Lơ 23/10, Khua Jơnum min mơnuih ƀôn sang tơring glông Bảo Lâm, tơring čar Lâm Đồng hmâo črâo ba hơdôm bôh anom bơdjơ̆ nao pel ĕp nam čơđang jing glông dơlăm blah dua kơdư ƀơi thôn 4, să Lộc Tân. Tui hăng tơlơi čih pioh, ƀơi kơčong kơdư hmâo nam čơđang năng ai ñu 1,5 met, ataih ha rơtuh met mơ̆ng kơčong trun tơkai kơdư. Jum dar kual hmâo hơdôm anih lŏn tơhroh anet, lu rơ-ưng bôh pơtâo kơtrâ̆o hơdôm pluh tơn khil khul ƀơi kual, amra tơglưh trun ƀơi kual ƀut Cốc hơbin ƀu thâo ôh.

Ơi Đặng Văn Hân, ƀơi thôn 4, să Lộc Tân, brơi thâo, ƀơi ƀôn ƀut Cốc hmâo năng ai ñu 20 bôh sang anô̆ mơnuih ƀôn sang dô̆ hơdip mơda. Rim hrơi, kual anai dô̆ hmâo lu mơnuih nao pĕ če hăng nao rai ƀơi jơlan ƀơi tơkai kơdư. Lơm thâo ƀuh nam čơđang, mơnuih ƀôn sang bơngot biă, huĭ kơ lŏn tơhlom tơhroh trun ngă djai mơnuih. Jơnum min mơnuih ƀôn sang tơring glông Bảo Lâm hmâo črâo ba laih khul gơgrong bruă anai ƀơi să Lộc Tân hlă hnal lăi pơthâo hăng ngă tui hơdôm bruă pioh pơgang hlôm hlâo huĭ hmâo tơlơi truh./.