Abih tih prăk phak lơ̆m pơsir kơđi lĕ rơbêh 123 klai. Hơdôm gơnam juăt ngă soh anun lĕ: kyâo pơtâo, kmơk, ia jrao puih pơhang phun pla, gơnam pik ƀô̆; sum ao, akhŏ jĕp; gơnam ngui brơi ƀing čơđai, hŏt djŭp mơng tač rơngiao, hŏt điện tử.

Amăng mông jơnum klah čun bruă pơgăn sĭ dŏp, plư pleč, gơnam pơkra mă ča čot pơphun tlam lơ 6/1, ơi Nguyễn Tuấn Hà, kơ-iăng Khua Jơnum min mơnuih ƀon sang tơring čar Dak Lak brơi thâo, mah mrô bruă ngă soh hăng mrô prăk phak lu ƀiă pơhmu hăng thun hlâo, samơ̆ ăt aka ƀu djơ̆ hăng tơlơi sit nik mơng bruă ngă soh amăng sĭ mơdrô gơnam tam amăng tơring čar. Pơ anăp anai, gơnong bruă bơdjơ̆ nao kiăng kiăo tui lăng anih anom sĭ mơdrô, hrưn đĭ klă dong amăng bruă đăo lăng hlâo, prap lui djop mơta kiăng pơhlôm hơđong, sit biă ñu amăng bơyan čơkă thun phrâo Quý Mão pơ anăp anai.