Mah lŏn 3 ektar ƀơi să Gào, plơi prong Pleiku kơ sang anŏ ơi Lê Sỹ Đại (dŏ ƀơi Hà Tĩnh) lĕ lŏn sĭ mơdrô bơwih bơwang, samơ̆ ƀing gơñu hơmâo pơdong soh hăng tơlơi phiăn 4 boh sang kyâo, 4 boh tông thoa hăng hơdôm pluh boh sang pơkŏn hăng hơmâo jơlan nao rai tuh ƀêtông …Bruă man pơdong pơphun mơng thun 2020 hăng truh ră anai, Jơnum min mơnuih ƀon sang să Gào hơmâo 2 wŏt ngă hră kiăng pơsir hĭ bruă ngă soh anai laih dong khŏm brơi ƀing gơñu čuk pơkra kiăng pơhlôm tui hơđăp. Samơ̆, tơdơi kơ hơdôm wŏt hơmâo ngă hră phak, ơi Đại ăt tŏ tui man pơdong phrâo dong. Phrâo anai, ơi Dương Xuân Hồng, kơ-iăng Khua Jơnum min mơnuih ƀon sang să Gào brơi thâo, hơmâo mơ-it hră pơ-ar kơ Jơnum min mơnuih ƀon sang plơi prong Pleiku, rơkâo nao ruh hĭ.

“Amăng hrơi blan pơsir hĭ, Jơnum min mơnuih ƀon sang să hơmâo ngă hră pơ-ar, phak prăk, rơkâo Jơnum min mơnuih ƀon sang plơi prong hơmâo hră pơtrun phak prăk. Sa, dua wŏt Jơnum min mơnuih ƀon sang să rơkâo nao mă bruă, samơ̆ ƀing gơñu lăi glăk kut ƀơi ƀon lan, yua anun ƀu dưi bưp ôh, nao tơl anih ăt ƀu bưp ƀô̆ mơta, lơ̆m nao pel ĕp ăt ƀu hơmâo hlơi, ƀu ƀuh pô sang”.

Kar kăi tui anun mơn, ƀơi ƀut plơi 5, phường Thắng Lợi, plơi prong Pleiku, ơi Vũ Trung Anh hăng hơdôm boh sang anŏ jum dar ăt man pơdong hơdôm ring bruă sang dŏ amăng lŏn ngă hmua. Truh ră anai, hơdôm ring bruă man pơdong soh glăi giăm 300 met karê, hơmâo lu sang dŏ, pơga. Phrâo anai, tui lăi pơthâo mơng mơnuih ƀon sang, Jơnum min mơnuih ƀon sang plơi prong Pleiku ƀuh man pơdong amăng kual lŏn ngă hmua rok tui jơlan Tô Vĩnh Diện (phường Hoa Lư). Ơi Nguyễn Văn Tùng, Khua Jơnum min mơnuih ƀon sang phường Thắng Lợi brơi thâo, hơmâo lu tơlơi ba truh yua aka ƀu ƀuh hmao tlôn, mah ƀuh samơ̆ tơnap pơsir hĭ hơdôm tơlơi ngă soh anai. Amăng anun, bruă ƀing apăn bruă ngă amưng laih dong mơnuih ƀon sang man pơdong tui pran hor.

“Amăng hrơi mông aka ƀu truh 24 mông tơdơi kơ ngă hră pơ-ar mơ-it nao kiăng pơsir hĭ. Samơ̆ tơlơi rơkâo anai ăt pơsir aka ƀu khut khăt, tơdah dŏ tơguăn mơng gơnong glông amra kaih mơtăm. Sa čô ngă soh, samơ̆ ƀing gơmơi nao pơsir lu wŏt, ngă tơnap tap brơi kơ phường, lơ̆m anun bruă ăt lu biă mă, ƀing apăn bruă ngă tui tơnap yua tơlơi phiăn pơplih na nao. Mơnuih ƀon sang ƀu hŭi ôh, laih dong mơnuih ƀon sang ngă tui pran hor, tui tơlơi pơmĭn sô hơđăp, ƀing gơñu man pơdong anai adih kiăng pơhmutu lăng”.

Tui lăi thâo mơng Jơnum min mơnuih ƀon sang plơi prong Pleiku, dong mơng lơ 1/1/2020 truh lơ 31/8/2022, amăng plơi prong hơmâo laih 84 tơlơi ngă soh amăng mă yua lŏn mơnai hăng man pơdong sang dŏ hơmâo pơsir hĭ, hăng khŏm čuk pơkra glăi tui hơđăp. Samơ̆ truh ră anai, hơmâo kơnong 42 bruă ngă soh pơsir giong. Ơi Mai Văn Hoàn, Khua anom bruă wai lăng rơhuông adai lŏn mơnai plơi prong Pleiku brơi thâo:

“Ƀơi anai, hơmâo bruă wai lăng mơng gong gai ƀon lan. Samơ̆ hơdôm boh să phường, arăng thâo abih yơh, samơ̆ sa, dua čô mơnuih ƀu đing nao ôh. Blung a, arăng pơmĭn man pơdong hơdôm ring bruă anai huăi hơget ôh, samơ̆ tơdơi kơ ƀuh man pơkra prong laih. Lơ̆m anun hơdôm anom bruă bơdjơ̆ nao mơ-it hră pơ-ar nao pơ plơi prong, Jơnum min mơnuih ƀon sang plơi prong jao brơi Khua Jơnum min mơnuih ƀon sang phường, să, samơ̆ ƀing gơñu ƀu đing nao ôh kơ bruă anai”.

Amăng mông jơnum tal 9, Khul pơ ala mơnuih ƀon sang tơring čar Gia Lai tal XII (rơwang thun 2021-2026) laih rơgao, tơña kơ bruă ngă soh amăng man pơdong soh glăi anao lŏn ngă hmua, sa, dua čô khua hơmâo tơlơi pơmĭn: Lu ring bruă prong hơmâo man pơdong sui hrơi, samơ̆ ƀuh hơmâo hlơi ƀuh hmao tlôn, pơsir aka ƀu khut khăt. Truh hơdôm ring bruă anai man pơkra pơgiong, tơdah ruh hĭ amra ngă huač prăk kak. Lăi glăi tơlơi anai, ơi Lương Thanh Bình - Kơ-iăng khua gơnong bruă wai lăng ayuh hyiăng rơhuông adai tơring čar Gia Lai brơi thâo:

“Bruă wai lăng lŏn mơnai ƀơi ƀon lan, tơlơi gơgrong prong hloh lĕ mơng Jơnum min mơnuih ƀon sang hơdôm boh ƀon lan. Kơ tơlơi gơgrong mơng gơnong bruă, kiăng pơsir hĭ hơdôm bruă gun găn, tơnap tap hơmâo lăi nao, gơnong bruă wai lăng rơhuông adai lŏn mơnai pơphô bruă brơi Jơnum min mơnuih ƀon sang tơring čar. Tui anun, Jơnum min mơnuih ƀon sang tơring čar hơmâo git gai hơdôm gơnong bruă bơdjơ̆ nao hăng djop ƀon lan, pơtrut bruă pơtô pơblang, hăng pơsir hĭ khut khăt hơdôm bruă ngă soh”.

Kiăng kơtưn amăng bruă wai lăng hăng pơsir hĭ bruă ngă soh amăng mă yua lŏn mơnai, kơplah wah thun 2022, Jơnum min mơnuih ƀon sang plơi prong Pleiku hơmâo akŏ pơjing hơdôm grup pel ĕp kơ bruă man pơdong, yua lŏn mơnai amăng să, phường ngă soh hăng tơlơi phiăn, ngă bơngŏt amăng mơnuih mơnam. Him lăng, truh akŏ thun 2023, plơi prong amra lăi pơthâo tong ten kơ boh tơhnal pơsir hĭ hơdôm ring bruă ngă soh glăi hăng pơsir tui tơlơi glăm ba mơng khua mua hơdôm boh să aka ƀu kiăo tui lăng, ngă ba truh hơdôm tơlơi ngă soh anai hăng ƀuh sui thun./.