Hơdôm hrơi akŏ bơyan phang Ất Tỵ, sang măi mơ̆ng kông ty mơnuih ƀôn sang ngă pô tơčoh eng ao Able Joy hăng 4.500 čô mơnuih mă bruă ƀơi anih tuh pơkra sa ƀut Hòa Phú, Dak Lak hơmâo mă bruă đut tơhnal pơkă. Ơi Trần Trí Vĩ, Khua kông ty, brơi thâo, sang bruă gơñu him lăng iâu pơmut dơ̆ng 1000 čô mơnuih mă bruă kiăng djop rơnoh kiăng 7 klăk per eng ao sĭ mơdrô hơmâo kĭ hră pơkôl:

“Truh mông anai, hră pơkôl blơi gơnam mơ̆ng kông ty thun 2025 djop abih laih. Ăt čang rơmang Dak Lak dŏ hơmâo anih dơ̆ng kiăng pok prong ngă sang pơkra ming gơnam sĭ mơdrô. Ƀuh glăi Dak Lak kơ anŏ tŭ yua hăng mơnuih mă bruă apah lĕ ăt dŏ lu”.

Sa tơlơi bơkơnăl klă pơkŏn brơi ƀuh, tơring čar Dak Lak hơmâo sĭ gơnam juă nua tŭ yua laih lŏn sang ia jrao prong hơđăp mrô 02jơlan Mai Hắc Đế, pơhrui glăi 568 klai prăk. Lŏn sang ia jrao anai laih čuk pơdăo amra man pơdong jing anih anom sĭ mơdrô prong phrâo hăng ruăi sang dlông tal ngă hiam phrâo hloh, rơnoh prăk tuh pơ alin amăng thun 2025 truh kơ 1.300 klai.  Anai ƀu kơnong anŏ gêh găl pơtrut bơwih ƀong huă pơhrui prăk duh jia đôč ôh, dŏ pơtrut bruă man pơdong sang dŏ, čuk pơkra jơlan glông nao rai phrâo hiam tŭ yua ba glăi tơlơi hơdip mơda mơak hloh kơ plơi prong Ƀuôn Ma Thuột. Ơi Bùi Văn Yên, Khua Gơnong bruă Prăk kăk tơring čar Dak Lak lăi:

“Pơphun bruă mă hơmâo rơnoh prăk pơhrui glăi anai mơak biă mă, ngă atur kơ ƀing ta pơđĭ kyar bruă duh jia pơhrui prăk kăk, biă mă ñu prăk duh jia yua lŏn amăng thun 2025. Ƀuh rơđah sang bruă tuh pơ alin lĕ sa boh sang bruă sĭ mơdrô prong, dưi ngă hơmâo pơphun tơgŭ mă bruă mơtam. Amăng 3 thun pơ anăp kơčăo bruă amra ngă giong, biă mă ñu amăng thun anai rơnoh prăk tuh pơ alin prong, ñu amra djru hrŏm pơtrut bơwih ƀong huă kơ tơring čar”.

Mah hơmâo lu tơhnal brơi ƀuh anŏ hiam klă, samơ̆ kiăng dưi tŭ mă boh tơhnal kah hăng anun truh 8%, tơring čar Dak Lak khom tañ pơsir hĭ anŏ gun amăng bruă wai lăng mơ̆ng kơnuk kơna. Blung hlâo lĕ, pơkă glăi bruă pơkă hơnơ̆ng, akŏ bruă mă yua lŏn tơnah, tañ pơkă hơnơ̆ng gưl tơring čar tui hăng rơnoh pơsit mơ̆ng dêh čar; pơsir hĭ anŏ gun pơdjơ̆ nao bruă git gai wai lăng, mă yua lŏn hơmâo pô mơ̆ng hơdôm plah anom bruă. Hrŏm hăng anun, pơtrut tañ mă yua prăk tuh pơ alin kơ bruă čar.

Tui hăng ơi Nguyễn Hoài Dương, Khua Gơnong bruă Ngă hmua hăng pơđĭ kyar plơi pla tơring čar lăi brơi tañ pơblih hĭ hơdră ngă hră pơar amăng kơnuk kơna:

“Bruă kiăng pơhưč tuh pơ alin, kâo ƀuh kiăng biă mă, ră anai ƀing ta khom ngă tum teč hloh rơđah rơđong, wơ̆t amăng bruă ngă hmua, pơkra ming hai ƀing ta lui hĭ lu črăn laih anŏ gêh găl mơ̆ng ƀing sĭ mơdrô tuh pơ alin rai pơ anai. Gơñu lăi, bruă ngă hră pơar ƀơi Dak Lak dŏ tơnap đơi. Ƀing ta  khom jŭ yap glăi tañ pơtong rơđah ƀu kơnong Gơnong bruă Man pơphô hăng tuh pơ alin đôč ôh, dŏ jing tơlơi glăm ba mơ̆ng lu gơnong bruă, tơring glông ăt khom ngă bruă hơgĕt thâo kiăng pơhưč tuh pơ alin”.

Ơi Phạm Ngọc Nghị, Khua Jơnum min mơnuih ƀôn sang tơring čar Dak Lak brơi thâo, kiăng dưi ngă tơhnal pơkă anun, rơnoh pơđĭ kyar truh 8%, tơring čar khom pok pơhai sa amăng plĕ laih anun khut khăt hloh. Blung hlâo, pơblih hơdră ngă hră pơar khom đing nao hlâo hloh. Bruă čuk pơkra jơlan man pơdong atur bruă sa anŏ kiăng phun mơ̆n.

Rơngiao kơ anun, pơtrut tuh pơ alin tui hơdră ngă hrŏm kơnuk kơna hăng mơnuih ƀôn sang (PPP) jing hơdră yom hloh, kiăng pơhrui ngăn rơnoh amăng mơnuih ƀôn sang tuh pơ alin, pơhrŏ ƀiă anŏ či yua prăk mơ̆ng kông ngăn kơnuk kơna, laih dơ̆ng pơjing rai anŏ gêh găl pơsir bruă mă hăng pơđĭ kyar atur bruă. Hrŏm hăng anun, tơring čar pơtrut kơtang pơđĭ kyar bruă pơkra ming gơnam sĭ mơdrô boh troh đang hmua, tuh tia pơkra ming djru ba, kiăng pơđĭ tui rơnoh sĭ mơdrô kơ bruă đang hmua, pơjing pran kơtang pơtrut pơđĭ kyar hơđong kơjăp. Laih dơ̆ng, pơđĭ kyar bruă bơwih bơwăng kah hăng čơkă tuai hyu ngui, bruă prăk kăk....kiăng pơjing rai lu atur tơlơi bơwih ƀong huă. Ơi Phạm Ngọc Nghị lăi:

“Pơtum git gai ngă bơkơnar bruă pơhrui prăk hăng tuh pơplai kông ngăn kơnuk kơna, prăp lui hmar ƀiă hmao kru pơsir tŭ yua hơnơ̆ng pơkă kơ tơlơi bơwih ƀong huă. Pơtrut tañ bruă mă yua prăk kơnuk kơna laih anun tŭ mă prăk tuh pơ alin mơ̆ng mơnuih ƀôn sang tuh pơ alin. Hmao kru pơsir hĭ tơlơi tơnap tap mơ̆ng sang bruă bơwih ƀong huă jing ƀing tuh pơ alin; pơtum tuh pơ alin bruă čuk pơkra jơlan, man pơdong sang bruă amăng ƀut tuh tia pơkra ming ƀơi tơring čar kiăng pơhưč lu mơnuih tuh pơ alin amăng dêh čar hăng mơ̆ng tač rơngiao hai”.

Hăng tơlơi ngă bruă khut khăt hloh laih anun hơmâo tơlơi tŭ ư hrŏm sa pran jua mơ̆ng gong gai kơnuk kơna hăng khul mơnuih ngă bruă sĭ mơdrô, Dak Lak  amra ngă tŭ yua djop tơhnal pơkă 8% amăng thun 2025. Yom hloh lĕ tơlơi anai ngă atur kơ tơlơi pơđĭ kyar kơtang hloh thun blan pơ anăp adih, kiăng kơ Dak Lak lăp hăng anăn jing anih anom phun bơwih ƀong huă ƀơi kual Dap Kơdư.