Ding kơna ding jum kơđi čar, Khua gum bruă git gai ping gah dêh čar ơi Võ Văn Thưởng nao jơnum hrom, đĭ pơhiăp git gai jơnum. Ơi Võ Văn Thưởng lăi pơtong: Kiăng  tơring čar Kon Tum pơđĭ kyar hmar, hơđong kjăp, ñu pok pơblang brơi sa dua mơta boh yôm phun kiăng djop anom bruă ping gah, gong gai kơnuk kơna, anom bruă djop djuai ania mơnuih mơnam, khul grup mơnuih mơnam mut phung Kon Tum đing nao kơñ pơgi anai, anun lĕ:

Djop anom bruă ping gah, gong gai kơnuk kơna, djop gưl anom bruă ping gah, mơnuih ping gah hăng mơnuih ƀôn sang djop djuai ania amăng tơring čar khom thâo hluh tong ten tơlơi gơgrong ba, anŏ yôm, tơlơi gêh găl, boh tơhnal hơmâo laih hlâo, hrom hăng tơlơi tơnap tap lông lăng amăng tơring čar; kiăng pơđĭ tui tơlơi thâo lu, djă pioh gru grua hiam, thâo hluh kơ gru grua phun lŏn ia plơi pla, bruă hơkrŭ mơ̆ng tơring čar, pơhưč kơtang tơlơi pơmin, pran jua, tơlơi kiăng hrưn đĭ, pơjing anŏ anun jing pran kơtang, jing bruă mă rơđah rơđong kơ rĭm anom bruă ping gah, rĭm mơnuih ping gah, khua mua apăn bruă hăng mơnuih ƀôn sang kiăng gum pran jua ngă bruă găn rơgao tơlơi tơnap akŏ pơdong plơi pla tơring čar Kon Tum pơđĭ kyar hmar, hơđong hăng hiam klă hloh.