Pok phun tal bơkơtưn amăng abih bang Khul hlăk ai čơkă mơ-ak Jơnum Ping gah hơdôm gưl hăng Jơnum Ping gah đơ đam dêh čar tal 14, Khua git gai tal sa Khul hlăk ai dêh čar Bùi Quang Huy lăi rơđah: Hơdôm gưl Khul hlăk ai hăng abih bang mơnuih gah khul, tơdăm dra pơsit pran jua ngă tui ba glăi bôh tơhnal hơdôm bôh yôm bơkơtưn amăng anun hmâo: Lăi pơhing kơ phiăn juăt gru grua đưm ư-ang mơ̆ng Ping gah Cộng sản Việt Nam; pơtŏng sit bruă mă, pran ư-ang, gơgrong kơjăp, ia rơgơi, bôh thâo git gai, bôh thâo apăn bruă gong gai hăng pran hrưn đĭ mơ̆ng Ping gah amăng rơwang mă bruă ngă hơkrŭ 95 thun rơgao, djru ngă brơi lŏn ia yak nao kơjăp phik amăng rơnuk phrâo, rơnuk phrâo hrưn đĭ pô mơ̆ng djuai ania; ngă tui pran jua ba jơlan hlâo, gum djru mơ̆ng hlăk ai amăng pok pơhai hơdôm ring bruă, črăn bruă hlăk ai sit nik hăng ba glăi bôh tơhnal; Pok pơhai hơdôm ring bruă, črăn bruă hlăk ai, pơphun pok tal bơkơtưn, pơphun bruă, mă yua hơdôm ring bruă, črăn bruă hăng pơphun Hrơi Hlăk ai gum hrŏm mă yua čơkă mơ-ak Jơnum Ping gah hơdôm gưl, anăp nao Jơnum tal 14 mơ̆ng Ping gah; Pơjing Khul hlăk ai kơjăp kơtang, sit nik lĕ khul pơhlôm hlâo đăo kơnang mơ̆ng Ping gah; Gum hrŏm pơdŏng hăng pơgang Ping gah; gum pơhiăp klă amăng tơlơi čih lăi pơthâo bruă Jơnum tal 14 mơ̆ng Ping gah, Khua git gai tal sa Khul hlăk ai Bùi Quang Huy lăi rơđah:

“Grŭp git gai Khul hlăk ai iâo pơthưr mơnuih amăng khul hlăk ai čơđai muai đơ đam dêh čar hăng abih bang pran jua klă hiam mơ̆ng pô, pơphun yơh hăng hơdôm bruă, khă anet samơ̆ sit nik, tŭ yua hmâo bôh tŭ yua kơ khul pioh djru pơjing pơsôh hloh amăng hơdôm gưl khul. Amăng tơlơi ngă Lơphet pok phun bơkơtưn amăng abih bang Khul pioh čơkă mơ-ak truh kih Jơnum Ping gah hơdôm gưl, ƀơi kual lŏn “Plơi prong jưh jom blah wang”, ƀing ta gum hrŏm ngă tui sa bruă tŭ yua anun lĕ pok phun Tết pla phun kyâo hơdor kơ Wa Hồ na nao. Bruă mă anai hmâo jing juăt laih, pơdah pran jua ba jơlan hlâo, bruă gơgrong mơ̆ng hlăk ai Việt Nam, mơ̆ng khul Hlăk ai rơnuk Hồ Chí Minh amăng pơgang anih anom dô̆, bŏng glăi hăng pơplih ayuh hyiăng”.

Pơhiăp amăng mông ngă lơphet, ơi Đỗ Văn Chiến, Khua Jơnum min djop djuai ania mơnuih mơnam dêh čar Việt Nam bơni, pơsit yôm Khul hlăk ai dêh čar hmâo gơgrong hlâo hăng hmao tlôn pơphun pok phun bơkơtưn anăp nao Jơnum Ping gah hơdôm gưl hăng Jơnum Ping gah đơ đam dêh čar tal 14. Kiăng tal bơkơtưn ba glăi bôh tơhnal sit nik, lar hyu kơtang pran jua ba jơlan hlâo, hur har mơ̆ng hlăk ai, ơi Đỗ Văn Chiến rơkâo:

“Khul hlăk ai khom đing nao pơtrut kơtang bruă lăi pơhing, pơđĭ dlông tơlơi thâo, bruă gơgrong amăng hơdôm gưl Khul, mơnuih amăng khul, ngă hiưm hơpă tal bơkơtưn jing tal jơnum bruă kơđi čar dơlăm prong amăng abih bang Khul, dưi hmâo tơlơi gum hrŏm mơ̆ng lu mơnuih amăng khul hlăk ai, tơdăm dra čơđai muai đơ đam dêh čar hăng dưi pơjing rai bruă ngă klă; Anun amra jing hơdôm jơlan tô nao rai, jơlan glông, anih dưm hơdrôm hră, anih hrăm, ƀudah hơdôm tơlơi kơsem min, hơdôm rơwang bruă pok phun bruă pơčeh phrâo, hơdră ngă bruă rơnuk phrâo, ba glăi bôh tơhnal yua kơ hlăk ai ngă pô”.

Lăi rơđah bruă pla phun kyâo ƀu kơnong kơ bruă ngă sit nik pioh pơplih phrâo anih anom dô̆ ôh mơ̆, ñu dô̆ djru mut tơhnal pơkă bruă pơđĭ kyar kơjăp mơ̆ng lŏn ua hăng ngă tui tơlơi pơkôl mơ̆ng Gong gai dêh čar Việt Nam amăng hơdôm mông bơkơtuai jar kơmar, amăng anun hmâo tơhnal pơkă hrŏ trun rơnoh ngă sah hyuh hyiăng lŏn mơnai amăng thun 2025, ơi Đỗ Văn Chiến rơkâo abih bang hơdôm gưl Khul hlăk ai đơ đam dêh čar ngă tui yơh pran jua ba jơlan hlâo, pơčeh pơjing hăng gơgrong bruă mơ̆ng pô pioh ngă tui bôh yôm pơplih phrâo bơkơtưn hmâo pok phun.

Amăng mông ngă lơphet, ƀing khua pơ ala hmâo nao čuă, ƀơk gơnam tam kơ amĭ Việt Nam sông kơtang; ƀơk 40 anung gơnam kơ sang anô̆ gah hơdră bruă; 30 anung prăk djru hrăm hră kơ čơđai sang hră tơnap tap hrưn đĭ amăng bruă hrăm hră; 10 anung gơnam kơ tha plơi, khua ƀôn amăng tơring glông Sơn Dương, tơring čar Tuyên Quang hăng abih bang nua ñu 100 klăk prăk.

Amăng rơwang jơlan hơdră, Khul hlăk ai Cộng sản rơnuk Hồ Chí Minh pok pơhai ring bruă hlăk ai čơkă mơ-ak Jơnum Ping gah tal 14 hmâo: 15 bôh sang kơ hlăk ai bơdjơ̆ nao yua kơthel ia ling dăo, 2 bôh sang tâ̆o yâo, tơdrŏn bơkơjăp drơi jăn plơi pla, sang Khăn quàng đỏ, Đang phun kyâo hlăk ai, jơlan nao rai amăng plơi pla, lan ngui ngor kơ čơđai, Sang 26/3, 36 glông jơlan pơkĕ apui pơčrang rơđah hăng pơ-iă yang hrơi, 20 ektar đang kyâo hlăk ai, djru 13 klai prăk mơ̆ng ngăn rơnoh Keh prăk lŏn ia pioh kơ bruă pơkra kueng hnoh Hlăk ai dêh čar. Abih bang prăk pok pơhai rơbêh kơ 21 klai prăk.

Tơdơi kơ ngă Lơphet pok phun, ƀing Khua mua git gai Ping gah, Kơnuk kơna hrŏm hăng ƀing pơ ala mơ̆ng khul hlăk ai hăng mơnuih ƀôn sang ƀơi anai hmâo gum hrŏm pla kyâo pơtâo ƀơi Kual hơdor glăi ƀing ngă hơkrŭ đưm, Kual djă pioh gru grua phara ha jăn Tân Trào, tơring glông Sơn Dương, tơring čar Tuyên Quang./.