Rim mơguah, tơhan hơđăp ơi Hàn Vinh Hà, dŏ ƀơi plơi Sơ Trà, să Krông Ana, tơring čar Dak Lak ƀuh ƀô̆ mơta ƀơi sang pơkrom boh mơnŭ ñu tañ biă mă. Ñu hyu sem lăng rim rơ-i ngă hruh dưm boh mơnŭ giong, pơgiăng bơnai ñu nao sang čơ laih anun đuăi nao pơ hmua ia lăng hmua pơdai. Bruă ngă lu črăn djơh hăng anun, ñu juăt laih lu thun rơgao, djru kơ gơñu bơwih ƀong huă dưi pơdong sang prong, anih dŏ hiam. 5 ha hmua pơdai, 3 ha đang boh troh hrŏm hăng sang pơkra ming gơnam sĭ mơdrô boh troh đang hmua laih anun sa blah đang ngă anih rông bip pioh sĭ boh, čeh ană, ba glăi kơ sang anŏ pô tơhan hơdăp anai pơhrui glăi hơdôm klai prăk rim thun.

Ơi Hán Vinh Hà ră ruai, kiăng dưi hơmâo kah hăng ră anai, sang anŏ ñu, ñu pô găn rơgao lu wơ̆t lui ruh amăng bruă mă yua kơ tơlơi truh lŏn adai ngă hăng klin kheng rông mơnŭ bip. Tơlơi mơ̆ djru kơ ñu ƀu kơdun ôh, tui hăng ñu lĕ, tơlơi tơpă mă bruă djơ̆ hnơ̆ng hăng pran jua gir run hrưn đĭ amăng thun blan ñu ngă tơhan pơhrăm kơ ñu.

“Tơlơi kiăng lĕ, ta ƀu gưt tŭ tơlơi tơnap, ƀun rin ôh, ta khom hrưn đĭ baih lah. Ta hrăm ba mơ̆ng rơnuk dŏ ngă tơhan, khom ngă bruă tơpă khŏp, gir run hrưn đĭ mă ta pô, či ngă bruă, pơyơr pran jua kơ bruă, pơđĭ kyar sang anŏ, djru bruă mơnuih mơnam”.

Ăt kah hăng tơhan hơđăp ơi Hán Vinh Hà mơ̆n, lu ding kơna amăng khul tơhan hơđăp ƀơi Krông Ana ăt djă ba hăng pran jua yua mơ̆ng sa čô tơhan pioh ngă tui amăng tơlơi hơdip mơda rim hrơi. Pô akŏ pơjing đang hmua prong, hmua blôk, pô pok anih sĭ mơdrô, sang bruă pơkra ming hăng blơi boh troh đang hmua hơđong. Laih tơlơi bơwih ƀong huă sang anŏ hơđong ƀiă laih, ñu  hrŏm hăng mơnuih ƀôn sang laih anun ƀing ding kơna dŏ tơnap tap pơdjru nao rai. Rim thun, dua boh sang bruă sĭ mơdrô mơ̆ng ñu hơmâo djru ba lu sang anŏ tơnap tap, hyu čuă jơmư ding kơna tơhan hơđăp sit duăm ruă, pơ-ai buai, tha rơma. Tơhan rơka rơkač ơi Lê Đắc Đạm, dŏ ƀơi Ƀuôn Trâp, să Krông Ana ră ruai glăi bruă ngă mơ̆ng ơi Hoàng Văn Cư:

“Amăng plơi dŏ lu tơhan hơđăo ăt tơnap tap, kơƀah prăk blơi hơbâo pruai lĕ ơi Cư djru brơi čan đôč, ƀu mă kơmlai ôh. Amăng bruă mă khul bơhmutu rim thun tơhan hơđăp pơphun jơnum hrơi gru grua amăng khul, lu bruă mă rơjang drơi jăn ñu djru ba prăk kăk soh”.

Tui hăng ơi Hoàng Văn Cư, hơdôm thun blan dŏ ngă tơhan, ƀu kơnong pơtô hrăm kơ ñu thâo mă bruă bơwih ƀong huă đôč ôh, dŏ jing sa tơlơi hrăm kơ sa čô tơhan khom dŏ dong ƀong huă, thâo gơgrong ba hăng ană plơi pla, wơ̆t hăng tơlơi blah ngă rơgao pơ klôn sui thun laih.

“Sit mut ngă tơhan, ƀing gơmơi dưi pơhrăm mơ̆ng tơlơi pơmin, pran jua mă bruă, tơlơi dŏ dong ƀong huă hăng pran jua bơwih brơi kơ ană plơi pla. Tơlơi blah wang ƀudah amăng rơnuk mơak klă hai, sa čô tơhan khom hơdip tơpă, mă bruă ba gru hlâo pioh kơ ană tơčô hla tui. Mut hrŏm khul tơhan hơđăp khom pơtrut pơsur ƀing adơi ayong pơgang tơlơi suaih pral, hur har mă bruă pơdjru nao rai mă bruă amăng plơi pla”.

Khul tơhan hơđăp să Krông Ana ră anai hơmâo giăm 1000 čô ding kơna. Mơ̆ng thun 2025, Khul ƀu hơmâo ding kơna pơpă sang anŏ ƀun rin dơ̆ng tah, sa črăn lơ̆m klâo mrô ding kơna amăng khul hơmâo tơlơi hơdip mơda plai ƀiă laih. Ơi Đỗ Xuân Đản, Khua khul tơhan hơđăp să Krông Ana lăi lĕ, boh tơhnal anun dưi hơmâo yua ba boh yom phun hrăm hăng hla tui tơlơi Wa pơtô, pơmut amăng bruă mă, tơlơi dŏ dong ƀong huă rim hrơi, pơdjru nao rai bơwih ƀong huă pơđĭ kyar, pơhrŏ ƀun rin, man pơdong plơi pla phrâo hăng đing nao djru ba kơ ƀing ding kơna amăng khul. Lu bruă ngă ƀu kơnong djru ngă bang bơngač tơlơi pơčrâo mrô 05 mơ̆ng Ding jum kơđi čar đôč ôh, dŏ pơdah rai tơlơi gơgrong ba, bruă ngă mơ̆ng khul tơhan hơđăp amăng rơnuk lŏn ia rơngai, kiăng ngă bơngač rup rap tơhan rơnuk wa Hô, djru ngă pơblih phrâo kual plơi pla.

“Ƀing khua mua, ding kơna amăng khul tơhan hơđăp să Krông Ana hur har ngă bruă kiăng găn rơgao hĭ tơlơi tơnap tap, hrưn đĭ amăng tơlơi hơdip mơda, lơ̆m tơbiă mơ̆ng tơhan ăt djă pioh hăng pơđĭ tui gru grua tơhan rơnuk Wa Hô, jing ƀing ba gru hlâo amăng djop bruă mă man pơdong plơi pla phrâo kah hăng pơyơr lŏn sang đang hmua, jak iâu ngă bruă djru tơlơi khăp pap, hur har amăng bruă pơtrut bruă ngă djru nao amăng kual plơi pla”.

Tơlơi blah wang kơdŭn pơ klôn sui thun laih, hơdôm blah đang hmua hăng đang war, lan sang hrơi anai pơblih phrâo pơhrua kơ anih tơdron blah răm ƀăm đưm hlâo, pran jua pơdjru hrŏm, kah pơpha nao rai amăng bruă mă tơlơi pơmin pram jua hiam anun ăt do hnơ̆ng đôč. Anun lĕ hơdră mơ̆ ƀing tơhan hơđăp ƀơi Krông Ana ăt hrăm hăng hla tui Wa amăng hơdôm bruă mă rim hrơi mơtam.