72 thun, 53 thun Ping gah, yă Nguyễn Thị Hồng ƀơi tơring kual Quảng Phú, tơring glông Čư̆ Mgar, tơring čar Dak Lak ăt hur har pran jua mơn hăng bruă mơnuih mơnam. Hăng sa čô Khua Khul mơnuih mơnă khăp kơ lŏn ia tơring glông Čư̆ Mgar, ñu gir run na nao tô nao rai bơwih brơi tơlơi hơdip mơda hăng tơlơi dưi mơnuih amăng khul. Tañ gum hrŏm bruă hơkrŭ ƀơi kual ngă hơkrŭ đưm Đạt Lý 2 (anun lĕ thôn 1, să Hòa Thuận, plơi prong Buôn Ma Thuột, tơring čar Dak Lak ră anai), thun ñu 19 thun, ñu ư-ang dưi mut Ping gah Cộng sản Việt Nam. Rơgao hơdôm tal ayăt mă pơkŏng, taih amang, ñu djă kơjăp mơn pran đăo kơnang ngă hơkrŭ. Tơdơi kơ rơnuk rơnua, ñu gum hrŏm bruă ƀơi tơring glông Čư̆ Mgar. Yă Nguyễn Thị Hồng ră ruai:

“Amăng rơnuk blah ayăt lĕ kơdŏng glăi ƀơi anăp hăng ayăt, khin hơdip, khin djai hăng pơsăn drơi pô. Kâo gum hrŏm hơdră ngă hơkrŭ lĕ ăt lăng ƀuh mơn ƀing gŏp pơsăn drơi yua kơ tơlơi rơngai, dưi pô ră anai. Anun ăt lĕ bôh than, pơsur pioh kâo hrưn đĭ, djă pioh dong tơlơi ƀuan hăng Lŏn ia, hăng Ping gah, hăng mơnuih ƀôn sang. Tơdơi kơ rơngai kâo ƀuh pô ăt lĕ mơnuih tơphă dưi dô̆ hơdip, dô̆ hmâo tơlơi gal pioh pô tuh rơyuh pran jua kơ plơi pla, kơ lŏn ia”.

Bơ̆ Thương tá Lữ Thị Anh Đào, Kơ-iăng Khua anom PA02, Kông ang tơring čar Dak Lak, amăng giăm truh 30 thun mă bruă pơgăn ƀing kơdŏng glăi kơnuk kơna, ñu thâo rơđah tơlơi pơmin ngă hơkrŭ hăng tơlơi pơmin mơ̆ng mơnuih ping gah, ngă giong klă bruă hmâo jao. Thượng tá Lữ Thị Anh Đào lăi pơthâo:

“Dưi hmâo hơdôm rơnuk nao hlâo pơtô pơhrăm, hrŏm hăng hơdôm boh thâo hrăm mơ̆ng sang hră, lông găn rơgao lơm pơhrăm, kâo ƀuh hơdôm pran tuh rơyuh rơngiă rơngiom, mă bruă mơ̆ng hơdôm rơnuk nao hlâo lĕ, hơdôm tơlơi tơnap, glêh glar mơ̆ kâo glăk găn rơgao ƀuh ƀu lu ôh. Yua anun yơh kâo hmâo mă bruă gah tơlơi pơmin kơ drơi pô, hơdôm tơlơi mơ̆ ƀing gŏp dưi ngă lĕ kâo ƀuh sit lĕ pô khom dưi ngă kiăng pô khom gir run hăng pô khom tơpă sit, gơgrong anun kah pô mơ̆ng dưi ngă”.

Hăng sa čô đah kơmơi djuai ania ƀiă, ƀơi hnưr thun 39, amai H’ Čir Mlô, dô̆ ƀơi să Ea Đar, tơring glông Ea Kar hmâo laih 14 thun Ping gah. Hmâo ha tal ngă Khua git gai Ping gah ƀuôn Sưk, să Ea Đar, laih anun ngă Khua Khul pơlir hơbit đah kơmơi să Ea Đar, hăng bruă apăn hơpă, ñu leng kơ ngă klă bruă pô tô nao rai kơplah wah Ping gah hăng mơnuih ƀôn sang. Djru mơnuih ƀôn sang lăi đĭ tơlơi pơmin, čang rơmang lăp djơ̆ hăng dưi čơkă mă tơlơi lăi glăi, pơsir lăng djơ̆ mơ̆ng khua git gai, amai H' Čir Mlô hmâo djru prong biă pran đăo kơnang, tơlơi hmư̆ tui mơ̆ng mơnuih ƀôn sang hăng Ping gah hăng gong gai.

“Djop pran jua klă, bôh thâo, pơhlôm djơ̆ tơhnal mơ̆ng sa čô mơnuih apăn bruă amăng rơnuk phrâo, ƀing ta khom gum hrŏm drơi pô ƀing ta khom gơgrong blung hlâo. Kâo đăo kơnang kơ hơdôm hơdră bruă, hơdôm hră pơ-ar, tơlơi pơtrun pơsit, črâo ba mơ̆ng Ping gah hăng Kơnuk kơna. Yua anun bruă pơpha, pơplih mơnuih apăn bruă kâo pơ̆ hơpă ngă hơget, kâo leng kơ gir run pioh ngă giong prong bruă hmâo jao”.

Hăng pran jua gơgrong, pran hrưn đĭ yak rơgao hăng pran jua hur har hăng Ping gah, hăng mơnui ƀôn sang, ƀing đah kơmơi ping gah ha pran jua ƀơi Dak Lak glăk ngă pơhưč pran jua hlăk ai yak tô̆ tui, pơdŏng plơi pla jai hrơi jai pơdrŏng asah klă hiam./.