Lơ 12/2, djop tơring glông, plơi prong amăng tơring čar Lâm Đồng pơphun lu bruă jơnum jao tơhan thun 2025, hăng rơbêh 1.200 čô tơdăm dra mut ngă tơhan, amăng anun giăm ha mơkrah lĕ mơnuih djuai ƀiă. Thun anai, Lâm Đồng hơmâo rơbêh 1.200 čô tơhan phrâo mut, amăng anun ha mơkrah lĕ mrô tơhan jing mơnuih djuai ƀiă, 50% amăng mrô anun ngă hră rơkâo mut tơhan. Amăng anun, lu tơhan hrăm giong gưl ƀrô, gưl prong truh 7,6%, hrăm giong anih 12 lĕ 36%, biă mă ñu hơmâo 23 čô tơhan phrâo mut jing mơnuih ping gah, amăng anun 11 čô mơnuih ping gah djuai ƀiă.

Tơhan phrâo mut anăn Lơmu Thani, mơnuih ping gah laih, 21 thun, djuai ania K’Ho, dŏ ƀơi plơi Dă Ngit 1, să Lat, tơring glông Lạc Dương hok mơak lăi, ñu pô hăng sang anŏ hok mơak biă mă lơ̆m ngă hră mut ngă tơhan,hơmâo tơlơi tŭ ư brơi mut ngă tơhan tal anai, kiăng pơyơr pran jua, man pơdong hăng pơgang lŏn ia.

Mah hrăm giong laih gưl prong, hơmâo bruă mă hơđong, samơ̆ lu hlăk ai ƀơi tơring čar Gia Lai ăt hor nao ngă tơhan mơn, tŏ tui gru grua mơ̆ng sang anŏ hăng pran jua gum djru kơ lŏn ia. hlâo kơ hrơi nao ngă tơhan, Lê Thị Hồng Ngọc dŏ ƀơi să Diên Phú, plơi prong Pleiku pơư pơ-ang pơđok prong hră rơkâo nao ngă tơhan kơ sang anŏ ñu gum hmư̆. Tui anun mơn, hlăk ai Lê Thanh Mai dŏ ƀơi phường Yên Thế, plơi prong Pleiku ăt hơdip amăng sang anŏ hơmâo mơnuih ngă tơhan mơn, mah hrăm giong anih gưl prong tơlơi hrăm ia jrao, samơ̆ tal anai ñu ăt čih hră rơkâo nao ngă tơhan mơn. biă ñu, amăng sang boh sang anŏ amĭ ama juăt ngă hmua đôč ƀơi să Ia Piar, tơring glông Phú Thiện, Gia Lai, tơdăm djuai ania Jarai Ksor Thanh, phrâo hrăm giong sang hră gưl prong tơlơi hrăm Luật - Sang hră gưl prong Huế, ăt hor nao ngă tơhan mơn amăng tal anai.