Amăng mông hok mơak dua bơnah djuai ania hlăk prăp lui čơkă têt ngă yang thun phrâo Ất Tỵ 2025, ơi Tô Lâm Khua git gai ping gah dêh čar ta lăi, Việt Nam lăng kơ bruă pơđĭ kyar giăng mah pŭ ƀăn hăng dêh čar Khač lĕ sa bruă đing nao hlâo hloh amăng abih bang jơlan hơdră pơtom hiăp rơngai hơjăn, ngă khua pô, lu bơnah hăng lu hơdră. Khua git gai ping gah, Khua mir sir dêh čar Khač ơi Tập Cận Bình ăt lăi pơtong, Ping gah, Kơnuk kơna dêh čar Khač hơmâo đing nao mơ̆n kơ bruă ngă giăng mah hăng Việt Nam amăng jơlan hơdră pơtom hiăp hăng dêh čar ieo gah jĕ giăm.

Ƀrô djơ̆ tal anai, dua čô khua hrŏm hơbit pôr pơthâo pơphun bruă mă Thun pơtom hiăp, jĕ giăm hiam klă Việt Nam hăng Khač thun 2025; tŭ ư ngă hrŏm pơphun tŭ yua jơnum hơdor glăi 75 thun akŏ pơjing bruă pơtom hiăp hăng Thun jĕ giăm rô nao rai Việt Nam-Khač thun 2025; pơtrut bruă hyu pơtô lăi, pơhrăm djop mơnuih ƀôn sang, biă mă ñu ƀing hlăk ai dua bơnah thâo kơ gru grua hiam ngă giăng mah Viêt Nam-Khač. Khua git gai ping gah ơi Tô Lâm rơkâo dua bơnah git gai djop anom bruă, hur har hloh hơduah ĕp hơdră tŭ yua wai lăng hăng pơsir hơdôm bruă ngă aka ƀu tŭ ư nao rai, kơtưn ngă hrŏm ĕp anŏ gêh găl hloh pơsir djơ̆ lăp hăng bruă ngă pŭ ƀăn dua bơnah djơ̆ hăng phiah phiăn Sang gum hơbit djop dêh čar laih anun tơlơi phiăn jar kmar amăng anun Hră pơkôl Sang gum hơbit djop dêh čar kơ tơlơi phiăn ia rơsĭ thun 1982.