Hơmâo akŏ pơjing dong mơng lơ 6/12/1989, Khul tơhan hơđăp Việt Nam lĕ khul grup kơđi čar - mơnuih mơnam, pơ ala brơi pran kơtang hăng tơlơi dưi mơng tơhan hơđăp, anai lĕ ding kơna mơng Jơnum min djop djuai ania mơnuih mơnam Việt Nam yua Khua mua Ping gah git gai. Mơng hrơi akŏ pơjing truh ră anai, Khul ƀu pơdơi prong kơtang, hơmâo lu bruă mă, djơ̆ hăng tơlơi kiăng hăng ba glăi tŭ yua. Jơnum pơphun amăng hrơi rơnuč thun 2022 hơmâo lăng glăi hơdôm boh than ngă tui tơlơi pơtrun mơng Jơnum khua mua đơ đam dêh čar Khul tơhan hơđăp Việt Nam tal VI, hluai tui tơlơi anun črâo rơđah hơdôm tơlơi dưi, anŏ aka ƀu klă, tơlơi ba truh hăng tơlơi pơhrăm glăi; pơsit tong jơlan gah, hơnong pơkă, bruă jao, hơdră bruă amăng rơwang tal VII, rơwang thun 2022-2027. Jơnum lĕ bruă kơđi čar yôm phăn amăng tơlơi hơdip mơda, kơđi čar - mơnuih mơnam mơng tơhan hơđăp hăng mơnuih ƀon sang đơ đam dêh čar, mơng anun tŏ tui pơsit tong pran gơgrong hăng hơdôm tơlơi gum pơgôp prong prin mơng Khul tơhan hơđăp Việt Nam amăng bruă pơjing, wai pơgang lŏn ia.

Đĭ pơhiăp amăng mông jơnum Khua git gai Ping gah dêh čar ơi Nguyễn Phú Trọng pơsit tong, tơdơi kơ pơgiong bruă jao amăng khul ling tơhan, hơdôm klăk čô mơnuih apăn bruă, ling tơhan hơmâo tơbiă mơng khul tơhan, pơwŏt glăi pơ plơi pla ƀudah hơdai nao mă bruă ƀơi hơdôm anih anom pơkŏn dong. Tơhan hơđăp lĕ mơnuih găn rơgao amăng bruă blah wang, kiăo tui hrăm hăng thâo hluh rơđah tơlơi hŭi rơhyưt, glêh tơnap amăng rơnuk blah wang, ƀing gơñu tuh rơyuh pran jua prong prin amăng bruă blah wang, kah hăng pơjing laih dong  wai pơgang lŏn ia, ră anai glăk lĕ ƀing mơnuih yôm phiăn biă mă amăng mơnuih mơnam. Pơpŭ bơni hơdôm boh than dưi ngă amăng bruă mă mơng Khul tơhan hơđăp Việt Nam amăng thun blan laih rơgao, anai lĕ tơlơi yôm phăn, pơgôp kiăng kơ “Lŏn ia ta hơmâo lu tơlơi gêh gal, tơlơi dưi, kơdrưh ang hăng tơlơi đăo gơnang amăng jar kmar kar hăng ră anai”, Khua git gai Ping gah dêh čar ơi Nguyễn Phú Trọng lăi rơđah, Ping gah hăng Kơnuk kơna lăng yôm hơdôm bruă mă laih dong hơdôm tơlơi gum pơgôp mơng Khul tơhan hơđăp Việt Nam hăng bruă pơjing laih dong wai pơgang lŏn ia, ƀing gơñu lĕ ƀing mơnuih đăo gơnang mơng Ping gah, gong gai hăng mơnuih ƀon sang.

Pơsit tong, hơdôm thun pơ anăp, him lăng kơđi amăng jar kmar ăt tŏ tui ngă tơnap tap, ƀu hmao thâo, amăng lŏn ia, ƀing ta ăt bưp lu tơlơi tơnap tap, tơlơi lông, Khua git gai Ping gah dêh čar ơi Nguyễn Phú Trọng brơi thâo, hăng Khul tơhan hơđăp, Jơnum Ping gah tal XIII ăt lăi nao rơđah bruă jao: “Pơ alum pran jua tơhan hơđăp ngă tui pran gơgrong, gru grua “Ling tơhan rơnuk wa Hồ” amăng pơjing hăng wai pơgang Ping gah, Kơnuk kơna, mơnuih ƀon sang hăng hơdră xã hội chủ nghĩa, wai pơgang tơlơi črâo trun mơng Ping gah, gir run hơngah hĭ hơdôm tơlơi pơčut pơčao soh glăi; djru tơdruă bơwih ƀong huă, pơplih tơlơi hơdip mơda. Kơtưn pran gơgrong mơng ding kơna amăng bruă pơtô pơblang pran khăp lŏn ia, gru grua ngă hơkrŭ brơi rơnuk tơdơi dong, pơgôp pơjing hăng hơkrŭ kjăp pran mă bruă, pơjing Ping gah hăng anih anom mă bruă tơpă sit, hơđong kjăp, hluai tui tơlơi anai, Khua git gai Ping gah ơi Nguyễn Phú Trọng rơkâo tui anai:

“Khul tơhan hơđăp Việt Nam amăng djop gưl kiăng kơ ngă klă dong tui tơlơi gơgrong lĕ ƀing akŏ phun, lăng yôm amăng bruă pơphun, pơtrut pơsur mơnuih ƀon sang ngă tui jơlan gah, tơlơi črâo trun mơng Ping gah, hơdră bruă, tơlơi phiăn mơng Kơnuk kơna, kơtưn pran gum pơgôp djop djuai ania, tui pran ngă pô mơng mơnuih ƀon sang, tui tơlơi thâo thăi pơđĭ kyar bơwih ƀong huă-mơnuih mơnam, bơwih brơi klă tơlơi hơdip kơ mơnuih ƀon sang, pơtrut hơdôm tal pơplông khăp kơ lŏn ia, pơdah pran ngă pô, pơjing pran mut hrŏm amăng mơnuih mơnam kiăng pơgôp ngă pơgiong hơdôm hơnong pơkă, bruă jao kơđi čar amăng lŏn ia amăng rơnuk phrâo. Ping gah git gai, Kơnuk kơna wai lăng, mơnuih ƀon sang ngă pô, anai lĕ tlâo bơnah kjăp phik amăng pơjing hăng wai pơgang lŏn ia ta.

Khua git gai Ping gah dêh čar ơi Nguyễn Phú Trọng rơkâo, Khul tơhan hơđăp djop gưl gir run wai pơgang hơdôm boh than dưi ngă mơng hơkrŭ, kơtưn amăng bruă pơtô hrăm bruă kơđi čar, tơlơi pơmĭn, djru brơi ƀing apăn bruă, ding kơna thâo rơđah jơlan gah, tơlơi črâo trun mơng Ping gah, hơdră bruă, tơlơi phiăn mơng Kơnuk kơna; pơƀut glăi na nao, lăi pơthâo hăng gưl Ping gah, gong gai tơlơi pơgôp hiăp mơng tơhan hơđăp, mơng mơnuih ƀon sang kơ hơdră pơđĭ kyar bơwih ƀong huă-mơnuih mơnam, wai pơgang lŏn ia:

“Khul tơhan hơđă djop gưl kiăng tŭ mă djop mơta rơnoh djru hăng hơdră djru mơng Kơnuk kơna brơi kơ tơhan hơđăp; gum hrŏm ha amăng plĕ hơdôm jơlan hơdră, hơdôm tal pơtrut pơsur amăng tơhan hơđăp brơi tŭ yua hloh; pơtrut kơtang hăng hrưn đĭ klă dong amăng bruă “Tơhan hơđăp djru tơdruă pơhrŏ trun ƀun rin, bơwih ƀong huă rơgơi”. Đing nao ƀiă dong hơdôm plơi pla tơnap tap, kual ataih,asuek, hơdôm kual djru hơkrŭ; pơtrut, pơ alum pran jua hơdôm anih anom, ƀing tơhan hơđăp gir run amăng bơwih ƀong sĭ mơdrô, hrưn đĭ pơdrông asah; ngă tui gru grua “mơñum ia hơdor kơ pô klơi” ngă kơ bruă hơdor tơngia, gru grua “Ling tơhan rơnuk wa Hô” mơng tơhan hơđăp Việt Nam.

Khua git gai Ping gah dêh čar ơi Nguyễn Phú Trọng ăt rơkâo, djru pơjing Khul tơhan hơđăp Việt Nam mă bruă tơpă sit, hơđong kjăp amăng kơđi čar, tơlơi pơmĭn hăng pơphun bruă mă; pơplih phrâo kơtang amăng jơlan gah hăng boh tơhnal kiăng Khul ngă tui klă bruă jao mơng ƀing gơñu, pơhlôm lăp djơ̆ mơnuih, anăp nao anih anom, plơi pla, lăng yôm bruă ngă klă, tŭ yua; anăm ngă kiăng arăng ƀuh hăng gir run pơjing Ping gah, Kơnuk kơna hăng anih anom kơđi čar jai hrơi tơpă sit, kjăp phik, pơlir jê̆ giăm hăng mơnuih ƀon sang, hơkrŭ pran đăo gơnang mơng mơnuih ƀon sang hăng Ping gah, kơnuk kơna.