Đĭ pơhiăp amăng mông jơnum, Ding kơna Khul git gai Ping gah Trần Cẩm Tú lăi rơđah, thun 2025 lĕ thun yôm phăn biă mă- anai lĕ thun Ping gah, abih bang mơnuih ƀôn sang, ling tơhan gir run ngă tañ, ngă truh kih hơdôm hơnong pơkă mơng Jơnum tal 13 ba tơbiă; thun pơphun Jơnum Ping gah djop gưl anăp nao Jơnum Ping gah tal 14; thun blung a ngă tui bruă dưm dăp anih anom mă bruă brơi hơbot, mă bruă klă, tŭ yua, ngă atur kiăng lŏn ia ta yak nao rơnuk pơplih phrâo mơng djuai anai. Yua anun, Ding kơna Khul git gai Ping gah črâo ba amăng thun 2025 anai, gơnong bruă pơtô ba mơnuih ƀôn sang kiăng tŏ tui hruă kjăp tui tơlơi pơmĭn mơng Khua mir sir Hồ Chí Minh, tơlơi črâo ba mơng Ping gah hăng tơlơi git gai mơng Khua git gai Ping gah dêh čar ơi Tô Lâm amăng mông mă bruă phrâo anai kơ bruă pơtô ba mơnuih ƀôn sang; gơnong bruă kiăng hluh rơđah tơlơi yôm hăng tơlơi rơkâo pơplih kơtang amăng bruă pơtô ba mơnuih ƀôn sang bơkơnar hăng bruă mă amăng rơwang hơkrŭ pơplih phrâo kiăng tŏ tui pran kơtang mơng mơnuih ƀôn sang, pran gum pơgôp mơng djuai ania, ba lŏn ia ta yak nao rơnuk pơplih phrâo.

Ding kơna Khul git gai Ping gah rơkâo, hrưn đĭ tŭ yua amăng ngă tui hơdră bruă pơtô ba mơnuih ƀôn sang mơng anih anom kơđi čar. Hrŏm hăng anun, tŏ tui pơplih phrâo hơdră bruă pơtô ba mơnuih ƀôn sang; kiăo tui tơlơi sit nik ƀon lan, hluh rơđah bruă mă; pơjing rai lu glông, anih lăi tui lăng tơlơi pơhing, tơlơi čang rơmang hăng tơlơi pơgôp hiăp hăng jơlan gah “lăng yôm mơnuih ƀôn sang, giăm mơnuih ƀôn sang, thâo hluh, hrăm tui, gơgrong hăng mơnuih ƀôn sang”. Khua mua, mơnuih apăn akŏ djop gưl kiăng nao bưp na nao, pơhiăp bit, đing tơnga hmư̆, pơsir hĭ hmao tlôn tơlơi gun mơng mơnuih ƀôn sang, sit biă ñu amăng bruă tơgŭ kơđi, yua gơnam khưi khai, bruă ngă soh, hưp ƀong kông ngăn…Tŏ tui ngă klă bruă pơtô ba mơnuih ƀôn sang amăng kual djuai ania ƀiă, mơnuih tui đăo, hơdôm kual plơi pla phun kiăng wai pơgang rơnuk rơnua, kual ataih, asuek, kual tơnap tap, kiăo tui lăng mơnuih dŏ hơdip pơ tač rơngiao.

Ding kơna Khul git gai Ping gah Trần Cẩm Tú rơkâo, gơnong bruă pơtô ba mơnuih ƀôn sang gir run pok pơhai hơdôm bruă jao amăng pơphun kiăng djru brơi Jơnum Ping gah tal XIV, pơphun hơdôm tal jơnum pơƀut kơđi čar dơlăm, pok prong, hlâo, amăng hơdôm hrơi jơnum hăng tơdơi anun, kiăng ba glăi pran mơ-ak, gum pơgôp, pơčeh phrâo amăng mơnuih ƀôn sang. Ding kơna Khul git gai Ping gah lăi rơđah, tơlơi črâo trun pơmut anom pơtô ba mơnuih ƀôn sang hăng anom pơtô bruă Ping gah gơnong glông tŏ tui pok pơhai ječ, khut khăt; ba tơbiă hơdră bruă dưm dăp hơbot, lăp djơ̆, pơhlôm djơ̆ hrơi mông; pơjing, pok pơhai ngă tui jơlan hơdră bruă mă thun 2025, tơdơi kơ pơmut hrŏm.

“Ƀing ta kiăng dưm dăp hơbot anih anom mă bruă hăng bruă pơplih, dưm dăp glăi mơnuih apăn bruă thâo rơgơi, đăo gơnang lăp djơ̆ hăng tơlơi rơkâo amăng bruă jao pơ anăp. Yua anun, gơnong bruă pơtô ba mơnuih ƀôn sang kiăng ngă klă bruă pơtô ba mơnuih ƀôn sang amăng Ping gah, amăng Jơnum min djop djuai ania mơnuih mơnam hăng hơdôm grup kơđi čar mơnuih mơnam, amăng hơdôm anom bruă mơng Kơnuk kơna hăng gong gai djop gưl mơng gơnong bruă pơtô ba mơnuih ƀôn sang ƀing ta mơtăm, kiăng ba glăi tơlơi mut hrŏm, tơlơi dong yua, pran gơgrong kiăng gir run kơtang hloh, pơgôp pơgiong klă bruă jao amăng dưm dăp hơbot anih anom mă bruă”.

Tŭ mă tơlơi pơgôp hiăp amăng git gai mơng Ding kơna khul git gai Ping gah, Khua anom pơtô ba mơnuih ƀôn sang gơnong glông Mai Văn Chính brơi thâo, thun 2025 hăng rơwang tŏ tui pơ anăp, gơnong bruă amra pơplih djop mơta boh tơhnal, hơdră bruă pơtô ba mơnuih ƀôn sang lăp djơ̆ hăng tơlơi rơkâo amăng rơnuk phrâo. Akŏ phun lĕ pơplih phrâo hơdră bruă pơtô pơblang, pơtrut pơsur mơnuih ƀôn sang, pơtrut kơtang mă yua boh thâo phrâo, pơplih mrô hăng pok pơhai djop mơta bruă amăng pơtô ba mơnuih ƀôn sang.

“Kơ bruă mă mơng anai truh jơnum Ping gah tal 14 mơng Ping gah dŏ lu biă mă, amăng anun hơmâo bruă tơnap tap, kiăng anom pơtô ba mơnuih ƀôn sang hăng hơdôm anom bruă bơdjơ̆ nao djop gưl kiăng gir run lu ƀiă dong kiăng hmao tlôn thâo, kơsem min, pơphô bruă brơi Ding jum kơđi čar, Khul git gai Ping gah, djop gưl hơdôm hơdră bruă ba glăi tŭ yua amăng git gai, črâo ba bruă pơtô ba mơnuih ƀôn sang, bruă djuai ania, tơlơi đăo hăng kơtưn pơlir kơplah wah mơnuih ƀôn sang hăng Ping gah. Amăng thun 2025, anom pơtô ba mơnuih ƀôn sang hăng hơdôm anom bruă djop gưl amra gir run ngă klă jơlan hơdră bruă mă./.