Tom brơi (8/7) krĕp ha thun Khua git gai Ping gah dêh čar ơi Nguyễn Phú Trọng rơngiă. Mơnuih ƀôn sang đơ đam dêh čar nao tŭi ñang hơ-ŭ hơdor kơ Khua git gai Ping gah dêh čar hơđăp ơi Nguyễn Phú Trọng ƀrô hrơi huăi pơsat blung a. Ƀing apăn bruă, mơnuih Ping gah hăng mơnuih ƀôn sang amra hơdor na nao hăng lăng yôm sa čô mơnuih rơgơi kơhnâo amăng bruă hơkrŭ mơng dêh čar Việt Nam, mơnuih kơhnâo kơhnăl, gru grua, ba jơlan hlâo mơng Ping gah.

Hăng rơbêh 57 thun mut Ping gah, thâo ngă bruă lơm găn rơgao ngă hơkrŭ, ơi Nguyễn Phú Trọng hơmâo tuh rơyuh pran jua brơi bruă mă mơng Ping gah, mơng djuai ania. Ñu lĕ mơnuih ba gru kơ pran hơdip klă hăng gru hơdip mơng tơhan Cộng sản akĕ phĭ, abih pran jua djru bruă lŏn ia, djru brơi mơnuih ƀôn sang. Hơdôm tơlơi gum pơgôp yôm phăn mơng Khua git gai Ping gah dêh čar ơi Nguyễn Phú Trọng amra dŏ na nao amăng lŏn ia hăng mơnuih ƀôn sang. Khua git gai Ping gah ơi Nguyễn Phú Trọng hơmâo pioh glăi hơdôm tơlơi gum djru prong mơng mơnuih rơgơi kơhnâo, mơnuih gru grua, ba jơlan hlâo mơng Ping gah.

Gru hơdip hăng pran jua hiam klă mơng ñu lĕ mơng sa čô mơnuih Ping gah akĕ phĭ, hơmâo tơlơi đăo gơnang prong, anai lĕ mơnuih tum pơƀut pran gum pơgôp, pơmut hrŏm tơlơi thâo thăi mơng Ping gah, mơng mơnuih ƀôn sang, ling tơhan. Anăn apăn hăng bruă mă, tơlơi gum pơgôp, tơlơi thâo thăi hăng pran hơdip mơng Khua git gai Ping gah ơi Nguyễn Phú Trọng amra bơngač na nao amăng gru grua hing ang mơng Ping gah, djuai ania ta, amăng tơlơi pơpŭ bơni, lăng yôm mơng ƀing apăn bruă, mơnuih Ping gah hăng mơnuih ƀôn sang, pran khăp pap mơng gơyut gơyâo jar kmar.