Jơnum min mơnuih ƀon sang tơring čar Dak Lak phrâo gum hrŏm hăng anom bruă tơhan pôlih wai lăng kơ bruă pơhlôm hơđong mơnuih mơnam (Ding jum kông ang), kông ang tơring čar hăng kông ti GeneViet pơphun jơlan hơdră mă ADN kơ mơnuih amăng sang anŏ tơhan djai pơsăn drơi aka ƀu thâo anăn krăn pô. Anai ƀu djơ̆ kơnong lĕ bruă pioh hơdor tơngia ƀrô hrơi hơdor glăi kơnôl 27/7 đôč ôh mơ̆ ăt bruă pok pơhai tong ten “Hơdră bruă 500 hrơi mlăm pơtrut tañ bruă hyu ĕp, klơi pơƀut hăng ĕp brơi anăn krăn pô tơlang tơleh tơhan djai pơsăn drơi” glăk hơmâo pok pơhai amăng đơ đam dêh čar.

Tui jŭ yap, đơ đam tơring čar Dak Lak ră anai hơmâo 15.222 boh pơsat. Lơm hơdôm anom bruă bơdjơ̆ nao hơmâo hơduah ĕp, hyu mă tơlơi pơhing kơ 10.235 čô tơhan djai pơsăn drơi; phrâo hơmâo 5.911 per tơlang hơmâo pơsit brơi anăn, bơ dŏ glăi 4.324 per tơlang tơleh aka ƀu hơmâo krăn ôh. Sit biă ñu, hơmâo 2.706 per tơlang tơhan ăt hơmâo mơnuih amăng sang anŏ djop tơlơi gal kiăng mă ADN, hăng abih tih 3.865 čô. Tal pok pơhai anai hăng hơnong pơkă mă 70% mrô ADN djop anŏ gal kiăng dưm pioh amăng ADN dêh čar, djru brơi bruă pơčrang lăng, pơsit brơi anăn krăn pô tơlang tơleh tơhan djai pơsăn drơi pơ anăp anai.

Kiăng bruă mă ADN pơphun ha amăng plĕ, djơ̆ tơlơi pơkă hăng pơhlôm brơi djơ̆ hloh, kông ang tơring čar Dak Lak hơmâo pơčlah jing 12 anih mă amăng đơ đam tơring čar, pơkiăo nao mơnuih mă bruă mơng gưl tơring čar truh pơ să nao črâo ba, djru brơi mơnuih ƀôn sang pơgiong bruă ngă hră pơ-ar, pơsit tong ten hră pơ-ar hăng mă đet asar. Đại tá Võ Hùng Tường, Khua anom bruă tơhan pôlih wai lăng bruă pơhlôm hơđong mơnuih mơnam, kông ang tơring čar Dak Lak brơi thâo: “Ƀing gơmơi gum hrŏm kjăp hăng hơdôm anom bruă bơdjơ̆ nao amăng Anom wai lăng bruă ngă hră pơ-ar, pơpha mơnuih mă bruă ƀơi 12 anih mă đet asar hăng pơphun mă mơng kơnôl 23 truh kơnôl 26/7/2026. Rĭm grup lêng kơ hơmâo mơnuih apăn bruă djru brơi bruă tŭ yua kah hăng pơsit tong tơlơi pơhing mơng mơnuih amăng sang anŏ tơhan kiăng pơhlôm mă brơi djơ̆”.

Nao pơ anih mă đet asar ƀơi phương Ea Kao, yă H’Blak Niê djă ba tơlơi čang rơmang sui laih mơng sang anŏ. Anong ñu lĕ tơhan djai pơsăn drơi samơ̆ sui thun aka ƀu thâo anih ñu blah wang, anih ñu djai ƀudah pơsat dor. Hăng sang anŏ ñu, bruă mă ADN ƀu djơ̆ kơnong kiăng lăi pơthâo đôč ôh ăt lĕ tơlơi čang rơmang kiăng tô glăi pran khăp pap rơngiă hĭ mơng rơnuk blah wang. “Ping gah hăng Kơnuk kơna mă A DN kiăng ĕp mơnuih amăng sang anŏ tơhan djai pơsăn drơi, sang anŏ hok mơ-ak biă, anai lĕ tơlơi čang rơmang kiăng ƀing gơmơi dưi ĕp ƀuh anong gơmơi”.

Tơlơi yôm mơng jơlan hơdră tal anai ƀu djơ̆ kơnong dŏ ƀơi boh thâo phrâo đôč ôh ăt jing tơlơi yôm djru khăp pap. Rĭm ADN hơmâo djă pioh hrơi anai, him lăng aka ƀu dưi ĕp ƀuh mơtăm ôh, samơ̆ amra jing anŏ pơlir yôm phăn amăng anih djă pioh dêh čar, amra pơlăng nao rai lơm hơmâo dong tơlơi pơhing kơ tơlang tơleh tơhan hơmâo ĕp pơƀut glăi. Anai ăt lĕ bruă yua boh thâo phrâo pơmut hrŏm hăng gru hơdip “Mơñum ia hơdor kơ pô klơi”, djru brơi bruă hơdor tơngia huăi dŏ glăi amăng hơdôm hrơi pioh hơdor đôč ôh ăt tŏ tui hăng hơdôm bruă sit nik. Yua tơdơi kơ rơbêh 50 thun rơnuk rơnua, tơlơi mơ̆ hơdôm boh sang anŏ dŏ tơguăn hloh ăt lĕ dưi ĕp ƀuh tơlang tơleh mơnuih amăng sang anŏ thâo anăn krăn pô, dưi ba glăi pơ plơi pla. Hăng rĭm ADN hơmâo mă jing sa tơlơi čang rơmang kiăng dưi ĕp ƀuh glăi mơnuih amăng sang anŏ tơdơi rơnuk blah wang./.