Ơ ơi pang yă dôn, gơyut gơyâo, mơnuih ƀôn sang hăng ling tơhan amăng dêh čar ta khăp ƀu-eng !

Bơyan bơnga thun phrâo Quý Mão hlăk truh laih hăng abih bang amăng dêh čar Việt Nam khăp ƀu-eng mơ̆ng ƀing ta! Amăng mông čơkă thun phrâo yôm pơphăn anai hăng pran jua hok mơak, pơ ala kơ ping gah hăng kơnuk kơna, kâo rơkâo mơ-it hiăp pơpŭ kơ abih bang ơi pang yă dôn gơyut gơyâo adơi ayong anong wa hăng ling tơhan amăng dêh čar, mơnuih ƀôn sang dêh čar Việt Nam ta dŏ pơ dêh čar tač rơngiao hăng tơlơi khăp hiam klă hloh, tơlơi tơña bla tơpă hăng pơpŭ thun phrâo hiam mơak hloh. Kâo ăt mơ-it hiăp kơ gơyut gơyâo djop kual amăng rŏng lŏn tơnah, mơnuih ƀôn sang djop dêh čar hăng tơlơi pơpŭ rơnuk rơnua, hiam klă, giăng mah, ngă hrom kiăng ƀu pơdơi ôh pơđĭ kyar na nao !

Thun Nhâm Dần 2022 phrâo rơgao hăng lu tơlơi lăp hơdor pioh-sa thun hơmâo lu tơlơi tơnap tap, lông lăng prong, dŏ kơtuă truh, bơbeč sat lu hăng tơnap tap kơ dêh čar ta laih anun wơ̆t amăng rŏng lŏn tơnah ăt hnun mơ̆n. Lơ̆m anun, abih bang amăng ping gah, mơnuih ƀôn sang, ling tơhan ta hơmâo pơdah rai pran jua khăp kơ lŏn ia, tơlơi pơmin khut khăt, mă bruă gum pơgôp prong prin, hơdeč hmar, thâo pơčeh phrâo, kơtưn ngă bruă kiăng ba glăi boh tơhnal tŭ yua hiam klă, hlom bom yua anun hơmâo lu gru tơhnal lăp kơđŏm pioh; Pơtum ngă bruă pơhlôm, pơgang klin kheng, laih anun pơtrut rŭ glăi hăng pơđĭ kyar bơwih ƀong huă mơnuih mơnam, akŏ podong bruă mă bơwih ƀong huă rơngai hơjăn lir hơbit hăng bruă gum hrom, mut phung jar kmar lu hloh, prong hloh laih anun tŭ yua; bruă kơđi čar dưi hơđong, pơgang rơnuk rơnua lŏn ia kjăp, djă bong anih dŏ hăng tơlơi mơak hlak, pioh lŏn ia dêh čar hơđong, ngă kjăp tơlơi đăo kơnang mơ̆ng mơnuih ƀôn sang hăng ping gah, kơnuk kơna hăng jơlan hơdră kơnuk kơna git gai tui jơlan hơdră mơnuih mơnam bơkơnar ngă khua pô Xã Hội Chủ Nghiã, pioh glăi lu tơlơi lăp bơni, dưi hơmâo mơnuih ƀôn sang hăng gơyut gơyâo jar kmar ăt bơni hrom mơ̆n, lăng yôm, brơi kơ ƀing ta sa tơlơi hrăm yôm biă mă. Pơ ala kơ ping gah hăng kơnuk kơna, kâo hok mơak pơpŭ bơni kơ abih bang mơnuih ƀôn sang ƀing apăn bruă kơnuk kơna hăng ling tơhan amăng dêh čar ta kơ hơdôm boh tơhnal ta dưi ngă hăng pơgôp pran jua prong prin amăng thun laih rơgao.

Yak nao amăng thun phrâo Qúy Mão-2023 lĕ thun tal klâo amăng hơdôm thun ngă tui yôm biă mă Hră pơtrun ping gah dêh čar ta tal XIII, akŏ bruă bơwih ƀong huă mơnuih mơnam 5 thun 2021-2025. Hăng tơlơi pơmin laih anun pran jua khut khăt hrưn đĭ pơđĭ kyar jai hrơi pơdrong asah, hing ang, mơak klă, abih bang ping gah, kơnuk kơna ta ăt pơtrut pran jua khăp kơ lŏn ia, gum pơgôp nao rai, găn rơgao tơlơi lông lăng, pơtrut bruă mă pơblih phrâo hlom bom; akŏ pơdong hăng pơgang kjăp lŏn ia dêh čar; djă bong pơgang tơlơi rơngai mơak, hơđong, ngă tui truh kih tơhnal pơtrun pơjing pran kơtang pơtrut lŏn ia pơđĭ kyar hmar hăng kjăp amăng hơdôm thun tŏ tui, djru hrom man pơdong lŏn ia ƀing ta khăp ƀu-eng jai hrơi pơđĭ kyar, hmư̆ hing, jai hrơi hiam klă, prong hloh.

Amăng mông hok mơak čơkă thun phrâo Qúy Mão, sa wơ̆t dơ̆ng, kâo rơkâo pơpŭ kơ abih bang mơnuih ƀôn sang, ƀing apăn bruă, rĭm sang anŏ, rĭm čô mơnuih ƀôn sang Việt Nam truh thun phrâo hơmâo lu tơlơi tơphă, hiam drơi jăn, hok mơak sang anŏ pơđĭ kyar laih anun tŭ yua!

Mơak bơyan phang phrâo, khut khăt pran jua phrâo, tơlơi kơtưn phrâo, bruă mă đĭ tui phrâo, tŭ yua phrâo. Djop sang anŏ, gŏ uă, djop mơnuih kiăng kơ hyuk hyiak mơak klă!

Pơpŭ bơni hŏ!