Mơng mơguah, lu mơnuih mơng 11 ƀut plơi pla amăng să giăm guai Ia Đal tum pơƀut ƀơi hơdôm anih pơphun jơlan hơdră “Bơyan bơnga pơđao pran jua ană plơi pla giăm guai”. Ƀơi anai neh met wa mut hrŏm amăng hơdôm bruă ngui ƀong tết, anun lĕ anung ƀañ tek, ngui glom boh, pơdui hrĕ, pơtŭn gai….Lu sang anŏ tơnap tap hơmâo ƀing apăn bruă, ling tơhan pơgang guai lăi pơthâo brơi “Anih pơdă gơnam 0 prăk” kiăng kơ ruah mă hơdôm blah ao hiam, mă braih, ia mơmuă, ia mơsin, ngok hra… Amai Lục Thị Đương, djuai ania Thái, dŏ amăng ƀut plơi 4 brơi thâo, 14 thun mơng plơi pla ƀơi Thanh Hóa nao pơ Kon Tum bơwih ƀong huă, rĭm truh bơyan tết ñu ăt mut hrŏm amăng hrơi mông mơ-ak čơkă thun phrâo hăng ƀuh rơđah prap khăp pap mơng ƀing apăn bruă, ling tơhan wai pơgang guai:

“Dưi mut hrŏm hrơi čơkă bơyan bơnga giăm guai kâo hok mơ-ak biă mă. Kâo ol kơdol biă mă yua hơmâo puih kơđông tơhan wai pơgang guai djru brơi mơnuih ƀôn sang, kar hăng ană tơčô ƀing gơmơi hơmâo puih kơđông tơhan čem rông ba dong”.

Bơ ayong Hà Văn Tình brơi thâo:

“Čơkă thun phrâo Ất Tỵ 2025 hơmâo tơhan wai pơgang guai tơring čar Kon Tum pơphun hrơi tuk ƀañ tek, neh met wa ƀơi kual giăm guai hur har pran jua biă mă. Hrơi ngui ania lĕ kiăng pơbưp nao rai. Anom bruă git gai tơhan wai pơgang guai tơring čar Kon Tum hơmâo jao lu anung gơnam yôm phăn brơi kơ neh met wa. Djop sang anŏ lêng kơ hur har mơ-ak soh”.

Tết tui phiăn juăt thun anai, să giăm guai Ia Đal, tơring glông Ia H’Drai hơmâo anom bruă git gai tơhan wai pơgang guai tơring čar Kon Tum ruah ngă anih pơphun gưl tơring čar Jơlan hơdră “Bơyan bơnga pơđao pran jua ană plơi pla giăm guai” pơlir hăng “Hrơi ngui tuk ƀan tek”. Amăng jơlan hơdră anai, ling tơhan hăng gong gai ƀon lan hơmâo jao 400 hla kơ, rơbêh 250 anung gơnam, 400 ƀañ tek, jao prăk djru hrăm hră brơi 9 čô čơđai amăng jơlan hơdră “Čung čơđai nao sang hră”, hơbô̆ bruă “Ană rông puih kơđông tơhan”; jao rơmô ania djru brơi 2 boh sang anŏ ƀun rin pơđĭ kyar bơwih ƀong huă…Abih tih nua gơnam rơbêh 350 klăk prăk. Thiếu tá Nguyễn Văn Đại, Khua puih kơđông tơhan pơgang guai Ia Đal brơi thâo, anai lĕ bruă hơdor tơngia mơng ƀing apăn bruă, ling tơhan hăng mơnuih ƀôn sang kual giăm guai lơm truh bơyan čơkă thun phrâo:

“Hluai tui jơlan hơdră anai amra pơtrut pran gum pơgôp jai kjăp phik kơplah wah ling tơhan hăng mơnuih ƀôn sang kual giăm guai. Hluai tui bruă anai ăt kiăng ƀing ta djă pioh gru grua hiam klă hăng pơphun bruă mă kiăng hrŏm hăng ling tơhan kual giăm guai wai pơgang kjăp guai lŏn ia ta”.

Ngă tui jơlan gah “Anăm brơi hlơi ôh dŏ glăi gah tlôn”, pơhlôm brơi djop sang anŏ, abih bang mơnuih kual giăm guai lêng kơ dưi čơkă thun phrâo mơ-ak mơ-ai, tŏ tui dong mơng lơ 19 truh lơ 25/1, tơhan wai pơgang guai tơring čar Kon Tum pơphun ha amăng plĕ jơlan hơdră “Bơyan bơnga pơđao pran jua ană plơi pla giăm guai” hăng “hrơi ngui tuk ƀañ tek” ƀơi 12 să giăm guai hăng dêh čar Lao, Kur. Hơmâo thâo, abih tih gơnam ƀơk hăng bruă bơwih brơi tết tui phiăn juăt Ất Tỵ 2025 brơi mơnuih ƀôn sang 13 boh să ƀơi tơring čar Kon Tum lĕ rơbêh 1 klai prăk./.