Jơnum anai yua Ding jum Man pơphô hăng Tuh pơ alin, Khua anih jưh pơ ala dêh čar Japan hăng Khul ngă hrom bơwih ƀong huă dêh čar Japan pơphun hrom laih anun dưi pơdah amăng tivi hmao klôn pơtruh brơi kơ hơdôm rơbâo čô khua mua anom bruă sĭ mơdrô amăng dêh čar Japan. Pơhiăp ƀơi mông jơnum, Khua dêh čar, ơi Phạm Minh Chính hơmâo jŭ yap glăi hơdôm boh tơhnal dưi ngă tŭ yua sit nik amăng bruă giăng mah Việt Nam-Japan, Khua dêh čar lăi pơtong, Japan hơmâo tŭ mă boh tơhnal prong prin bơwih ƀong huă hăng tơlơi kơhnâo ia rơgơi, ngă pô boh thâo ia rơgơi phrâo laih anun pơđĭ kyar bruă ba yua mrô hăng sa amăng hơdôm dêh čar ba jơlan hlâo amăng rŏng lŏn tơnah, kơ bruă ba yua boh thâo ia rơgơi mrô amăng bruă bơwih ƀong huă hăng wai lăng mơnuih mơnam hăng mrô.

Jơnum anai yôm biă mă pioh kơ dua bơnah pơblang glăi tong ten anŏ gêh găl, ăt kah hăng tơlơi tơnap tap lông lăng phrâo; kah pơpha nao rai tơlơi hrăm tơdruă kiăng mơ̆ng anun hơmâo hơdră pok pơhai ngă tui, pơsir hơdôm tolơi dŏ kơƀah; djru kơ kơ dua bơnah ngă djop tơhnal pơkă, anŏ kiăng pơđĭ kyar hơđong kjăp kơ rĭm boh dêh čar, djru pơtrut hrom ngă tong ten tui tơlơi giăng mah đăo kơnang, jĕ giăm sit nik Việt Nam-Japan. Khua dêh čar rơkâo djop ding jum, anom bruă, ƀing mơnuih rơgơi kơhnâo, djop sang bruă, anom bruă sĭ mơdrô mơ̆ng dêh čar Japan hăng Việt Nam laih anun pơčrông sai hrom, djru kơnuk kơna ĕp hơdră pơsir tañ tơlơi gun, kiăng hơmâo hơdră anăp nao pơđĭ kyar hơđong kjăp.