Ƀơi hơ-iu gah yŭ phun kyâo rôk jơlan mrô 14, ƀơi anăp amăng jang Sang hră gưl tlâo Quang Trung, să Dak R’la, tơring glông Dak Mil, tơring čar Dak Nông, ƀing kông ang glăk pel ĕp bruă pơhlôm rơnuk rơnua lơm đuăi rơdêh amăng jơlan hăng ƀing čơđai sang hră. Ƀơi anai, hrŏm hăng bruă pel ĕp, kông ang ăt črâo ba, pơtă pơtăn ƀing čơđai ngă tui djơ̆ tơlơi phiăn lơm đuăi rơdêh amăng jơlan. Amon Nguyễn Anh Trung, čơđai sang hră hrăm anih 12A6 brơi thâo:

“Kông ang juăt hyu pel ĕp na nao kiăng pơgăn hơdôm bruă ngă soh lơm đuăi rơdêh amăng jơlan, tơlơi anai klă biă mă. Ƀing gơñu juăt pel ĕp rĭm boh rơdêh, tañ ĕp ƀuh hăng pơsir hĭ hmao tlôn bruă ngă soh”.

Hlâo kơ pel ĕp, kông ang hơmâo nao tơl sang hră gưl tlâo Quang Trung pơphun pơtô pơblang, ƀơk hră lăi pơthâo hơdôm tơlơi pơkă amăng tơlơi phiăn bơdjơ̆ nao pơhlôm rơnuk rơnua amăng jơlan glông. Kông ang ăt gum hrŏm hăng sang hră pel ĕp sit nik ƀơi anih pioh rơdêh amăng sang hră hăng hơdôm anih pioh rơdêh jum dar sang hră, pơtô pơblang, črâo brơi ƀing čơđai anăm đĭ rơdêh pơđuăi kơtang hơmâo xi-lanh pơ glông hăng 50 cm3 lơm aka truh thun tui tơlơi pơkă. Tơdơi kơ kĭ tơlơi ƀuăn ngă tui djơ̆ tơlơi phiăn lơm đuăi rơdêh amăng jơlan, amon Trần Thị Thu Thanh, hrăm anih 12A1 brơi thâo:

“Kâo ƀuh bruă mă anai djơ̆ hăng tơlơi sit nik hăng yôm phăn biă mă, djru brơi ƀing gơmơi thâo hluh dong tơlơi pơkă pơhlôm rơnuk rơnua amăng jơlan; mơng anun bĕ hĭ hơdôm tơlơi ngă juăt ƀuh lơm đuăi rơdêh amăng jơlan glông”.

Nai Nguyễn Văn Ngọc, Khua sang hră gưl tlâo Quang Trung brơi thâo, sang hră pơdong rôk jơlan mrô 14, anai ară jơlan hơmâo lu rơdêh đuăi nao rai amuñ ƀuh rơdêh pơjrom. Sang hră hơmâo gum hrŏm hăng anom bruă bơdjơ̆ nao pơphun pơtô pơblang kiăng ƀing čơđai ngă tui tơlơi pơkă lơm đuăi rơdêh amăng jơlan glông.

“Blung hlâo lĕ sang hră brơi ƀing čơđai kĭ tơlơi ƀuăn, dua dong lĕ kiăo tui lăng bruă ngă tui djơ̆ tơlơi pơkă; hăng pơtă pơtăn na nao ƀing čơđai amăng mông jơnum pơƀut rĭm wŏt hrơi tơjuh. Rĭm thun sang hră gum hrŏm hăng anom bruă kông ang pơphun jơlan hơdră pel ĕp tơlơi phiăn pơhlôm rơnuk rơnua amăng jơlan glông brơi kơ ƀing čơđai”.

Amăng hơdôm hrơi laih rơgao, ƀing tơhan pôlih wai lăng jơlan glông tơring čar Dak Nông pơphun na nao bruă pơtô pơblang tơlơi phiăn pơhlôm rơnuk rơnua amăng jơlan glông brơi ƀing čơđai amăng hơdôm boh sang hră. Thượng tá Phạm Quốc Lập, Khua anom bruă tơhan pôlih wai lăng jơlan glông-kông ang tơring čar Dak Nông brơi thâo, hrŏm hăng bruă pel ĕp na nao, pơsir hĭ khut khăt bruă ngă soh, anom bruă pơsit tong bruă pơtô pơblang hrưn đĭ tơlơi pơmĭn ngă tui tơlơi phiăn lĕ bruă mă yôm hloh kiăng pơhlôm rơnuk rơnua amăng jơlan glông brơi kơ ƀing čơđai sang hră:

“Tơhan pôlih wai lăng jơlan glông gum hrŏm hăng khul pơhlôm rơnuk rơnua amăng jơlan glông tơring čar pơtô pơblang ƀơi hơdôm boh sang hră, blung hlâo lĕ ƀơi hơdôm sang hră rôk tui jơlan Hồ Chí Minh, jơlan mrô 28 hăng tong krah hơdôm boh tơring glông, plơi prong amăng tơring čar Dak Nông. Dua dong lĕ gum hrŏm hăng hơdôm anom bruă, gơnong bruă pơtô pơblang tơl amĭ ama ƀing čơđai anăm brơi ană bă đĭ rơdêh thut lơm aka ƀu truh thun. Hrŏm hăng anun pok pơhai bruă pơtô pơblang tơl hơdôm kual ataih, asuek hăng pơhlôm bruă pơjing hơbô̆ bruă amăng jang sang hră pơhlôm rơnuk rơnua amăng tơring čar”. /.