Amăng hơdôm hrơi rơgao, khua mua tơring čar Lâm Đồng hơmâo nao čuă, pơpŭ bơni hrơi Noel ƀơi djop sang ơi adai, sang jơnum čih pioh hăng lăng yôm hơdôm tơlơi pơgôp pran jua mơ̆ng ƀing khua pô pơtô tơlơi đăo, ƀing djru đăo hăng abih bang mơnuih ƀôn sang đăo ơi adai hơmâo gum hrom pơtrut  tơlơi pơđĭ kyar bơwih ƀong huă mơnuih mơnam, pơtrut ngă hmua pla pơjing, rŭ glăi tơlơi bơwih ƀong huă.

Plơi R’Čai 3, să Phú Hội, tơring glông Đức Trọng, tơring čar Lâm Đồng hơmâo 305 boh bơbung sang, 5 djuai ania adơi ayong dŏ hrom, anun lĕ Yuan, K’Ho, Khmer, Tày, Nùng, amăng anun djuai ania K’Ho lu hloh. Amăng să hơmâo 4 tơlơi đăo: Phrâo hiam, ta juăt lăi Tin lành, đăo phơt yơng, đăo Cao Đài hăng Khôp.

Mơnuih ƀôn sang djop djuai ania amăng plơi gir run biă mă, gum pơgôp nao rai djru ba amăng tơlơi hơdip mơda. Tơdơi kơ  tal klin Covid 19 plai ƀiă laih, mơnuih ƀôn sang djop djuai ania, djop tơlơi đăo pơ anai, hur har pok pơhai bruă mă, ngă hmua pla pơjing, akŏ pơdong plơi pla kiăng pơđĭ kyar hloh. Thun 2022, hnong pơhrui glăi pơkă dưm dưm rĭm čô mơnuih sa thun hơmâo 58 klăk prăk. Abih bang amăng plơi dŏ 2 boh sang anŏ đôč ƀun rin. Ơi Ka Să Ha Nhiếu, ding kơna khul wai lăng djop djuai ania mơnuih mơnam Việt Nam tơring čar Lâm Đồng, jing mơnuih arăng đăo kơnang plơi R’Čai 3, să Phú Hội, tơring glông Đức Trọng lăi:

“Kâo mơak biă mă yua ră anai, mơnuih ƀôn sang amăng plơi thâo hrăm tui adơi ayong Yuan, thâo pơblih tơlơi pơmin ngă hmua, pla pơjing, pơblih hơdră ngă hmua pơdai. Mơnuih ƀôn sang pơ anai thâo pla lu pơjeh phun pla hơmâo nua yôm, kah hăng pla Pơhăng, laghim, tơrong mơsăm, añăm rơ̆k, susu, kơphê….Amăng plơi ră anai hơmâo mơ̆ng năng ai mơ̆ng 30-40% boh sang anŏ pla laghim, kâo ƀuh tơlơi pơblih rơđah mơtam yơh amăng bruă mă ngă hmua”.

Dă Sar lĕ să kual ataih tơring glông Lạc Dương, tơring čar Lâm Đồng-jing sa amăng hơdôm kual mơnuih djuai ƀiă dŏ, ngă djơ̆ tơhnal pơkă plơi pla phrâo tañ biă mă. Abih amăng să hơmâo 7.832 boh sang anŏ, hăng 31 rơbâo 200 čô mơnuih; amăng anun yua kơ tañ pơblih bruă pla kơphê, hơdôm đang phun tha laih, pơblih pla phun kơbuă rông hlăt suai mrai hăng pla añăm pơtam rơ̆k tơ̆k, boh čroh, hơbơi pơtơi, mơnuih ƀôn sang hơmâo pơhrui glăi lu hloh. Ơi Čil Ha Ôn, djuai ania K'Ho plơi mrô 3, să Dă Sar, tơring glông Lạc Dương, tơring čar Lâm Đồng brơi thâo:

Lu mơnuih ƀôn sang pơ anai đăo phrâo hiam ta juăt lăi Tin Lành, dưi hơmâo gong gai kơnuk kơna ngă gêh găl brơi man pơdong 2 boh sang jơnum kơkuh pơpŭ prong biă mă. Yua tơlơi bơwih ƀong huă pơđĭ kyar, mơnuih ƀôn sang djuai ƀiă đăo phrâo hiam pơ anai hơmâo tơlơi mơak pơphun tơlơi ngui ngor mơak, jơnum Noel trơi pơđao hloh.

“Thun anai, kâo bơni kơ gong gai kơnuk kơna hơmâo đing nao kơ bruă pơgăn klin Covid 19 amăng hơdôm blan hăng anai laih, yua kơ anun yơh Noel anai ƀudah mông jơngum lu mơnuih pơdŏ rơkơi bơnai lêng kơ pơphun mơak mơai soh. Kiăng kơ Noel mơak lu hloh hăng trơi pơđao, gơmơi jak iâu khul grup atông čing nao ngui hrom hmư̆ atông čing ring hơgor”.

Yă Liêng Jrang K’Sáu, Khua Khul mơnuih ƀôn sang ngă hmua să Dă Sar, tơring glông Lạc Dương brơi thâo : Lơ̆m ngă tui bruă man pơdong plơi pla phrâo, hrom hăng tơlơi gơgrong ba mơ̆ng djop khul grup mơnuih mơnam mut phung, ƀing khua pô pơtô djop tơlơi đăo amăng tơring glông hơmâo jak iâu pơtô lăi mơnuih ƀôn sang đăo hur har ngă hrom. Lu sang anŏ djru hrom pơyơr lŏn sang, đang hmua pioh pok pơkra jơlan nao rai, djru hrơi bruă. Yua kơ anun, plơi pla pơblih lu biă mă.

Yă Liêng Jrang K’Sáu –Khua khul mơnuih ngă hmua să Dă Sar lăi: abih bang mơnuih ƀôn sang đăo pơ anai ƀu kơnong ngă djơ̆ tơlơi pơtrun mơ̆ng ping gah, tơlơi phiăn kơnuk kơna đôč ôh dŏ ngă tui tơlơi hơdip mơda mơak klă, tơpă hiam tui hăng tơlơi pơtô hrom “Hơdip hiam, đăo tong ten”.

“Ƀing khua pô pơtô đăo, ƀing gơñu yơh pô ba jơlan hlâo, pơdah rơđah tơlơi bơngač amăng bruă ngă tui djơ̆ tơlơi pơtrun mơ̆ng Ping gah, tơlơi phiăn kơnuk kơna, hur har ngă hrom hơdôm tơlơi jak iâu, nao jơnum yua gong gai kơnuk kơna  pơtrun, kiăng pơtô lăi ană plơi pla djru đăo ngă tui djơ̆ tơlơi phiăn dêh čar”.

Kơnong sa wơ̆t hrơi tơjuh dơ̆ng đôč abih yơh thun 2022, yak nao amăng thun phrâo 2023, sa bơyan Noel dơ̆ng truh pơ djop anih tơ tă anai. Hơdôm hrơi hăng anai, khua mua tơring čar Lâm Đồng hăng djop tơring glông, plơi pla amăng tơring čar hyu čuă hăng bơni hơ-ơč hrơi Noel ƀơi djop sang jơnum, anih kơkuh pơpŭ, sang ơi adai, čih pioh hăng lăng yôm tơlơi pơgôp pran jua mơ̆ng ƀing khua pô pơtô djop tơlơi đăo, mơnuih ƀôn sang đăo pơtrut bơwih ƀong huă pơđĭ kyar, bruă mơnuih mơnam hơđong, rŭ glăi  bruă pưk hmua, ia djuh. 

Khua mua tơring čar Lâm Đồng lăi pơtong, gong gai kơnuk kơna djop gưl dong yua, ngă gêh găl klă hloh pioh kơ djop mơta tơlơi đăo dưi pơphun tơlơi jơnum kơkuh pơpŭ; kiăng ngă mơak brơi anih kơnang tơki kơ mơnuih ƀôn sang nao jơnum, iâu lăi kơkuh pơpŭ. Laih anun, čang rơmang abih bang ƀing khua pô pơtô djop tơlơi đăo, ƀing djru bruă amăng sang ơi adai hăng abih bang mơnuih ƀôn sang đăo, pơpŭ kơ ơi adai, khăp kơ lŏn ia, jak iâu mơnuih ƀôn sang đăo mă bruă, pơđĭ tui tơlơi hơdip mơda mơda, hur har man pơdong plơi pla, akŏ pơjing khul gum pơgôp djop djuai ania amăng dêh čar.