Khua gai gai pơ ala mơnuih ƀôn sang dêh čar ơi Trần Thanh Mẫn đĭ pơhiăp blung a, hrŏm hăng ƀing Kơ-iăng khua pơ ala pơplih nao rai git gai mông Jơnum. Ƀơi mông jơnum anai, Jơnum min apăn bruă phun pơ ala mơnuih ƀôn sang amra sem lăng, pơgôp hiăp kơ lu tơlơi yôm phun glăk pơdah pơ Khua mua pơ ala ƀơi mông jơnum lok 7. Kơ bruă čih pơkra tơlơi phiăn, amăng mông jơnum anai, Jơnum min apăn bruă pơ ala mơnuih ƀôn sang pioh lu mông či pơgôp hiăp kơ bruă lăi glăi, pơđing hmư̆, pơplih glăi Tơlơi phiăn rơnuk rơnua hơđong jơlan nao rai; pơgôp hiăp kơ bruă lăi pơthâo, pơđing hmư̆, pơplih glăi Tơlơi phiăn plơi prong jưh jom (pơkra glăi)...

Kơ hơdôm bruă yôm, Jơnum min apăn bruă pơ ala mơnuih ƀôn sang amra pơgôp hiăp kơ Akŏ bruă pơkă hơnong čuk pơkra pơđĭ kyar plơi prong jưh jom Hà Nội rơwang thun 2021-2030, anăp nao truh pơ thun 2050 hăng Pơplih hơdră dưm dăp čuk pơkra plơi prong Hà Nội truh pơ thun 2045, lăng nao truh pơ thun 2065; sem lăng, pơsit hơdră mă yua prăk pơhrui, prăk pơkom mơ̆ng kơnuk kơna thun 2023 hăng lu bruă prong pơkŏn dong./.