Amăng blan kông ñơn 2024, tơring čar Gia Lai amra ngă jơlan hơdră “Bơni kơ mơnuih mă bruă” či pơpŭ bơni mơnuih mă bruă mut phung, mơnuih mă bruă gah rơngiao khul hơmâo lu tơlơi gum djru kơ anom bruă, anom bơwih ƀong. Laih dong, man pơdong 10 boh sang dŏ “Sang dŏ khăp pap mơ̆ng khul mut phung” brơi kơ ding kơna amăng khul, mơnuih mă bruă sang anŏ tơnap tap; nao čuă hăng ƀơk gơnam kơ ƀing kông ñơn bưp tơlơi truh lơ̆m glăk mă bruă, ƀing hơmâo tơlơi ruă pơjrao tơnap...Hrŏm hăng anun, hơdôm khul mơnuih mă bruă amra pơbưp, ră ruai hăng ƀing kông ñơn; pơphun ngă jơlan hơdră “Kjăp pran či mă bruă, pơkra gơnam” hăng lu bruă ngui ngor adoh suang, bơkjăp drơi jăn.
Kơ akŏ bruă rơđah rơđông mơ̆ng anom bruă, ơi Võ Công Hòa - Khua khul pơlir hơbit mơnuih mă bruă tơring glông Čư̆ Sê brơi thâo: Tơring glông pơphun ngă 2 keh prăk anun lĕ “Gum djru juh alun” hăng “Sang dŏ khăp pap mơ̆ng khul mut phung” djru ba mơnuih mă bruă amăng khul sang anŏ tơnap kiăng ƀing ñu hơđong pran jua laih anun lêng kơ hơmâo sa grup nao hrŏm hăng ƀing gơñu amăng tơlơi hơdip. Amăng blan 5 anai amra pơmut hrŏm lu jơlan hơdră bơkơtưn ngă bruă, kiăng hơmâo tơlơi gum pơgôp nao rai kơplah wah kông ñơn, mơnuih mă bruă.
Viết bình luận