Jơnum min mơnuih ƀon sang tơring čar Dak Lak rơkâo bruă dưm dăp anih anom pơtô pơjuăt kiăng anăp nao pơhrŏ giăm 50% mrô sang hră, lu ƀiă pơhmu mrô aset hloh gơnong glông jao brơi. Anai lĕ boh tơhnal hơmâo lăi pơtong amăng jơnum hăng hơdôm gơnong bruă, sang bruă hăng 102 boh să, phương kơ bruă dưm dăp sang hră, lơm Dak Lak lĕ sa amăng 15 boh tơring čar hơmâo gơnong glông ruah ngă hlâo. Ră anai đơ đam tơring čar hơmâo 1.238 anih anom pơtô pơjuăt mơnuih ƀôn sang pơdong. Hơdră bruă mơng ƀon lan lĕ pơhrŏ 462 boh sang hră, lơm anun gơnong bruă pơtô pơjuăt rơkâo pơhrŏ 690 boh sang hră, laih dong pơjing dong lu sang hră pơlir djop gưl. Kơ-iăng Khua Jơnum min mơnuih ƀon sang tơring čar Dak Lak Nguyễn Thiên Văn rơkâo bruă dưm dăp kiăng ngă tui klă, lăp djơ̆ tơlơi gal amăng rĭm boh ƀon lan; kơnong kơ hrŏ ƀiă anih wai lăng, ƀu pơplih anih pơtô hrăm kơ ƀing čơđai.

Jơnum min mơnuih ƀôn sang tơring čar Khánh Hòa, phrâo tŭ ư hrŏm hăng jơlan hơdră dăp glăi sang bruă, anih pơtô hrăm ƀơi kual plơi pla yua kơnuk kơna ngă pô, prăp lui thun hrăm phrâo 2026-207. Tui hăng kơčăo bruă, đơ đam tơring čar hrŏ hĭ 248 boh sang hră, dưm dưm 34% mrô sang hră hlăk hơmâo ră anai, kiăng ngă djơ̆ anŏ pơhrŏ hĭ khua sang hră boh ƀiă ñu 30% tui tơlơi git gai mơ̆ng Kơnuk kơna. Ră anai, Khánh Hòa hơmâo 728 boh sang hră yua kơnuk kơna wai lăng hăng 26.500 čô khua mua, nai pơtô hrăm hră. Tơdơi kơ pơmut glăi, djop sang hră čơƀeng amăng plơi pla ăt mă bruă đôč, kiăng hơmâo djop anih pơtô hrăm bơwih brơi kơ thun hrăm phrâo hơđong; kơnong sang hră đôm lăm kơnuk kơna čem rông čơđai sang hră djuai ƀiă aka ƀu dăp glăi ôh. Hăng ƀing khua mua git gai wai lăng rơbêh, tơring čar amra kah pơpha brơi hyu mă bruă amăng djop sang bruă gêh găl ƀudah pơdơi ngă khua, glăi ngă nai pơtô đôč đač; hơdôm čô hơmâo tơlơi kiăng rơkâo pơdơi lĕ amra pơsir brơi pơdơi djơ̆ tơlơi phiăn pơkă.