Amăng mông h’ŭ hăng pran jua tơpă hơdor tơngia kơ ơi bung yă bai lŏn ia ta đưm či pra yang Kính Thiên, kơčong čư̆ Nghĩa Lĩnh, Khua git gai ping gah ơi Tô Lâm hăng ƀing khua mua gơnong dlông dêh čar nao čuh ñang kơkuh pơpŭ hơ-ŭ hơdor glăi  bơngăt atâo ơi yă đưm đă pô akŏ pơdong lŏn ia, kiăng ngă tui tơlơi pơtô “Ƀong boh hơdor kơ pô pla, mơñum ia hơdor kơ pô klơi” mơ̆ng djuai ania Việt Nam ta; rơkâo kiăng ơi bung yă bai bơngăt atâo ơi yă đưm djru ba dêh čar ta adai ayuh hyiăng hiam klă, hlim rơnang phang mơak; mơnuih ƀôn sang hơmâo tơlơi hơdip mơda rơnuk rơnua, trơi pơđao; lŏn ia rơngai hơđong, pơdrong sah, kơjăp kơtang.

Ƀơi anăp anih ngă yang h’ŭ bơngăt atâo ơi yă đưm, grup khua mua iâu lăi ƀuăn pran jua ngă tui gru grua mơ̆ng kơnung djuai ană tơčô yang ania čơgrai djuai ania dêh čar ta, ƀu pơdơi ôh hrăm, ƀư̆ pơkra pran jua, gir run pơđĭ tui tơlơi thâo ia rơgơi, tơlơi pơmin amăng bruă mă, glăm ba tong ten bruă ping gah, kơnuk kơna hăng mơnuih ƀôn sang jao; thâo gum pơgôp git gai pơčrâo bruă ngă tui tŭ yua Hră pơtrun jơnum ruah khua ping gah dêh čar tal XIII; git gai tŭ yua prăp lui jơnum prong ruah khua ping gah tal XIV; man pơdong lŏn ia jai hrơi dưi pơđĭ kyar tui; mơnuih mơnam rơnuk rơnua hăng tơpă hơnơ̆ng; pơgang bruă ngă pô kơ lŏn ia, hơđong kơđi čar; tañ ngă giong tơhnal pơkă dăp glăi bruă mă amăng kơnuk kơna hơbôt hloh, mă bruă hơmâo boh tŭ yua sit nik, ngă atur kơ lŏn ia ta yak nao amăng rơnuk pơblih phrâo hrưn đĭ pô mơ̆ng djuai ania Việt Nam.