Anih čơđang pơčah, dlưh răm kơtang, hlăk hơmâo ƀơi lu črăn hnoh ia pơđoh nao phun gah ngŏ, glông ataih 10 km, pling ia mơ̆ng Dơnao prong pơkong Ea Sup gah tơkai, pơđoh glăi pơ să Ea Bŭng, tơring glông Ea Sup. Luu črăn tuh ƀêtông pơčah dlưh hĭ, jing amăng luh prong, tơhlom wơ̆t hang hnoh ia. Ayong Nguyễn Văn Phú, sang anŏ hơmâo 8 ar hmua ia, giăm hnoh ia bơnư̆ arăng pling nao, ia rô glăi ƀu djop anun boh pơdai hrŏ hĭ truh 30%, mơnuih ƀôn sang ngă hmua ƀu hơmâo kơmlai ôh.

“Hnoh bơnư̆ arăng kong ia pơđoh pơčah lu črăn anun ia hram, sit ia pling glăi pơ rơnuč plơi thôn 5 ƀu djop ia ôh. Kiăng dưi ngă hmua djop ia pruih kơ phun pla hmua pơdai, mơnuih ƀôn sang khom khuer, klơi ia bơmun, ƀôp mă ia dŏ glăi amăng hơdôm atong ia amăng hnoh, kiăng ƀôp pruih kơ hmua pơdai. Rơnoh prăk tuh pơ alin lu biă mă, blơi hơbâo, kmơ̆k pruai, pơkĕ apui lơtrik lêng kơ pơmă anun mơnuih ƀôn sang lup leč”.

Să Ea Bŭng, tơring glông Ea Sup hơmâo rơbêh 1000 ha hmua pơdai ia, tŭ mă ia pling nao mơ̆ng hnoh bơnư̆ gah ngŏ anun soh. Samơ̆ rơgao hơdôm hơpluh thun mă yua, ƀu kơnong 10 km hnoh ia phun đôč ôh, abih bang amăng hnoh bơnư̆ ia pling nao anun, găn nao amăng să ăt răm lu laih, ngă kơ bruă ngă hmua pơdai bơbeč djơ̆ prong biă mă. Ơi Lê Hồng Hạnh Khua git gai ping gah să Wa Bŭng brơi thâo, să rơkâo đĭ laih hăng jơnum min mơnuih ƀôn sang tơring čar kiăng ming pơkra glăi.

“Hnoh ia pơđoh kơ hmua pơdai ƀơi anai ia rô tơ̆I đưn, ƀơi anŏ lu črăn ƀu hơmâo ia rô nao dơ̆ng, bơbeč prong biă mă kơ bruă ngă hmua pla pơjing. Gơmơi rơkâo hăng čang rơmang Jơnum min mơnuih ƀôn sang tơring čar tuh pơ alin  pơkra glăi hnoh ia bơnư̆ pơkong, ngă hiư̆m pă dưi djop ia rô pling glai djop pơ hmua pơdai, phun pla mơ̆ng mơnuih ƀôn sang amăng să, kiăng kơ pơdai mơboh jor, tŭ yua lu hloh”.

Ea Sup lĕ anih ngă hmua pơdai phun mơ̆ng tơring čar Dak Lak, hơmâo dơnao pơkong ia prong hloh amăng tơring čar, hnoh ia pơđoh yap abih bang glông 105 km, prăp lui ia pruih djop brơi 8.210 ha hmua đang, phun pla; ba ia yua kơ 20.000 čô mơnuih ƀôn sang. Khă tui anun, tui hăng ơi Trịnh Quốc Bảo Kơ-iăng Khua kông ty sa ding kơna wai lăng ring bruă bơnư̆ pơkong ia tơring čar Dak Lak, hnoh ia pling nao pơ hmua lu črăn răm hĭ kơtang biă mă, pơčah čơđang, dlưh. Ƀơi lu anih pơkŏn, man hăng ƀêtông ăt răm, ia hram mơ̆n. Rim thun kông ty ba yua 1 klai prăk djru ming pơkra glăi. Kơnong thun 2023, jơnum min mơnuih ƀôn sang tơring čar Dak Lak djru rơbêh 10 klai prăk mơ̆ng Keh prăk pơhlôm pơgang tơlơi truh lŏn adai ngă, pioh tuh pơ alin pơkra ming črăn hnoh ia pơđoh răm hĭ, anih răm kơtang...Samơ̆ rơnoh prăk anai ƀu djop ôh ba yua kơ bruă ming pơkra glăi anŏ răm kơtang djop črăn hnoh ia pơđoh. Ơi Bảo lăi lĕ, kiăng ming pơkra glăi djop, rơnoh prăk lu hloh kơ anun kah djop.

“Kiăng ming pơkra glăi prong, ƀudah rŭ pơkra glăi abih bang djop hnoh ia pơđoh anun lĕ kiăng hơmâo prăk lu kơnuk kơna djru brơi, hnun kah dưi, yap abih bang truh kơ 100 klai prăk mơ̆n djop. Rơnoh prăk dưi mă yua mơ̆ng prăk pơhrui glăi jia mơ̆ng bruă yua ia pơđoh anun, prăk kơnuk kơna djru pơhlôm tơlơi truh lŏn adai ngă sit mơ̆n ƀu djop ôh”.

Tơring čar Dak Lak ră anai, hơmâo giăm 620 boh dơnao pơkong hăng rơnoh ia bơnư̆ pơkong truh 650 klăk met khô̆i, 161 boh bơnư̆ ia blai hang hăng rô tui hnoh, 76 bit anih ƀôp ia hăng măi, dua dua arăt hnoh ia ngă jơlan rô ƀơi hang bư̆ bơnư̆. Amăng anun, lu ring bruă pơđoh ia răm laih, ngă hŭi ƀu hơđong kơ bơnư̆ pơkong ia, biă mă ñu bruă pok pơhai ia bơwih brơi kơ bruă pơđoh ia ba yua hăng pruih kơ hmua đang. Lu ring bruă bơnư̆ pơkong ia, hnoh ia pơđoh ƀơi tơring čar Dak Lak răm hĭ, rơnoh prăk yap anŏ răm truh hơdôm hơpluh klai prăk mơ̆n. Giong nao ĕp lăng pơtong glăi tong ten, ră anai hơmâo 57 ring bruă răm hŭi ƀu hơđong kơ bruă rô nao rai. Samơ̆, bruă ming pơkra ngă kjăp hnoh ia pơđoh ră anai hlăk bưp lu tơlơi tơnap tap yua aka ƀu hơmâo prăk.

Ƀơi tơring glông Ea Sup truh ră anai, mơnuih ngă hmua yuă laih pơdai bơyan phang, prăp lui kai čuar ngă hmua bơyan mơyan jing pơdai bơyan hlim thun 2024. Hăng hnoh ia pơđoh mơ̆ng bơnư̆ aka ƀu ming pơkra glăi klă ră anai mơnuih ƀôn sang ngă hmua pơ anai ăt dŏ bưp tơlơi lông lăng bơyan hmua mơyan boh pơdai amra ƀu jor ôh tơdah ƀu djop ia pling nao hăng pruih kơ hmua đang.