Lơ 8/2, 12 boh tơring glông, plơi prong mơng tơring čar Lâm Đồng hơmâo pơphun hrơi jơnum jao tơhan thun 2023. Hăng pran jua ngă bruă “Ruah pô hlơi, djơ̆ pô anun”, thun 2023, Lâm Đồng hơmâo ruah pơsit, kah phara hăng ruah mă rơbêh 1.370 čô hlăk ai nao ngă tơhan, amăng anun hơmâo 22 čô mơnuih ping gah hăng 528 čô ană bă djuai ania ƀiă.

Ƀing mut ngă tơhan hơmâo ngă tơhan ƀơi: Sang hră Lục quân, Lữ đoàn Tác chiến điện tử 98 (Ding jum Pơphô bruă tơhan), Lữ đoàn Công binh 293 (Ding jum git gai tơhan Công binh) hăng hơdôm khul tơhan gah Ding jum git gai tơhan Khul 7. Hrơi jao tơhan pơphun amăng hrơi mông kơdrưh yôm, ngă glưh pran jua biă.