Adơi Võ Thị Như Ngọc, Khua hlăk ai anih 12A1, Sang hră gưl 3 Lê Quí Đôn, tơring čar Dak Lăk jing sa amăng hơdôm čô čơđai rơgơi hơmâo pơmut amăng ping gah lơ̆m krĕp 18 thun. Anai jing tơlơi tŭ yap lăp djơ̆ biă mă kơ tơlơi gir run hrăm hăng bơrơguăt mơ̆ng ñu amăng lu thun. Như Ngọc lăi:“Kâo jing pơ-ư pơ-ang biă mă. Anai jing tơlơi gêh gal kiăng kâo kjăp tui tơlơi pơmin pran jua,bang hyu tơlơi klă, pơtrut pran jua ƀing gơyut amăng sang hră”.

Bơ adơi Nông Quốc An, čơđai sang hră gưl 3 Võ Nguyên Giáp, tơring glông Ea Kar, Dak Lăk, lêng kơ gir hrăm hră, mă bruă, hrăm rơgơi djŏp tơlơi hrăm hăng gir ngă bruă amăng khul hlăk ai. Blan 8/2023, Nông Quốc An hơmâo pơmut amăng ping gah lơ̆m glăk dŏ hrăm hră đôč: “Amăng hơdôm thun hrăm gưl 3, kâo gir djru bruă amăng sang hră. Kâo pơ-ư pơ-ang biă mă lơ̆m jing sa čô mơnuih amăng khul ping gah. Pran jua ania amra hơmâo kjăp tui amăng hrơi blan pơ anăp”.

Tui hăng ơi Nguyễn Tiến Dũng, Khua grup ping gah, Khua sang hră gưl 3 Võ Nguyên Giáp, hơmâo akŏ pơdong mơ̆ng thun 2021, sang hră hơmâo 27 čô mơnuih ping gah. Dơ̆ng mơ̆ng hrơi blung a, grup ping gah lăng ba buă bruă pơđĭ tui mơnuih ping gah. Ƀu kơnong ĕp ƀuh mơ̆ng ƀing khua, mơnuih ngă nai kai đôč ôh mơ̆, sang hră ăt lăng ba pơmut amăng ping gah ƀing čơđai rơgơi mơbruă. Thun hrăm 2023-2024, sang hră hơmâo pơmut 6 čô amăng ping gah jing ƀing čơđai sang hră. Kiăng ƀuh, ruah mă mơnuih thâo rơgơi, rơngiao kơ hrăm rơgơi, ƀing čơđai kiăng gir gum hrŏm djŏp bruă gah rơngiao dong, kjăp tơlơi pơmin kơđi čar. Ơi Nguyễn Tiến Dũng brơi thâo:“Phun ñu mơtăm ăt jing mơ̆ng khul khua gum bruă git gai Ping gah sang hră mơn, krăp lăng bruă hrăm, bơrơguăt tơlơi pơmin, bruă gir run, gum djru mơ̆ng ƀing čơđai. Glông tal 2 lĕ mơ̆ng ƀing nai pơtô, nai wai lăng sang hră, pơhlôm brơi ƀing cơđai ƀrô rơgơi ngă bruă hlăk ai ƀrô hrăm rơgơi, kiăng ƀing gơmơi dưi ruah pơtô hrăm mut amăng ping gah”.

Mơ̆ng thun 2020 truh ră anai, tơring čar Dak Lăk hơmâo pơmut 368 čô ping gah jing ƀing čơđai sang hră, kơnong amăng thun 2024 hơmâo 200 čô čơđai hơmâo pơmut amăng Ping gah. Tui hăng ơi Đỗ Tường Hiệp, Kơ-iăng khua Gơnong bruă pơtô hăng pơjuăt tơring čar Dak Lăk, boh than pơtrut pơsur pran jua anai jing tơlơi kiăng kơđiăng lui, kiăng hơdôm boh sang hră ngă tui na nao bruă pơđĭ tui ping gah amăng čơđai sang hră. Bruă pơhlôm hrăm hră rah, ƀrô gum ngă bruă đah mơ̆ng kjăp tơlơi pơmin kơđi čar jing tơlơi khŏm kiăng ngă hăng ƀing čơđai. Hrơi blan pơ anăp, Gơnong bruă pơtô hăng pơjuăt amra ngă hrŏm hăng djŏp gưl ping gah, sang hră djru ngă gal brơi, hơmâo anih pơtô bơrơguăt brơi ƀing čơđai. Ơi Đỗ Tường Hiệp brơi thâo:“Bruă pơđĭ klă tui ping gah amăng sang hră hơmâo lăp đing nao. Biă mă ñu amăng čơđai sang hră. Ƀing hlăk ai rơgơi mơbruă amăng sang hră gưl 3 hơmâo pơtô ba dong kiăng kjăp tơlơi pơmin kơđi čar, hơmâo pran jua kiăng khăp kơ bruă hơkru đah mơ̆ng pơtô ba, pơmut amăng ping gah, kiăng ƀing čơđai hơmâo jơlan gir kơtirtañ tơdơi kơ anun đĭ kyar pơ anăp anai”.

Bruă pơmut ping gah kơ ƀing čơđai sang hră ƀu kơnong jing tơlơi pơ-ư pơ-ang kơ hơjăn pô hlơi drơi hơpă ôh, anai jing pơsit tơlơi gơgrong bruă mơ̆ng rơnuk hlăk ai Dak Lăk amăng bruă akŏ pơdong hăng đĭ kyar plơi pla, lŏn ia. Ƀing ping gah hlăk ai hơmâo pơdjuai mơ̆ng hơdôm boh sang hră jing djuai mriah, tơlơi čang rơmang hiam kơ bruă tŏ tui hăng đĭ kyar mơ̆ng ping gah dĭ da la kơñ./.