Ơi Anŭ hơmâo ană plơi pla đăo gơnang ruah đĭ ngă tha plơi dong mơng thun 2002. Hăng tơlơi thâo thăi hăng pran đăo gơnang mơng ñu, tha plơi Anŭ hơmâo pơjing pran gum pơgôp, gum hrŏm pơđĭ kyar bơwih ƀong huă, pơjing plơi pla hiam klă. Yua mơng bruă ngă klă, hơdip jê̆ giăm, thâo hiăp bit, tha plơi Anŭ hơmâo pơtô pơblang hơdôm tơlơi črâo trun, hơdră bruă mơng Ping gah hăng Kơnuk kơna tơl neh met wa djuai ania Bahnar, hăng hơmâo mơnuih ƀon sang dong yua. Tha plơi Anŭ brơi thâo:

“Kâo ngă tha plơi dong mơng thun 2002. Ră anai abih bang mơnuih thâo hluh rơđah hơget djơ̆, hơget glăi yua anun thâo gum pơgôp, gum tơngan hrŏm pơjing plơi pla hiam klă, ƀu ngă tui hơdôm tơlơi soh glăi dong tah. Pran khăp amăng plơi pla jai kjăp tui, tơdah hơmâo tơlơi rung răng, bơrơtaih, bơrơjah hơget thơ…ƀing gơmơi amra nao pơsir hĭ hmao tlôn, neh met wa lêng kơ hmư̆ hăng ngă tui soh”.

Hrŏm hăng bruă ngă klă tui tơlơi gơgrong mơng mơnuih wai lăng bruă plơi pla, tha plơi Anŭ ăt lĕ mơnuih rơgơi bơwih ƀong huă amăng plơi pla. Mơng rơbêh 2 ektar kơphê, 1 ektar hmua pơdai hăng rông hlô mơnong dong, yua kơ gir kơtir, thâo pruai kmơk, čem pơpem hlô rông, rĭm thun tơdơi kơ duh hĭ prăk tuh pơ alin, sang anŏ ñu pơhrui glăi giăm 150 klăk prăk. Prăk pơhrui anai aka ƀu lu lơi samơ̆ yua kơ thâo pơkrem, thâo yua prăk yua anun sang anŏ ñu dưi man pơdong sang prong rơhaih, blơi rơdêh, măi mok yua amăng bơwih ƀong ngă đang hmua hăng tơlơi hơdip rĭm hrơi.

Hrŏm hăng anun, tha plơi Anŭ ăt đing nao djru brơi neh met wa amăng plơi pla lơ̆m bưp tơnap tap. Pơhmutu kar hăng thun 2020, amăng plơi hơmâo mơnuih glăi mơng ataih ƀă klin Covid-19, đơ đam plơi pla ngă tui hơdră pơčlah. Tha plơi Anŭ nao djru brơi braih, añăm tam, ia mơsin, ngok hra kơ neh met wa, laih dong arăng jao djru brơi hơdôm sang anŏ pơčlah pơƀut, ñu lăng ba sang, čem hlô rông amăng hơdôm hrơi pơčlah mơnuih mơnam anai. Hơdôm bruă mă sit nik anun ngă mơnuih ƀon sang pơpŭ biă mă kơ ñu.

Hơdôm bruă mă sit nik mơng tha plơi Anŭ hơmâo pơgôp pơplih amăng plơi pla. Djop gưl gong gai ƀon lan tŭ yap, ƀơk hră pơpŭ… Ơi Sing, Khua jơnum min mơnuih ƀon sang să G’lar, tơring glông Đăk Đoan, tơring čar Gia Lai lăi pơthâo, tha plơi Anŭ lĕ mơnuih ba gru amăng plơi pla:

“Ơ Anŭ lĕ tha plơi ba gru, hơmâo neh met wa amăng plơi pla đăo gơnang, ñu lĕ mơnuih abih pran jua, lêng kơ gir run djru brơi neh met wa amăng plơi pla. Rĭm wŏt neh met wa bưp tơnap tap, ñu tui nao pơ alum pran jua, gum djru. Sang anŏ ñu bơwih ƀong đĭ đăi yua anun ñu juăt nao djru mơnuih tơnap tap. Amăng thun blan ñu ngă tha plơi, ñu lêng kơ pơgiong bruă jao amăng plơi pla, hơmâo gong gai să, tơring glông pơpŭ bơni”.

Rơbêh 20 thun hơmâo mơnuih ƀon sang đăo gơnang ruah ngă tha plơi, mah amăng plơi pla ƀudah amăng să hơmâo bruă anet prong hơget tha plơi Anŭ lêng kơ ƀuh ƀô̆ hrŏm hăng khul grup pơsir hĭ kơđi. Ñu juăt pơblang tong ten, lăp djơ̆, ngă kơ neh met wa hơdip rơnôm mơ-ak, thâo gum pơgôp. Yua anun, tha plơi Anŭ lêng kơ hơmâo neh met wa djuai ania Bahnar kiăng khăp, pơpŭ bơni hăng lăng ñu kar hăng anih gơnang nao kjăp phik amăng plơi pla.