Hăng 30 thun tuh rơyuh amăng bruă mă, amai H’Er Niê Kdăm, pô juăt bruă gah Anom bruă djuai ania tơring glông Čư̆ Mgar, tơring čar Dak Lak lăi pơthâo, ñu lăng ƀuh hơdră gum djru kơ mơnuih apăn bruă, mă bruă čar pơdơi lơtret hlâo kơ thun pơkă tui Tơlơi pơtrun pơsit mrô 178 lĕ djơ̆ phiăn biă. Amai H’Er pơmin, ƀing hlăk ai hloh amra ngă tui hloh dong bôh thâo mơ̆ng pô hăng drơi pô ñu ăt tô̆ tui hmâo gum hơgôp lăp djơ̆ kơ plơi pla anih pô dô̆.

“Tơdơi kơ pơdơi lơtret, kâo amra pơwot glăi plơi pla. Lơm mă bruă kâo hmâo tŭ mă laih bôh thân kơ pô amra glăi hăng mơnuih ƀôn sang, tơlơi hơget mơnuih ƀôn sang ƀu thâo lĕ amra djru mơnuih ƀôn sang, pơsit jơlan gah kơ mơnuih ƀôn sang bơwih ƀong huă pơđĭ kyar. Tơdah pô dưi gum hrŏm bruă ƀơi plơi pla pô kâo amra gir run djru plơi pla”.

Tui hăng anun, Kỹ sư Nguyễn Ngọc Giao, Khua Anom bruă đang hmua hăng pơđĭ kyar ƀôn lan tơring glông Čư̆ Mgar, ăt hmâo ngă hră rơkâo pơdơi lơtret hlâo kơ hrơi pơkă mơn. Ñu pơmin, bruă ngă hơkrŭ rơbôt glông bruă mă glăk pok pơhai amăng abih bang glông bruă kơđi čar amra ba glăi bôh tŭ yua sui thun kơ mơnuih ƀôn sang hăng tơlơi pơđĭ kyar kơjăp phik. Hăng gơnong bruă đang hmua, amra djru pơđĭ kyar bruă đang hmua klă hiam, ba glăi prăk pơhrui glăi klă kơ neh wa ngă đang hmua.

“Kâo čang rơmang biă hơdôm rơnuk tô̆ tui tơdơi anai khom ngă tui pran jua gơgrong hăng bôh than mơ̆ng hơdôm rơnuk nao hlâo hmâo ngă, kiăng ngă hiưm hơpă pơđĭ dlông bôh tŭ yua, tui bruă pơkă, ba glăi bôh tơhnal amăng ngă tui bruă kơđi čar mơ̆ng Ping gah hăng Kơnuk kơna pơpha brơi”.

Yap truh kơ 10/1, tơring glông Čư̆ Mgar hmâo laih 16 čô mơnuih mă bruă čar čih hră pơ-ar rơkâo pơdơi lơtret hlâo kơ thun pơkă. Ơi Nguyễn Thiên, Kơ-iăng Khua git gai Ping gah tơring glông Čư̆ Mgar, brơi thâo, Grŭp apăn bruă Ping gah tơring glông amra pel ĕp rim mơnuih, pơhlôm tơlơi dưi djơ̆ phiăn tui pơkă amăng tơlơi phiăn. Ơi Nguyễn Thiên ăt lăi rơđah mơn:

"Kâo pơmin ƀing gơñu ăt lăng ƀuh mơn bôh than, tơlơi kiăng yua mơ̆ng bruă dưm dăp rơbô̆t glông bruă čar. Lơm mă bruă tơlơi pơmin ƀing gơñu mơ-ak biă, anun amăng bruă pơphun mơnuih apăn bruă ƀing gơñu gơgrong mă pô lĕ Grŭp pơphun wai lăng bruă mă ăt amuñ hloh mơn hăng lơm hmâo hơdră gum djru hă ăt gir run ngă gal brơi kơ ƀing gơñu dưi čơkă mă tui djơ̆ tơlơi pơkă”.

Hrŏm hăng Čư̆ Mgar, hơdôm bôh anih anom pơkon amăng tơring čar Dak Lak ăt djă pioh mơn lu mơnuih apăn bruă rơkâo pơdơi lơtret hlâo kơ thun pơkă tui pran jua Tơlơi pơtrun pơsit 18. Hmâo laih 7 čô mơnuih apăn bruă, mơnuih ping gah mơ̆ng Grŭp apăn bruă Ping gah tơring čar wai lăng, amăng anun hmâo 2 ding kơna Grŭp apăn bruă Ping gah tơring čar, sa Khua git gai Ping gah tơring glông ăt čih hră rơkâo pơdơi hlâo kơ thun pơkă mơn. Hăng sa čô Khua git gai Ping gah tơring glông blung a mơ̆ng Dak Lak rŏng rơkâo pơdơi lơtret hlâo kơ thun pơkă lơm dô̆ rơbêh kơ 6 thun dong mơ̆ng abih thun mă bruă, ơi Rahlan Vôn Ga, Khua git gai Ping gah tơring glông Mdrak lăi pơthâo:

“Kâo pơdơi lĕ kâo čang rơmang hmâo anih pioh kơ khul ăt kah hăng hơdôm anom bruă amăng bruă dưm dăp pơmut hrŏm hmâo mơnuih apăn bruă hlăk ai klă hloh kơ kâo, hur har hloh kơ kâo pioh mă bruă dong hăng tuh rơyuh pran jua djru tơring glông hăng kơ tơring čar jai hrơi jai pơđĭ kyar. Lơm kâo dưi pơdơi, dô̆ hmâo tơlơi gal, hmâo tơlơi suaih pral hăng bôh thâo pô kâo amra ĕp sa bruă mă lăp djơ̆ pioh gum hơgôp dong kơ pơđĭ kyar mơ̆ng drơi pô ăt kah hăng plơi pla hăng mơnuih mơnam”.

Ơi Nguyễn Thượng Hải, Khua Grŭp pơphun bruă Ping gah tơring čar Dak Lak brơi thâo, tui kơčăo bruă, tơring čar amra hrŏ trun mrô mơnuih mă bruă ƀiă biă mă ñu 15% amăng lăm tơdơi kơ pơmut hrŏm hăng hrŏ trun 20% mrô mơnuih mă bruă. Bruă ƀing apăn bruă, mơnuih ping gah rŏng rơkâo pơdơi lơtret hlâo kơ thun pơkă lĕ bruă ngă lăp lăng yôm biă, mơ̆ng anun djru tơring čar gêh gal amăng bruă ngă tui Akô̆ bruă dưm dăm, ngă rơbô̆t glông jơlan mă bruă:

“Hmâo lu mơnuih apăn bruă dô̆ rơbêh kơ 5 thun mă bruă ăt djop thun pơkă mơn pioh ngă bruă tô̆ tui rơwang bruă, samơ̆ ƀing gơñu ăt pơsit mơn ngă gal brơi kơ rơnuk tơdơi pioh hmâo tơhnal hrưn đĭ pơđĭ kyar pơjing tơlơi pơplih kơtang, pơplih phrâo pioh ngă brơi plơi pla, anom bruă pơđĭ kyar kơtang hloh dong ăt kah hăng ngă brơi lŏn ia ƀing ta pơplih pô”.

Bruă mơnuih apăn bruă rŏng rơkâo pơdơi lơptret hlâo kơ thun pơkă ƀơi Dak Lak glăk pơjing tơlơi gal kơ tơring čar amăng bruă dưm dăp ngă rơbô̆t glông jơlan mă bruă. Anai ăt lĕ tơlơi pơplih jao glăi bruă gơgrong, djru pơđĭ dlông bôh tơhnal mă bruă, pơjing pran pơtrut kơ Dak Lak pơđĭ kyar./.