Tơdơi kơ 2 hrơi ha mơkrah mă bruă ječ ameč, tơpa sit hăng gơgrong hloh, mơguah lơ 17/5 ƀơi Ƀirô Ping gah, jơnum tong krah rơwang Khul apăn bruă Ping gah tal 13 pơđut hĭ. Khua git gai Ping gah dêh čar ơi Nguyễn Phú Trọng git gai jơnum hăng hơmâo tơlơi pơhiăp yôm phăn amăng mông pơđut jơnum. Lăng glăi boh than dưi ngă mơng akŏ rơwang truh ră anai, Khua git gai Ping gah dêh čar ơi Nguyễn Phú Trọng brơi thâo, ƀing ta dưi ngă truh kih hơdôm hơnong pơkă, bruă jao: Đing nao pơgang klin kheng rah, pơtrut hơkrŭ glăi hăng pơđĭ kyar bơwih ƀong huă-mơnuih mơnam, pơjing tơlơi bơwih ƀong hơđong, gơgrong mă pô, gir mut hrŏm jar kmar dơlăm hăng tŭ yua.

Mơng tơlơi sit nik amăng bruă git gai amăng ha mơkrah rơwang tal XIII laih rơgao, Khua git gai Ping gah dêh čar ơi Nguyễn Phú Trọng lăi rơđah, 5 tơlơi pơhrăm glăi amăng pơplih hơdră git gai hăng bruă ngă amăng anun, kiăng đing nao pơtrun ha amăng plĕ hăng klă hloh tơlơi phiăn, hơdôm tơlơi pơkă, akŏ bruă kiăng ngă tui khut khăt, mut hrŏm amăng Ping gah hăng djop anih anom kơđi čar. Lăi nao jơlan gah bruă jao mơng anai truh abih rơwang mă bruă tal 13, Khua git gai Ping gah dêh čar ơi Nguyễn Phú Trọng rơkâo, đing nao pok pơhai ngă tui klă 5 bruă jao akŏ phun; sit biă ñu pơtrut kơtang hăng ngă klă dong amăng bruă pơjing, pơplih pơkra amăng Ping gah hăng anih anom kơđi čar brơi tơpă sit, hơđong kjăp.