Thun tuai čuă ngui dêh čar 2022 hơmâo rơbêh 210 tơlơi pơhun tui gru grua, bơwih brơi tuai čuă ngui amăng đơ đam dêh čar, amăng anun, kơnong ƀơi Quảng Nam pơphun 73 tơlơi, pơgôp ngă lar hyu pran gơgrong, boh tŭ yua mơng bruă bơwih brơi tuai čuă ngui amăng dêh čar ta. Mah tuai čuă ngui rai pơ Việt Nam aka ƀu djơ̆ hăng tơlơi kiăng, samơ̆ thun 2022, Việt Nam čơkă 3 klăk 500 wŏt mơnuih čuă ngui. Mrô tuai čuă ngui amăng lŏn ia him lăng rơbêh 101 klăk 300 rơbâo wŏt.

Pơhrui mơng bruă tuai čuă ngui dưm dưm 495 rơbâo klai prăk. Jơlan hơdră adôh suang amăng hrơi pơđut hĭ thun tuai čuă ngui dêh čar - Quảng Nam 2022 sui 90 mơnit, pơdah lu tơlơi jak iâu mơng Quảng Nam - kual lŏn hơmâo lu gru grua ngă hơkrŭ, pơplih phrâo… hăng lu tơlơi gal mơng ayuh hyiăng lŏn mơnai, gru grua kiăng pơđĭ kyar bơwih brơi tuai čuă ngui. Hrơi pơđut hĭ lĕ bruă mă kiăng pơđut hĭ thun tuai čuă ngui dêh čar mơng anun lăng glăi boh than dưi ngă amăng thun tuai čuă ngui - Quảng Nam 2022; laih dong, jao glăi hla kơ gru pơphun thun tuai čuă ngui dêh čar 2023 brơi kơ tơring čar Bình Thuận hăng anăn “Bình Thuận - Anih mơtah mơda”.