Ƀrô hơdor glăi tal 68 thun hrơi pioh kơ nai ia jrao Việt Nam lơ 27/2/1955-lơ 27/2/2023, tlam lơ 27/2, Khua git gai pơ ala mơnuih ƀôn sang dêh čar ơi Vương Đình Huệ nao čuă, bơni hơ-ơč kơ ƀing nai tha prin, ơi ia jrao, nai ia jrao hrom hăng abih bang ƀing ngă bruă, ling tơhan dŏ mă bruă ƀơi sang ia jrao prong gah ling tơhan 108. Pơ ala kơ khua mua ping gah, kơnuk kơna, ơi Vương Đình Huệ, Khua git gai pơ ala mơnuih ƀôn sang dêh čar hok mơak hăng bơni hơ-ơč, hơdor tơngia kơ ƀing nai ia jrao amăng sang ia jrao prong ling tơhan 108 lăi pha, abih bang ƀing nai ia jrao amăng dêh čar ta hnun mơ̆n, hơmâo pơyơr pran jua mă bruă, gir run ba glăi boh tơhnal prong amăng thun blan rơgao.

Ơi Vương Đình Huệ đăo kơnang, hơdôm tơlơi tơnap tap mơ̆ng anom bruă ia jrao jăng jai đôč laih anun hơdor glăi tal 68 thun amra jing mông pioh kơ abih bang anom bruă ia jrao gum pran jua hrom hơbit ngă bruă kiăng tañ găn rơgao hĭ tơlơi tơnap tap; laih dơ̆ng čang rơmang abih bang rơbêh 500.000 čô khua mua, mơnuih apăn bruă amăng bruă ia jrao amăng dêh čar Việt Nam lăi hrom, ƀing ơi ia jrao amăng sang ia jrao prong ling tơhan 108 ăt hnun mơ̆n, jing ƀing ơi ia jrao, nai ia jrao mă bruă abih pran jua, pơyơr drơi jăn pô kơ bruă mă pơjrao hăng pơgang tơlơi suaih pral mơnuih ƀôn sang, kiăng ngă giong bruă jao djru pơjrao pơgang ba tơlơi hơdip kơ abih bang mơnuih.