Čơkă hok mơak hơdor glăi 93 thun hrơi akŏ pơjing Ping gah hăng anăp nao hơdor glăi 15 thun hrơi akŏ pơdong glăi plơi prong Ƀuôn Hồ, mơguah lơ ½, Jơnum min mơnuih ƀôn sang plơi prong Ƀuôn Hồ, tơring čar Dak Lak jơnum tơgŭ ngă bruă man pơdong lu ring bruă phun amăng plơi prong, gir run kiăng ngă djơ̆ tơhnal pơkă plơi prong mrô III. Jơnum min mơnuih ƀôn sang plơi prong Ƀuôn Hồ, tơring čar Dak Lak, man pơdong 4 ring bruă phun yôm, pơtum nao gah bruă pơkra jơlan rơnoh prăk 37 klai, him lăng ngă giong tơhnal pơkă amăng 3 blan tal dua hăng tal klâo thun anai. Hơdôm ring bruă anai, djru pơkra ngă hiam glăi jơlan glông, kiăng gêh găl brơi kơ mơnuih ƀôn sang nao rai.

Ơi Đặng Gia Duẩn, Khua Jơnum min mơnuih ƀôn sang plơi prong Ƀuôn Hồ, brơi thâo, hăng bruă mă tơgŭ man pơdong mơ̆ng akŏ thun, plơi prong gir run khut khăt mă yua djop boh tơhnal pơkă tuh pơ alin mơ̆ng kơnuk kơna. Laih dơ̆ng, amra pơtrut kơtang pơhưč rơnoh prăk tuh pơ alin, kơtưn man pơdong plơi prong Ƀuôn Hồ jing anih anom bơwih ƀong huă phun, gru grua yôm kơ mơnuih mơnam amăng kual gah kơdư tơring čar Dak Lak, jing pô gơgrong ba yom kơtưn bruă pơđĭ kyar amăng sa kual anet.