Jơlan hơdră yua kơ Ƀirô git gai Ling tơhan pơgang guai dêh čar tơring čar Kon Tum gum hrŏm hăng gong gai hrŏm hăng hơdôm khul grŭp ƀơi anai pơphun, hmâo ba Tết tañ truh hăng mơnuih ƀôn sang pơ̆ guai dêh čar. Mơ̆ng mơguah, lu mơnuih ƀôn sang mơ̆ng 11 bôh plơi mơ̆ng să guai dêh čar Ia Đal tum pơƀut ƀơi anih pơphun jơlan hơdră. Ƀơi anai neh wa gum hrŏm lu bruă mă mơ-ak Tết, kah hăng pơplông anung ƀañ čưng mơtah, pơplông glom tong long, dui hrĕ, tŭn gai...

Hơdôm bôh sang anô̆ tơnap tap dưi hmâo mơnuih apăn bruă tơhan, ling tơhan pơgang guai dêh čar lăi pơthâo kơ "Gơnam 0 prăk" pioh ruah mă sum ao phrâo, čơkă mă braih, ia rơmă, ia măm, ƀô̆t ngok. Ƀơi Jơlan hơdră, khul ling tơhan pơgang guai dêh čar hăng gong gai ƀơi anai hmâo ƀơk laih 400 khăn gru lŏn ia, rơbêh kơ 250 anung gơnam, 400 grô̆p ƀan čưng, ƀơk prăk djru hrăm hră kơ 9 čô čơđai sang hră gah Jơlan hơdră “Čung tơkai adơi nao sang hră” hơdră “Ană rông puih kơđông pơgang guai dêh čar"; ƀơk rơmô rông djru 2 bôh sang anô̆ ƀun rin pơđĭ kyar bơwih ƀong huă... Abih bang nua ñu rơbêh kơ 350 klăk prăk./.