƀong glai dưi pơphun laih brơi djop sang bruă đing nao.

“Khul wai pơgang glai rưng hơmâo ming pơkra glăi rơnưh atông dŏ wai hŭi apui ƀong glai hăng blơi prăp hơdôm mơta gơnam mă bruă hơprah apui sit hơmâo tơlơi truh apui ƀong glai. Tơ tă anai, djop grup ngă bruă hlăk ngă giong djop mơta bruă či ngă, prăp lui gơnam yua mă bruă amăng thun 2023 ƀu brơi hơmâo apui ƀong glai ôh”.

Lâm Đồng lĕ tơring čar hơmâo lu lŏn glai kyâo hơngô hăng lu djuai phun kyâo luh hla amuñ apui ƀong, abih bang đơ đam truh 513.000 ha. Phrâo amăng akŏ bơyan phang đôč tơring čar anai hơmâo 3 wơ̆t laih apui ƀong glai. Yua kơ hmao ƀuh tañ anun nao hơprah thăm hĭ huăi răm ƀăm prong kyâo pơtâo glai klô. Tơ tă anai, ayuh hyiăng ƀơi Lâm Đồng pơđiă hang thu krô, amuñ biă hơmâo tơlơi truh apui ƀong glai. Jơnum min mơnuih ƀôn sang tơring čar Lâm Đồng hơmâo ngă hră pơtrun pơtrut djop anom bruă ping gah, gong gai kơnuk kơna anăm ngă amưng ôh, pơtum răng kơđiăng pok pơhai sa amăng plĕ ngă tui lu hơdră pioh pơhlôm, pơgang apui ƀong glai.