Pơhiăp ƀơi mông jơnum kĭ pơkôl, ơi Lê Ngọc Tuấn, Khua Jơnum min mơnuih ƀôn sang tơring čar Kon Tum lăi, mah tơring čar Kon Tum hăng Stung Treng, dêh čar Kur ƀu hơmâo jơlan guai hrom ôh samơ̆ tơlơi gêh găl lŏn mơnai, glai klô, kông ngăn amăng gŭ lŏn hơmâo anŏ djơ̆ hrom, anun kiăng hơdai gum hrom pok pơhai bruă mă hơdôm bruă dua bơnah đing nao. Tui hăng pran jua mă bruă thâo hluh nao rai, đăo kơnang tơdruă. Grup khua mua mơ̆ng tơring čar Kon Tum hăng Stung Treng dêh čar Kur hơmâo kĭ pơtong glăi boh tơhnal dưi ngă bruă amăng thun blan rơgao, pơčrâo rơđah tơlơi dŏ tơnap tap, gun gan hăng tŭ ư kĭ hră hơdor pioh bruă ngă hrom.

Amăng tơlơi bơwih ƀong huă, bơwih bơwăng pơtum nao kơ bruă ba tuai hyu ngui, djru hrom gah bruă ngă hmua, sĭ mơdrô hăng tuh tia pơkra ming. Gah bruă gru grua-mơnuih mơnam ngă hrom pơtô pơjuăt, djru mơnuih ƀôn sang Việt Nam dŏ ƀơi Stung Treng. Gah bruă ia jrao pơblih nao rai tơlơi thâo thăi pơhlôm pơgang klin, pơtô hrăm bruă ia jrao. Dua bơnah tŭ ư 2 thun sa wơ̆t pơphun jơnum pơblih nao rai khua mua kĭ pơkôl ĕp glăi boh yôm phun amăng bruă mă.