Hơdôm hrơi anai, ƀơi djŏp glông jơlan ƀơi să Đăk Ngọk, tơring glông Đăk Hà, tơring čar Kon Tum lêng kơ djrông hla hru mriah. Hlâo kơ hrơi ƀong Tê̆t ngă yang thun phrâo Ất Tỵ 2025, Ping gah să Đăk Ngọk hơmâo pơphun truh kih jơnum ruah khua tal 3, rơwang thun 2025-2030. Anai jing bruă jơnum kơđi čar yôm biă, ƀu kơnong mơ̆ng 239 čô mơnuih ping gah đôč ôh mơ̆ ăt jing tơlơi đăo kơnang, tơlơi čang rơmang mơ̆ng giăm 5.000 čô mơnuih amăng să. Ơi Lê Văn Y, plơi Đăk Tin lăi: “Thun 2013 lơ̆m phrâo akŏ pơdong să Đăk Ngọk neh met wa tơnap biă mă, jơlan nao rai sat, plung kơdư, glut biă mă, bơbeč kơ tơlơi hơdip mơda bơwih ƀong huă mơ̆ng neh met. Amăng 10 thun akŏ pơdong hăng đĭ kyar hăng grup khua mua git gai djơ̆ hrŏm, gum pơgôp, să Đăk Ngọk ră anai đĭ kyar kơtang biă. Ră anai să hơmâo ngă giong 19/19 rơnoh pơkă plơi pla phrâo laih anun tơlơi hơdip neh met wa dơnap biă”.

Amăng rơwang bruă phrâo rơgao, 12 grup ping gah hăng 239 čô mơnuih ping gah mơ̆ng să Đăk Ngọk lêng jing hla gru dêh čar nao hlâo pơđĭ kyar bơwih ƀong huă - mơnuih mơnam pơđĭ tui tơlơi hơdip mơnuih ƀôn sang. Truh ră anai, 4/7 boh plơi mơ̆ng să hơmâo tŭ yap plơi pla phrâo ngă gru, 2 boh plơi hơmâo tŭ yap plơi pla phrâo kual mơnuih ƀôn sang djuai ƀiă. Abih bang să ră anai dŏ hơmâo 8 boh sang anŏ rin đôč. Ơi A Xen, djuai ania Sêdang, plơi Đăk Kđem brơi thâo:“Hlâo adih plơi tơnap biă mă, mơ̆ng 2 thun hăng anai jing plơi pla plih tui laih, pla phun pla rông hlô tui hơdră phrâo. Neh met wa gir pla pơdai hăng pla kơphê đôč yơh lu. Ăt yua hơmâo tơlơi lăng ba mơ̆ng Ping gah, gong gai mơn, anun jing plơi pla ră anai hrưn đĭ plai laih tơnap”.

Rơwang bruă rơgao, amăng 26 rơnoh pơkă să Đăk Ngọk ngă giong rơnoh pơkă yôm hmư̆ hing kah hăng prăk pơhrui yap tui akŏ mơnuih hơmâo rơbêh 70 klăk prăk, akŏ pơdong să plơi pla phrâo tui hơnong phrâo hloh; mrô sang anŏ run trun tañ. Ơi Phan Tiến Dũng, Khua ping gah ngă rah Khua jơnum min djŏp djuai ania mơnuih mơnam plơi Đăk Bình, lăi pơthâo boh thâo akŏ pơdong plơi pla phrâo ngă gru:“Grup ping gah git gai tui tơlơi pơtrun rim blan. Pơtô pơblang neh met wa ngă tui djŏp hơnong pơkă. 19 hơnong pơkă ră anai dưi ngă laih anun gơmơi jing boh plơi pla phrâo ngă gru ba jơlan amăng thun 2024 hơmâo Jơnum min mơnuih ƀôn sang tơring glông pơsit. Mơ̆ng sa boh plơi ngă hmua, amăng rơwang bruă blung a lĕ 55 klăk prăk đôč lơ̆m sa čô mơnuih, truh abih rơwang bruă hơmâo giăm 80 klăk prăk lơ̆m sa čô. Hăng tơlơi gir mơ̆ng abih anom bruă kơđi čar ba glăi tơlơi hơdip yâo mơ-ak hloh kơ mơnuih ƀôn sang”.

Pơplih tơlơi pơmin amăng bruă ngă hmua pơkra gơnam mơ̆ng mơnuih ƀôn sang jing pơplih phrâo tơlơi hơdip kơ plơi pla Đăk Ngọk. Să hơmâo akŏ pơdong 6 grup ngă hrŏm hăng 2 anom ngă ƀong hrŏm. Bruă đĭ kyar bơwih ƀong huă ngă hrŏm djru pơđĭ tui rơnoh ngă bruă, nua gơnam pơmă hloh mơ̆ng 450 ha pơdai, rơbêh 1.600 ha kơphê hrŏm hăng hơdôm rơtuh ha boh troh, phun jrao. Hăng tơlơi gir kơtưn hloh, pơplih hlih amăng bruă bơwih ƀong huă mơnuih mơnam, Jơnum ruah khua ping gah să Đăk Ngọk rơwang thun 2025-2030 pơsit, akŏ pơdong să plơi pla phrâo ngă gru, prăk pơhrui yap tui akŏ mơnuih hơmâo rơbêh 78 klăk prăk/thun...Yă Y Sương, Kơ-iăng khua ping gah, Khua Jơnum min mơnuih ƀôn sang să Đăk Ngọk brơi thâo:“Ping gah git gai hơdôm anom bruă, khul grup hăng jơlan hơdră ngă bruă tong ten pioh ngă rim thun hăng rim rơwang bruă. Iâu pơthưr abih bang mơnuih amăng plơi pla gum akŏ pơdong plơi pla phrâo ngă gru. Hrŏm hăng anun pơđĭ tui tơlơi gơgrong bruă nao hlâo mơ̆ng ƀing khua, mơnuih pơphô bruă. Pơƀut ngă djŏp bruă hơmâo jao, hơdră pơsir či đĭ kyar bơwih ƀong huă - mơnuih mơnam, rơnuk rơnua lŏn ia hăng akŏ pơdong anom bruă kơđi čar amăng să. Lăng ba tơlơi hơdip bơwih ƀong huă, tơlơi đăo khŏm klă, hơđong kjăp”.

Tơlơi pơplih kơtang mơ̆ng să Đăk Ngọk, tơring glông Đăk Hà, tơring čar Kon Tum amăng hơdôm thun rơgao pơsit brơi rơđah tơlơi git gai djơ̆ lăp mơ̆ng Ping gah hăng pran jua gum pơgôp mơ̆ng mơnuih ƀôn sang. Kiăo tui tơlơi dưi ngă, Đăk Ngọk mut amăng thun phrâo 2025 kjăp tơkai hloh, kiăng dưi ngă truh kih bruă akŏ pơdong plơi pla pơdrong sah, ngă gru./.