Kông ñơn Đoàn Văn Tâm, mơnuih phrâo glăi mơ̆ng ƀôn prong Hồ Chí Minh nao mă bruă pơ Kual sang măi pơkra gơnam Becamex Bình Định (tơring čar Gia Lai) brơi thâo, čang rơmang dưi glăi pơ plơi pla ngă bruă hăng hơđong tơlơi hơdip tơdơi kơ hơdôm thun đuăi mơ̆ng plơi pla nao mă bruă pơ ataih: “Hlâo adih, kâo nao mă bruă pơ phường Bình Tân, Sài Gòn (ƀôn prong Hồ Chí Minh), ngă bruă giăm 10 thun laih. Prăk blan, prăk apah pơ anun sa blan 13 klăk, samơ̆ kâo ăt glăi mă bruă pơ anai mơn kiăng jê̆ sang anŏ ƀiă. Prăk blan hăng prăk ngă bruă rơgao mông, nô̆p prăk pơhlôm nua, jing dŏ glăi 8 klăk rim blan. Prăk blan aset ta yua aset, klă hloh mơn kơ nao mă bruă pơ Sài Gòn”.

Tơdơi kơ pơmut hrŏm, hơdôm boh tơring čar ƀơi Dap Kơdư hơmâo dong anih či đĭ kyar, pơhưč lu kơčăo bruă pơdong sang măi pơkra gơnam, anih čuă ngui, tơdrun kom păn, hăng plơi prong, hăng prăk tuh pơ alin rơbêh kơ 470.000 klai, rơwang thun 2026-2030. Kơnong ƀơi Dak Lăk hơmâo năng ai 170.000 klai. Ơi Huỳnh Lữ Tân, Ding kơna khul apăn bruă phun Ping gah Dak Lăk, Khua khul wai lăng anih bơwih ƀong Phú Yên brơi thâo, kơčăo bruă phrâo kiăng truh kơ 60.000 čô mơnuih mă bruă. Anai jing tơlơi gêh găl hơmâo bruă mă - prăk blan kơ mơnuih ƀôn sang, samơ̆ ăt jing tơlơi lông kơ mrô mơnuih wơ̆t hăng anŏ rơguăt bruă mơ̆ng mơnuih mă bruă mơn: “Hăng rơnoh prăk tuh pơ alin prong man pơdong hơdôm sang măi, anih čơkă tuai hyu ngui, hăng hơdôm kơčăo bruă kơnang kơ anih anom amăng kual sang măi, kual bơwih ƀong, kâo pơmin amra pơhưč lu mơnuih mă bruă. Kơnong ƀơi Kual pơkra gơnam Hòa Phát hăng hơdôm kơčăo bruă pơkŏn mơ̆ng anai truh pơ thun 2030 dưi djru ba năng ai 40.000 čô mơnuih mă bruă amăng kual Ngŏ tơring čar Dak Lăk”.

Ơi Nguyễn Quang Thuân, Kơ-iăng khua gơnong bruă čar tơring čar Dak Lăk pơsit, ăt kar hăng hơdôm boh tơring čar Dap Kơdư mơn, hơmâo anŏ phara gah bruă bơwih ƀong ngă hmua kơnang kơ bơyan, sang măi pơkra gơnam - man pơdong dŏ kơƀah; tơlơi gêh găl či hrăm, ngă bruă prong hloh hăng hơdôm tơlơi hiam klă či tŭ mă aset biă, Dak Lăk tơnap biă či pơhưč hăng bong glăi mơnuih mă bruă. Ơi Nguyễn Quang Thuân lăi mơn, tơdah ƀu hơmâo hơdră djru djơ̆ lăp, mơnuih mă bruă ăt jing anŏ ngă tơnap či đĭ kyar mơ̆ng tơring čar mơn: “Ră anai, hơdôm anom bơwih ƀong pơ tơring čar Dak Lăk tla prăk kơ mơnuih mă bruă aset biă pơhmu hăng tơring pơkŏn. Yua dah ƀing ta lĕ kual 3, kual 4. Tap năng lu mơnuih mă bruă nao hrăm bruă pơ ƀôn prong Hồ Chí Minh ƀudah Đồng Nai, gơñu hơmâo apah prăk mơ̆ng 8,5 klăk rim blan ƀudah lu hloh hơmâo mơn, samơ̆ lơ̆m glăi pơ Dak Lăk gơñu hơmâo apah 6 klăk prăk đôč sa blan. Giong anun dong, anih mă bruă ƀu mơak tui hăng sang bruă mơdrô prong lơi, anai jing bruă tơnap mơn, anun yơh hơdôm sang bruă bơwih ƀong ƀơi Dak Lăk kiăng pơplih kah mơ̆ng pơhưč, bong glăi mơnuih mă bruă”.

Ngă bruă hăng Anom bruă čar kơ mơnuih mă bruă amăng rơnuk đĭ kyar phrâo, Khua ping gah, Khua mir sir ơi Tô Lâm črâo rơđah: Bruă pơhlom anŏ klă mơnuih mă bruă leng kơ nao hrŏm hăng anŏ klă, jơnap ƀiă kơ mơnuih mă bruă; pơđĭ tui mrô mơnuih mă bruă ƀu kơnong jing jơlan djru mă bruă đôč ôh ăt pơlir hăng hơdră djru djuai ania, đĭ kyar ană mơnuih hăng kjăp tui tơlơi kơnang mơ̆ng mơnuih ƀôn sang.

Mah ƀu lăi nao bruă hơjăn hơdôm boh tơring čar Dap Kơdư ôh, samơ̆ jơlan gah git gai mơ̆ng Khua ping gah, Khua mir sir ƀơi mông ngă bruă anai, lăi djơ̆ phun tơhnal mơ̆ng Dap Kơdư amăng jơlan hơdră pơđĭ tui mơnuih mă bruă, anun lĕ “khŏm pơmut hrŏm bơwih ƀong huă sit nik mơ̆ng rim kual rim djuai ania, rim khul mơnuih tơpuôl”, “pơlir hrŏm djă pioh gru grua, pơgang ba anih hơdip ayuh hyiăng, bong glai, bong ala lŏn, bong ia yua, bong kjăp guai dêh čar”. Khua ping gah, Khua mir sir ơi Tô Lâm pơsit jơlan ngă bruă tong ten biă kơ tơlơi gơgrong mơ̆ng Kơnuk kơna hăng hơdôm bruă khŏm kiăng ngă: “Kơnuk kơna djru brơi djŏp tơlơi gêh găl bruă čan prăk, tơlơi pơhing, pơtô ba tơlơi phiăn, sang bruă mơdrô, anom ngă ƀong hrŏm, anih pơkra gơnam, pơtruh blơi gơnam tam, pơtô brơi boh thâo ia rơgơi ngă bruă, pơjing anăn gơnam, hơnong pơkă anŏ klă, tơring čar pơtruh brơi kiăng hơmâo bruă mă rơnuk rơnua, plai ƀiă đuăi hyu pơ anai pơ adih, mă bruă ƀu hơđong, arăng plư pleč. Pơđĭ tui bruă mă amăng kual mơnuih djuai ania ƀiă nao hrŏm hăng djă pioh gru grua hiam, pơgang ayuh hyiăng glai klô, bong glai, bong ala lŏn, bong ia yua, bong guai dêh čar, ƀu djơ̆ kơnong kơ hơmâo bruă mă đôč ôh ăt khŏm lăp djơ̆ hăng lŏn tơnah, gru grua, tơlơi phiăn, bruă ngă hmua pla pơjing, djru neh met wa hơđong tơlơi hơdip, hrŏ trun ƀun rin hơđong, khin mut hrŏm, gum pơgôp kơ tơlơi đĭ kyar hrŏm mơ̆ng lŏn ia”.

Sit nik mơ̆ng đang hmua truh pơ hơdôm anih man pơdong, hơdôm kơčăo bruă prong mơ̆ng hơdôm boh tơring čar Dap Kơdư, truh kơ tơlơi git gai, črâo brơi jơlan gah ngă bruă mơ̆ng ƀing khua Ping gah, Kơnuk kơna leng kơ brơi ƀuh, pơtô rơguăt mơnuih mă bruă jing tơlơi kiăng ƀơi anăp, ăt jing prăp rơmet kơ bruă pơhno sui thun. Mơnuih mă bruă djŏp, kjăp bruă jing tơlơi akŏ phun kiăng hơdôm kơčăo bruă tŭ yua, dưi đĭ kyar 2 mrô, laih dong ăt pơtrut akŏ pơdong sa kual Dap Kơdư mơtah, gru grua hiam, sa kual pơgang kjăp mơ̆ng lŏn ia.

Laih anun kiăng dưi ngă, hơdôm boh tơring ƀơi Dap Kơdư ƀu kơnong ngă hơdră djru pơdong anih anom, djru bruă čan prăk, tơlơi pơhing, pơtô pơjuăt kah hăng Khua ping gah, Khua mir sir ba tơbiă, ăt khŏm khut khăt pơsir hĭ anŏ ƀu hơđong rơnoh đĭ kyar kah hăng ră anai; pơhlom bruă mă - prăk blan hăng tơlơi hơdip hơđong kơ mơnuih mă bruă.

Link tơlơi čih mrô 1: https://vov4.vov.vn/jarai/brua-monuih-nga-hmua-nha-nong/hodom-toloi-cih-honong-poka-podi-kyar-dap-kodu-hang-toloi-long-ko-monuih-ma-brua-toloi-cih-mro-1-kobah-monuih-ma-brua-mong-hodom-ring-brua-man-podong-truh-po-dang-hmua-wot-boi-sang-mai-523224.vov4