Hrơi jơnum ngui “Ư-ang čơđai sang hră, čơđai gưl dlông Dak Lak” pơphun hăng lu jơlan hơdră ha amăng plĕ kah hăng bơkơtuai “Hlăk ai suaih pral”, bruă mă “Bơkơtuai bôh thâo đưm Việt Nam – India”, Bruă pơplông lăi nao “Ư-ang Việt Nam”, Bơkơtuai “Pơđĭ dlông anô̆ kơjăp bruă pơphun čơđai gưl dlông 5 klă”, Jơnum ngui “Er adôh hlăk ai”, hơdôm bruă mă gum hrŏm hăng “Čơđai gưl dlông 5 klă”, “Čơđai sang hră 3 klăk”, “Čơđai sang hră 3 pơhrăm” hăng jơlan hơdră hơdor glăi 75 thun Hrơi gru grua phiăn juăt čơđai sang hră, čơđai gưl dlông hăng Khul čơđai gưl dlông Việt Nam.

Tơlơi kiăng lăi rơđah mơ̆ng hrơi jơnum lĕ hơdôm bruă mă čơđai gưl dlông mut hrŏm jar kơmar, bơkơtuai bôh thâo Việt Nam – India. Ƀing čơđai gưl dlông dưi lăi pơthâo nao rai, lăi pơthâo bôh thâo đưm, jơnum ngui hăng hơdôm anih anom tuai čuă ngui phara ha jăn ƀơi Dak Lak hăng India, bơkơtuai hăng čơđai gưl dlông India glăk hrăm ƀơi Sang hră Y Dược Buôn Ma Thuột. Čơđai gưl dlông Lê Quốc Tuấn, hrăm gah bruă bơwih ƀong sĭ mơdrô, Sang hră Đại học Tây Nguyên lăi pơthâo:

“Anai lĕ tal blung a kâo dưi gum hrŏm jơlan hơdră bơkơtuai hăng gơyut gơyâo jar kơmar tui anai. Drơi pô kâo ƀu khin hơtai ôh samơ̆ lơm gum hrŏm kâo ƀuh ƀing gơyut India juăt biă, hmač dong. Hmâo tơhnal gum hrŏm hơdôm jơlan hơdră mut hrŏm jar kơmar tui anai kâo ƀuh yôm phăn biă yua kơ kâo amra tŭ mă bôh pơhiăp dêh čar arăng, phing kơ pran ƀơi anăp lu mơnuih hloh, tô nao rai bơkơtuai hăng lu gơyut, hmâo lu tơlơi rô nao rai phrâo”.

Tal anai, Khul hlăk ai tơring čar Dak Lak hmâo lăi pơthâo pơjing Khul čơđai gưl dlông 5 klă gưl tơring čar, bơni “Čơđai sang hră 3 klă”, “Čơđai gưl dlông 5 klă” hơdôm gưl thun hrăm 2023-2024, ƀơk prăk djru hrăm hră “Ngă bơngač tơlơi čang rơmang – Hlăk ai Dak Lak”, ƀơk prăk djru hrăm hră kơ čơđai gưl dlông dêh čar Lao glăk dô̆ hrăm ƀơi hơdôm bôh sang hră gah tơring čar Dak Lak. Amai Phan Thị Trinh, Kơ-iăng Khua git gai Khul hlăk ai tơring čar Dak Lak brơi thâo, hơdôm bruă mă kiăng pơjing anih anom ngui ngor tŭ yua kơ čơđai sang hră, čơđai gưl dlông, rŭ đĭ pran jua gum hrŏm hơbit, thâo gơgrong mơ̆ng rơnuk hlăk ai.

“Sa anih ngui ngor kơ ƀing čơđai gum hrŏm, bơkơtuai pơhrăm nao rai tơdruă, pơhrăm mut hrŏm jar kơmar hăng ƀing gơyut čơđai gưl dlông India hăng Lao. Grŭp apăn bruă Khul hlăk ai tơring čar ăt hmâo laih hơdôm tơlơi kiăng lăi nao pioh gum hrŏm ƀing čơđai sang hră 3 klă, čơđai gưl dlông 5 klă, čơđai sang hră 3 pơhrăm, nao hrŏm hăng hơdôm tơhnal ba tơbiă pioh ƀing čơđai dưi hăng bruă gum hrŏm hăng khul hlăk ai, khul pơ̆ anăp anai”.

Hlâo kơ anun, Khul hlăk ai tơring čar Dak Lak, Khul pơlir hơbit Hlăk ai Việt Nam tơring čar hăng Khul čơđai gưl dlông Việt Nam tơring čar ăt hmâo gum hrŏm pơphun laih Jơlan hơdră “Bưp ƀô̆ mơta hăng bơni čơđai gưl dlông djuai ania ƀiă thâo rơgơi” tơring čar Dak Lak tal 16.

Amăng hơdôm thun rơgao, hơdôm hơdră bruă pơđĭ kyar bơwih ƀong, bôh thâo đưm ƀơi hơdôm anih anom kual ataih, asuek, kual neh wa djuai ania ƀiă tơring čar Dak Lak hmâo laih lu bôh tơhnal klă. Hrŏm hăng hlăk ai đơ đam dêh čar, hlăk ai djop djuai ania Dak Lak pơtŏng sit dong bruă mă, ƀu pơdơi hrăm tui, pơhrăm pô, hrưn đĭ amăng tơlơi hơdip mơda. Jai hrơi jai lu hlăk ai djuai ania ƀiă hmâo bôh thâo hăng bôh thâo hrăm hră dlông, tŭ mă bôh thâo phrâo, pơhrăm bôh thâo tơlơi hơdip mơda, bôh thâo bruă mă mơnuih mơnam pioh djru Lŏn ia, pơdŏng plơi pla.

Amăng jơlan hơdră, čơđai gưl dlông hmâo gum hrŏm laih lu bruă mă kah hăng: Tui apui ñang ƀơi Hnal čih anăn hơdor glăi ƀing tơhan pơsăn drơi Nam Tiến hăng dưm guang bơnga ƀơi Gong kut Wa Hồ; bruă “Hơduah ĕp lăng bôh thâo đưm”, Bơkơtuai “Črông lô kơ gru grua čơđai gưl dlông Dak Lak amăng bruă mut hrŏm hăng pơđĭ kyar”, lăi pơthâo “Tô nao rai čơđai gưl dlông hăng mơnuih bơwih ƀong, anom bơwih ƀong”. Mơ̆ng anun djru čơđai gưl dlông thâo dơlăm hloh kơ nua bôh thâo đưm hăng gru grua mơ̆ng plơi pla; khin hơtai lăi pơthâo nao rai, gum pơhiăp kơ lu bruă mă bôh thâo đưm, mơnuih mơnam, djru hrŏm pơđĭ kyar mơ̆ng tơring čar. Čơđai gưl dlông H’ Uyên Byă, hrăm ƀơi Sang hră Sư phạm ƀôn prong Hồ Chí Minh lăi pơthâo:

“Hơdôm bruă mă hrơi anai djru kâo thâo kơ djop mơnuih lu hloh, djru kâo thâo hluh dong anô̆ yôm bôh thâo đưm ƀơi anih pô tơkeng rai. Tơlơi anun jai ngă kâo hor pơwot glăi plơi pla hăng pơđĭ kyar drơi pô hloh pioh djru plơi pla pô pơđĭ kyar hăng hrơi anai kâo ăt mơ-ak mơn yua kơ kâo lĕ sa amăng ƀing čơđai gưl dlông djuai ania ƀiă dưi ruah”.

Tal anai, Khul čơđai gưl dlông Việt Nam tơring čar Dak Lak hmâo bơni 50 čô čơđai gưl dlông djuai ania ƀiă hrăm rơgơi amăng thun hrăm 2023-2024. Pơphun lăi pơthâo Grŭp gru grua čơđai gưl dlông Dak Lak. Grŭp dưi pơjing pioh pơjing anih anom ngui ngor tŭ yua, djru ƀing hlăk ai hmâo tơhnal hơduah ĕp, krăp lăng hăng rơnăk pioh hơdôm anô̆ yôm bôh thâo đưm mơ̆ng djuai ania pô./.