Tơ tă anai, tơring čar Lâm Đồng hlăk pơtrut bruă mă ngă tui lu jơlan hơdră pơsir hĭ anŏ gun. Quang Sáng pô čih tơlơi pơhing Gong phun jua pơhiăp Việt Nam dŏ ƀơi kual Dap Kơdư hơmâo tơlơi čih lăi nao tơlơi anun.

Truh ră anai, rơnoh prăk tuh pơ alin kơ bruă ba tuai hyu ngui lăng đang hmua ƀơi Lâm Đồng năng ai 377 klai, đơ đam rơbêh 300 ha. Amăng anun, hơmâo 212 ha lŏn hmua, 9 ha lŏn man pơdong, dŏ glăi đơ đam lŏn yua kơ bruă pơkŏn. Mah hnun, rơgao 2 thun Lâm Đồng ngă hră pơtrun mă bruă jăng jai tuh pơ alin hăng wai lăng bruă tuai hyu ngui lăng đang hmua dŏ lu tơlơi gun, aka ƀu găl ôh hơmâo tui phrâo.

Rơđah biă ñu, hrom hăng 33 boh anih tuai hyu ngui lăng đang hmua gưl tơring čar ngă hră brơi dưi mă bruă jăng jai hlâo kơ anun, hơdôm hơpluh anih tuai čuă ngui lăng đang hmua phrâo akŏ pơjing bưp hĭ tơlơi gun tơnap, sư̆ rơbư̆, aka ngă djơ̆ sa hnong amăng bruă pok pơhai. Boh nik ñu ngă pơgiong hơdôm hơdră ngă pơar rơkâo či mă bruă, pơhlôm djơ̆ tơhnal pơkă man pơdong, pơkă anih lŏn hmua dưi brơi man pơdong, rơnoh lŏn hmua dưi brơi pơdong, ngă bơbung sang amăng lŏn hmua, pơblih lŏn hmua jing lŏn pơdong sang amăng hmua.

Tơlơi anai yơh ngă anŏ gun prong hơdôm kơčăo bruă či ngă anih ba tuai hyu ngui amăng đan hmua aka pok pơhai tuh pơ alin, ƀudah tuh pơ alin aka djơ̆ lăp, aka ngă djop tơhnal pơkă tui anŏ kiăng mơ̆ng ƀing tuai hyu ngui čuă lăng.

Tui hăng yă Đoàn Ngọc Bích, Khua anom bruă kông ty sĭ mơdrô hăng tač rơngiao Tám Trình, tơring glông Lâm Hà, Lâm Đồng, rơngiao kơ tơlơi tơnap tap anai, tơlơi ngă hră tŭ yap brơi tuai dŏ glăi đih đŏm amăng sang, hơjai pơ hmua, anih hyu ngui lăng hmua kiăng khua mua tơring čar sem hăng pơsir brơi.

“Anih tuai hyu ngui mơ̆ng sang bruă lĕ pơdjơ̆ nao kơphê. Bruă phun či kiăng pioh kơ tuai hyu sem lăng čuă ngui lơ̆m pla kơphê truh kơ pĕ, kơ-uă kơphê, hna asar kơphê krô pơjing tơpung hiư̆m ñu. Khă tui anun, ăt gun mơ̆n hơdôm tơlơi pơdjơ̆ nao hră pơar hăng tơlơi phiăn pơkă. Laih dơ̆ng, tuai kiăng hyu lăng amăng hmua đang lĕ ƀu kơnong dŏ glăi, tuai dêh čar tač rơngiao lĕ kiăng rai pơ Việt Nam dŏ amăng plơi pla hơduah ĕp, tơña kiăng thâo. Anun yơh sa amăng hơdôm tơlơi tơña prong kơ bruă ba tuai hyu ngui lăng pưk hmua anai".

Lâm Đồng lĕ tơring čar blung a amăng dêh čar ta pok pơhai lông ngă tui hơdră ba tuai hyu ngui lăng hmua, hrom hăng bruă tuai čuă ngui ngă hmua mơtam. Ơi Phạm S, Kơ-iăng Khua jơnum min mơnuih ƀôn sang tơring čar Lâm Đồng lăi, ră anai hơdră ba tuai hyu ngui djơh hăng anai jing tơlơi gêh găl, anŏ kơtang pioh pơphun ngă tui tŭ yua mơ̆ng kông ngăn lŏn glai đang hmua pơjing rai gơnam sĭ mơdrô bơwih brơi kơ tuai rơnguai, pơsir bruă mă kơ mơnuih ƀôn sang, pơđĭ tui rơnoh prăk pơhrui glăi laih anun pôr pơthâo rup rap bruă mă kơ tơring čar mơ̆n.

Yua kơ anun, hrom hăng kiăng hơmâo jơlan hơdră hơduah ĕp lu hơdră pơsir tơlơi gun, ngă tơnap tap ră anai, Lâm Đồng ăt kiăng anăp nao kơ bruă čih pơkra tơlơi pơtrun rơđah rơđong, tong ten pioh pơtrut bruă tuai čuă ngui đang hmua pơđĭ kyar tui hăng tơlơi pơtrun mơ̆ng kơnuk kơna. Ơi Phạm S lăi:

“Pơ anăp anai, tơring čar hơmâo 33 bit anih ba tuai hyu ngui lăng hmua samơ̆ hnong tuh pơ alin, hơbô̆ bruă dŏ anet đôč hăng gơnam pơkra ming djơ̆ hrom soh. Thun blan pơ anăp, tơring čar pơsit đing nao hlâo, pơtrut pơsur lu hơbô̆ bruă đơ đam ngă hmua pơprong hloh, đơ đam hmua tuh pơ alin djop tơlơi pơkă man pơdong, gơnam pơkra ming pioh kơ tuai ĕp lăng huăi djơ̆ hrom, djă gru tơlơi pơčeh phrâo phara soh djơ̆ hăng anŏ kiăng amăng anom sĭ mơdrô, anŏ pơblih ayuh hyiăng.

Anih pơkŏn ƀu djop anŏ gêh găl dưi ngă, Lâm Đồng hơmâo anŏ gêh găl amra pơtrut pơsur pơjing rai gơnam sĭ mơdrô pioh kơ tuai rơnguai phara hơjăn hăng pơđĭ kyar hơđong kjăp kơñ pơgi”.

Rơnuč thun 2022 phrâo rơgao, Gơnong bruă gru grua boh thâo pơrơguăt drơi jăn hăng tuai čuă ngui tơring čar Lâm Đồng hơmâo pơphun jơnum pơtong lăng hăng rơkâo đĭ anăp pơđĭ kyar bruă mă ba tuai hyu ngui lăng đang hmua. Pơhiăp amăng mông jơnum, ơi Phạm S lăi lĕ, thun blan laih rơgao, tơring čar Lâm Đồng lĕ sa boh tơring čar ba akŏ hlâo amăng dêh čar pok pơhai bruă mă ba tuai hyu ngui lăng hmua đang, mơ̆ng anun hơmâo pôr pơthâo tơlơi pơhing hơdră ba tuai hyu ngui, lăi pơthâo lŏn mơnai glai klô ană mơnuih ƀơi Đà Lạt-Lâm Đồng, pơhưč lu tuai rơngiao, pơsir bruă mă laih anun hnong pơhrui glăi kơ mơnuih ƀôn sang ngă hmua sĭ mơdrô boh čroh.

Kơ-iăng khua jơnum min mơnuih ƀôn sang tơring čar Lâm Đồng ơi Phạm S jao gơnong bruă, anom bruă, tơring glông pơdjơ̆ hrom, jŭ yap glăi, ngă giong tơlơi gêh găl pioh rơkâo đĭ hăng pơsit glăi hơbô̆ bruă ba tuai hyu ngui ĕp lăng bruă đang hmua; pơtum glăi tơlơi rơkâo, pơgôp hiăp kiăng pơhrua dơ̆ng, ngă giong tơhnal pơkă, tơlơi pơtrun laih anun lăi pơthâo hăng jơnum min mơnuih ƀôn sang tơring čar sem glăi, pơhrua tui, čih ming pơkra brơi djơ̆ găl hăng bruă mă sit nik, kiăng pơtrut tơlơi gêh găl, anŏ kơtang, pơđĭ kyar bruă tuai čuă ngui ĕp lăng đang hmua tui hăng anăp pơkă laih.