Lơ 21/2, ƀơi ƀôn prong Hồ Chí Minh pơphun mông pơbưp khua mua pơprong Ding jum kơđi čar Ping gah Cộng sản Việt Nam hăng Khul apăn bruă Ping gah mơnuih ƀôn sang Kur (CPP) yua Khua git gai Ping gah Cộng sản Việt Nam ơi Tô Lâm hăng Khua CPP, Khua git gai pơ ala mơnuih ƀôn gơnong glông Kur ơi Hun Sen git gai hrŏm. Anai lĕ mông pơbưp yôm phăn kiăng kơtưn ƀiă dong tơlơi rô nao rai ha guai hiam klă, giang mah gru grua, ngă hrŏm djop mơta, hơđong kjăp sui thun kơplah wah dua Ping gah, dua kơnuk kơna hăng mơnuih ƀôn sang Việt Nam-Kur amăng rơnuk phrâo. Amăng mông bưp, Khua git gai Ping gah dêh čar ơi Tô Lâm hăng Khua CPP ơi Hun Sen lăi pơthâo nao rai bruă ƀơi rĭm Ping gah, rĭm bơnah dêh čar; pơlăi nao rai bruă amăng rŏng lŏn tơnah, amăng kual hăng sa, dua boh tơhnal dua bơnah đing nao; lăng glăi boh than ngă hrŏm kơplah wah dua bơnah amăng hrơi blan rơgao hăng tŭ ư hơdôm jơlan gah ngă hrŏm pơ anăp anai.

Dua čô khua tŭ ư tŏ tui ngă tŭ yua hơdôm tơlơi pơkôl khua mua kơplah wah dua Ping gah, dua kơnuk kơna, kơtưn ngă hrŏm amăng bruă wai pơgang rơnuk rơnua, hơđong, pơtrut ngă hrŏm bơwih ƀong huă, sĭ mơdrô, gru grua, pơtô pơjuăt, tuai čuă ngui djơ̆ hăng tơlơi dưi, tơlơi gal mơng rĭm boh dêh čar hăng tơlơi rô nao rai kơplah wah dua Ping gah, dua kơnuk kơna, laih dong kơtưn ngă hrŏm tŭ yua, sit nik kơplah wah hơdôm anom bruă mơng Ping gah, Khua pơ ala mơnuih ƀôn sang dêh čar, djop Ding jum, gơnong bruă mơng Kơnuk kơna, jơnum min djop djuai ania mơnuih mơnam, djop khul grup mơnuih ƀôn sang hăng djop ƀon lan mơng dua bơnah, ngă kơđŏm glăi kơtang tơlơi rô nao rai dua boh dêh čar amăng rơwang pơđĭ kyar phrâo, djru ba glăi tơlơi dưi sit nik kơ mơnuih ƀôn sang dua bơnah.

Amăng mông bưp, Khua dêh čar ơi Phạm Minh Chính hăng Khua dêh čar ơi Hun Manet tŭ ư sa, dua boh tơhnal yôm phun kiăng tañ pok pơhai pơ anăp, sit biă ñu lĕ pok pơhai hơdôm tơlơi pơčeh kơ bruă tô nao rai bơwih ƀong huă Việt Nam-Kur kah hăng tơlơi bơwih ƀong huă Việt Nam, Kur hăng Lao.