Lơ 21/12, gah yŭ tơlơi git gai mơ̆ng ơi Vương Đình Huệ, Khua git gai pơ ala mơnuih ƀôn sang dêh čar, Jơnum min apăn bruă pơ ala mơnuih ƀôn sang dêh čar sem glăi bruă prăp lui hăng pơgôp hiăp kơ boh yôm phun, hơdră jơnum ječ ameč lok 2, khua mua pơ ala mơnuih ƀôn sang dêh čar tal 15. Tui hăng anun, him lăng, jơnum ječ ameč anai, ƀing pơ ala mơnuih ƀôn sang dêh čar či mă bruă amăng 4 hrơi, pok pơhai jơnum lơ 5/1/2023.

Ƀơi mông jơnum ječ ameč lok 2, boh yôm phun lĕ ƀing pơ ala pơgôp hiăp, pơsit Pơkă hnong abih bang dêh čar mơ̆ng thun 2021-2030, lăng nao pơ thun 2050; sem glăi pơsit hĭ Tơlơi phiăn pơkă lăng pơjrao duam ruă čih pơkra glăi hăng Pơƀut bruă mă, pơtong glăi ngă tui Hră pơtrun mrô 30 kơ jơnum lok sa, khua mua pơ ala tal 15; sem glăi, pơsit bruă pơtrut ngă tui dơ̆ng hơdôm jơlan hơdră pơdjơ̆ nao pơhlôm, pơgang klin Covid 19. Laih dơ̆ng, sem glăi, pơsit hơdôm tơlơi mă yua prăk kăk, rơnoh prăk mơ̆ng kơnuk kơna hăng bruă ruah khua mua.