Amăng hơdôm tơlơi rơkâo đĭ mơ̆ng mơnuih ruah khua lĕ, ƀuh rơđah tơlơi kiăng lăi nao anŏ ngă tơnap gun kơ bruă ngă hră pơar lŏn tơnah kơ mơnuih ƀôn sang. Ơi Lương Thanh Bình, Kơ-iăng Khua Gơnong bruă kông ngăn lŏn glai ayuh hyiăng tơring čar Gia Lai brơi thâo, thun blan pơ anăp amra pơblih jao tơlơi dưi ngă brơi hră pơar yua lŏn kơ sang anŏ, mơnuih ƀôn sang mơ̆ng Sang bruă kĭ hră pơar lŏn tơnah gưl tơring čar, glăi kơ Sang bruă kĭ hră pơar wai lăng lŏn tơnah ƀơi tơring glông.

Rơngiao kơ anun, mơnuih ruah khua tơring glông Phú Thiện dŏ lăi pơthâo lu tơlơi pơgôp hiăp phara, kah hăng tơlơi tơnap čan prăk kơ ƀing ngă bruă sĭ mơdrô anet amăng sang anŏ tui hăng hơdră djru mơ̆ng dêh čar pơtrun pioh pơđĭ kyar bơwih ƀong huă mơnuih mơnam kual djuai ƀiă; tơlơi sem lăng anih anom sĭ mơdrô kmơ̆k, hơbâo pruai hăng ia jrao pơgang phun pla; tơlơi dŏ aka ƀu găl amăng bruă pơđĭ kyar pơtô bruă mă amăng kual mơnuih ƀôn sang djuai ƀiă....