Mơng bruă pel ĕp, sem măng bruă klơi mă pơtâo bô-xit ƀơi tơring čar, Gơnong bruă hmua hăng pơđĭ kyar ƀon lan tơring čar Lâm Đồng pơsit hơmâo lu anih klơi dong amăng lŏn glai. Biă ñu, amăng mrô rơbêh 21.000 ha lŏn brơi hyu ĕp, klơi mă pơtâo bô-xit ƀơi tơring glông Bảo Lâm, Di Linh hăng plơi prong Bảo Lộc jing hơmâo rơbêh 4.900 ha đang glai pơkra gơnam hăng 11 ha đang glai pơgang pơhlôm tơlơi truh.

Mơng mrô jŭ yap lŏn glai brơi ƀuh, kual hơmâo brơi hyu mă pơtâo bôxit amra bơbeč djơ̆ 4.458 ha đang glai (amăng anun hơmâo 2.397 ha đang glai hơmâo mơng hơđăp). Laih dong, bơrơkua hrŏm hăng đơ đam lŏn 12 anom bơwih ƀong apah mă yua lŏn jăng jai, apah mă lŏn glai pioh ngă bruă tuh pơ plai. Yua hnun, Gơnong bruă hmua hăng pơđĭ kyar ƀon lan tơring čar Lâm Đồng kiăng Gơnong bruă tuh tia pơkra gơnam hăng hơdôm anom bruă bơdjơ̆ nao rơkâo đĭ Jơnum min mơnuih ƀon sang tơring čar Lâm Đồng sem lăng, pơplih hơdră klơi mă pơtâo bô-xit lăp djơ̆.