Pơ ala kơ ping gah, khua mua tơhan kual 7, Thiếu tướng, ơi Trần Vinh Ngọc, Kơ-iăng khua ping gah anom bruă tơhan kual 7 lăi pơthâo tơlơi pơhing kơ ƀing khua mua hơđăp thâo ƀơi rŏng lŏn tơnah, amăng dêh čar ta hăng amăng kual;boh tơhnal dưi ngă amăng bruă ling tơhan, pơhlôm pơgang dêh čar, akŏ pơdong ping gah hăng khul ling tơhan kual 7 amăng thun 2024, laih anun hơdôm bruă mă phun amăng thun 2025.

Khua mua git gai tơhan kual 7 čang rơmang, pơ anăp anai, ƀing khua mua pơdơi abih thun bruă laih ăt đing ba, djru pơgôp hrŏm tơlơi pơmin, pran jua, bruă mă hiam klă pioh akŏ pơdong bruă pơgang rơnuk rơnua dêh čar hrŏm hăng abih bang mơnuih ƀôn sang, akŏ pơjing tơdron blah tong ten kơjăp hloh amăng pran jua ană plơi, akŏ pơdong ling tơhan kơtang, kơjăp hlom bom, djru ngă giong bruă jao gah ling tơhan, man pơdong hăng wai pơgang lŏn ia.