Tui tơlơi juăt laih, amăng rơnuč rơwang hrơi tơjuh, grup wai lăng gong guai ƀuôn Đrang Phốk, să Krông Na, tơring glông Buôn Đôn, hrŏm hăng ƀing apăn bruă, ling tơhan wai pơgang guai Sêrêpôk hyu tir, wai lăng kơtuai tui jơlan guai, gong guai. Ơi Y Mosk H’ra, mơnuih arăng đăo gơnang amăng plơi pla brơi thâo, neh met wa dŏ hơdip sui thun ƀơi kual dơnung đang glai dêh čar Yok Đôn, yua anun, hrŏm hăng wai pơgang jơlan guai, gong gai, bruă wai pơgang glai rưng ƀơi kual giăm guai ăt hơmâo đing nao. Tha plơi, ƀing mơnuih arăng đăo gơnang juăt jak iâu ƀing hlăk ai amăng plơi pla hrŏm ling tơhan kiăng wai lăng rĭm ƀĕ kyâo, rĭm kual lŏn ƀơi guai lŏn ia:

“Abih bang mơnuih ƀon sang hơmâo abih pran jua gum hrŏm hăng puih kơđông tơhan wai pơgang guai Sêrêpôk, grup bruă mă amăng plơi pla, hrŏm hăng tơhan wai lăng đang glai dêh čar Yok Đôn kiăng kơ wai lăng glai kyâo hăng wai lăng kơtuai tui guai lŏn ia, gong guai dêh čar. Pơtô pơblang mơng ƀing tha rơma truh pơ hlăk ai čơđai, kiăng rang kơđiăng amăng bruă wai lăng guai lŏn ia, pơtô brơi ƀing hlăk ai anăm găn nao rai lŏn ia ča čot ôh”.

Ƀơi să giăm guai Ia Lốp (tơring glông Ea Sup), 12 boh plơi pla lêng kơ man pơdong thun 2006, tui tơlơi črâo trun mơng akŏ bruă pơdong plơi pla phrâo kiăng pơđĭ kyar bơwih ƀong huă mơng Binh đoàn 16 - Ding jum ling tơhan ră anai lĕ grup bơwih ƀong gah khul ling tơhan mrô 737, Quân khu 5. Amai Hà Thị Phê, dŏ ƀơi plơi Đừng, să Ia Lốp brơi thâo, nao pơ anai pơdong plơi pla phrâo lơ̆m ñu glăk hlăk ai, găn rơgao 17 thun dŏ hơdip, dô̆ rơkơi, ñu ăt kar hăng lu mơnuih ƀơi anai, lăng anai lĕ plơi pla tal 2. Neh met wa ƀơi anai lêng kơ thâo rơđah tơlơi gơgrong, bruă jao mơng ƀing gơñu hăng lŏn ia. Wai lăng guai lŏn ia, gong guai lĕ wai lăng tơlơi hơdip kơ rĭm boh sang anŏ, rĭm boh plơi pla. Rĭm čô mơnuih kar hăng gong gai dŏ hơdip ƀơi kual giăm guai:

“Hơmâo tơlơi pơtô pơblang mơng ling tơhan wai pơgang guai kơ bruă wai pơgang guai lŏn ia, kâo pô hrŏm hăng sang anŏ thâo rơđah kơ tơlơi anai yôm phăn biă mă hăng mơnuih ƀon sang ƀing gơmơi. Kâo ăt amra pơ alum pran jua sang anŏ, adơi ayong, ană tơčô gum hrŏm na nao hăng ling tơhan, tơhan amăng plơi pla, kông ang să djru wai pơgang guai lŏn ia.”

Tơring čar Dak Lak hơmâo rơbêh 71 km jơlan guai hăng dêh čar Kur. Ngă tui tơlơi črâo trun mrô 01, lơ 9/1/2015 mơng Khua dêh čar “Kơ bruă jak iâu abih bang mơnuih mut hrŏm wai pơgang guai lŏn ia, pơhlôm hơđong ƀơi kual giăm guai amăng rơnuk phrâo”, gong gai hơdôm boh să giăm guai hơmâo gum hrŏm kjăp hăng hơdôm puih kơđông tơhan, ƀing ling tơhan mă bruă ƀơi kual giăm guai ngă klă bruă pơgang rơnuk rơnua, wai pơgang guai, hơđong kual giăm guai. Lu hơbô̆ bruă wai pơgang rơnuk rơnua hơmâo pơjing hăng pơphun klă anun lĕ: “hlăk ai hăng tơlơi phiăn”, “jua teng pơhlôm rơnuk rơnua”, “jua teng wai lăng guai lŏn ia”. Amăng 4 boh să kual giăm guai gah dua boh tơring glông Buôn Đôn hăng Ea Sup ră anai hơmâo rơbêh 2.400 khul grup, sang anŏ, ƀing mơnuih čih anăn mut hrŏm grup wai lăng mă pô hăng giăm 60 km jơlan guai hăng 4 ƀĕ gong gai. Trung tá Nguyễn Thanh Tùng, puih kơđông tơhan wai pơgang guai Ea H’leo, anom bruă wai pơgang guai tơring čar Dak Lak brơi thâo, tơlơi gum hrŏm kơplah wah puih kơđông tơhan hăng hơdôm khul grup kơđi čar mơnuih mơnam, hơdôm khul grup, ƀing mơnuih amăng djop plơi pla glăk ba glăi tŭ yua amăng bruă wai pơgang guai, pơhlôm hơđong ƀơi kual giăm guai.

“Anom bruă hơmâo gum hrŏm hăng hơdôm khul grup, gơnong bruă, anom bruă, hơmâo hơdôm hơdră bruă hăng khul đah kơmơi, tơhan hơđăp, mut hrŏm hăng tơhan wai pơgang guai kiăng hyu tir, wai lăng gong guai. Hơdôm boh plơi pla lêng hơmâo tơlơi pơkôl ƀu mơnuih mơnuih ngă soh hăng amra hrŏm hăng ling tơhan wai pơgang guai bơkơdong glăi, ƀom kiơng ƀing ngă soh lơ̆m mut nao rai lŏn ia ča čot.”

Đại tá Đào Viết Hùng, Khua anom bruă git gai tơhan wai pơgang guai tơring čar Dak Lak brơi thâo, hrŏm hăng “Tơlơi jak iâu abih bang mơnuih mut hrŏm wai pơgang guai, pơhlôm hơđong ƀơi kual giăm guai amăng rơnuk phrâo”, bruă pơjing, hơkrŭ klă dong amăng bruă mă mơng hơdôm khul grup Ping gah, gong gai hăng khul grup amăng să giăm guai lăi hrŏm hơmâo ngă tui abih hăng jai hrơi tŭ yua amăng bruă mă. Ƀing apăn bruă Ping gah tơhan wai pơgang guai hơmâo pơkiăo nao mă bruă amăng plơi pla, ling tơhan hơmâo jao ngă kơ-iăng khua git gai Ping gah hơdôm boh să glăk ngă tui pran gơgrong jing mơnuih ba jơlan hlâo amăng hơdôm bruă mă, jơlan hơdră, akŏ bruă pơđĭ kyar bơwih ƀong huă-gru grua-mơnuih mơnam, pơhlôm djơ̆ tơlơi rơkâo pơđĭ kyar bơwih ƀong huă pơlir hăng bruă wai pơgang rơnuk rơnua ƀơi kual giăm guai.

“Ƀing gơmơi hơmâo hơdră bruă mă hăng Ping gah tơring glông, hơdôm puih kơđông tơhan wai pơgang guai hơmâo hơdră bruă hăng Ping gah hơdôm boh să kiăng hơmâo tơlơi tŭ ư, mut hrŏm amăng ping gah kơ bruă git gai, laih dong hơmâo tơlơi mut hrŏm amăng khul ling tơhan. Pơhmutu amăng bruă wai lăng guai lŏn ia ƀing gơmơi hơmâo gum hrŏm ngă klă tui tơlơi pơtrun mrô 03 mơng Khua dêh čar. Hăng tơlơi jak iâu abih bang mơnuih gum hrŏm, ƀing gơmơi pơsit tong tơdah kiăng ngă klă blung hlâo kiăng đing nao hrŏm hăng gưl Ping gah, gong gai hơkrŭ glăi ƀơi ƀon lan, sit biă ñu lĕ khul grup Ping gah. Ră anai ƀơi 2 boh tơring glông giăm guai hơmâo 38 boh plơi pla, ƀing gơmơi lêng kơ mơnuih tơhan mut hrŏm mă bruă hăng hơdôm boh plơi pla.”

Hrŏm hăng tơlơi gir run ƀu pơdơi mơng ling tơhan, tơlơi gum tơhan hrŏm mơnuih ƀon sang hơmâo pơgôp wai pơgang kjăp kual giăm guai, hơđong tơlơi hơdip ƀơi guai lŏn kơtuai tui tơring čar Dak Lak./.