Ƀơi mông bưp, Khua ding jum pơtom hiăp ơi Lê Hoài Trung pơsit, Việt Nam lăng čar Mi jing sa boh dêh čar ngă gŏp yom biă mă, čang rơmang hrŏm hăng čar Mi ba tơlơi rô nao rai jai dlăm, tŭ yua, sit nik hăng hlom bom, lăp djơ̆ hăng tơlơi kiăng, tơlơi dưi mơ̆ng mơnuih ƀôn sang dua bơnah, gir gum pơgôp kơ tơlơi rơngai, hơđong kjăp, ngă hrŏm hăng đĭ kyar amăng kual wơ̆t hăng ƀơi rŏng lŏn.

Ƀơi mông bưp, dua bơnah tŭ ư ngă hrŏm hăng pơsir hĭ tơlơi răm ƀăm mơ̆ng rơnuk blah ngă đưm, ngă hơdjă abih jrao dioxin, hyu ĕp, hrip boh ƀom, min, djru ba mơnuih rơwen rơwô jô găng, hyu ĕp tơhan Mi rơngiă amăng rơnuk blah wang, ăt kah hăng hyu ĕp, klơi rŭ hăng pơsit anăn krăn pô tơhan djai pơsăn drơi Việt Nam. Khua ding jum ơi Lê Hoài Trung kah pơpha, pơthâo brơi tơlơi gir run mơ̆ng Ping gah hăng Kơnuk kơna Việt Nam amăng bruă pơtrut hyu ĕp, klơi rŭ hăng pơsit anăn tơhan djai pơsăn drơi mơ̆ng Việt Nam, laih dong bơni kơ tơlơi gum pơgôp prong kơ hră pơ-ar, tơlơi pơhing, boh thâo pơčrang ADN mơ̆ng čar Mi laih anun rơkâo gah čar Mi hơmâo ngă na nao, pok prong ngă hrŏm hăng pioh tơlơi djru lăp djơ̆ gah bruă anai./.