Tlam lơ 27/2, ƀơi sang bruă Ding jum ling tơhan či Hà Nội, Thượng tướng, ơi Hoàng Xuân Chiến, ding kơna apăn bruă ping gah dêh čar, Kơ-iăng Khua ding jum ling tơhan, Khua khul git gai phun mơ̆ng dêh čar pơsir tơlơi truh sat mơ̆ng boh ƀôm mĭn hăng ia jrao sat dŏ glăi tơdơi kơ pơđut rơnuk blah ngă ƀơi Việt Nam iâu klah čun (Khul git gai 701) hơmâo mă bruă hăng khua anih jưh pơ ala dêh čar Mi ƀơi Việt Nam, ơi Marc E.Knapper kơ bruă ngă hrom pơsir tơlơi sat răm yua kơ boh ƀôm mĭn ƀơi Việt Nam.

Lăi pơtong, tơlơi kiăng mơ̆ng Việt Nam, amăng bruă ngă hrom pơsir tơlơi sat răm mơ̆ng ƀôm mĭn, boh pơtuh dŏ glăi ƀơi Việt Nam tơdơi kơ rơnuk blah ngă hăng Mi, Thượng tướng ơi Hoàng Xuân Chiến đăo kơnang pơ anăp anai, tơlơi ngă hrom anai ăt pơtrut ngă kjăp tui, pơđĭ kyar hloh; laih dơ̆ng čang rơmang dêh čar Mi pioh lu tơlơi djru ba sui thun kơ Việt Nam, djru Việt Nam pơsir hĭ tơlơi răm ƀăm sat mơ̆ng boh ƀôm, mĭn ngă rơnuk blah ngă đưm dŏ đôm glăi, pơsir hĭ, ngă rơgoh kual lŏn djơ̆ ia jrao tơluč, kiăng pơgang ba tơlơi hơdip mơda mơnuih ƀôn sang. Thượng tướng ơi Hoàng Xuân Chiến lăi, Việt Nam ăt ngă gêh găl gum hrom tong ten hăng hơdôm bơnah gah dêh čar Mi pioh ngă hrom dua bơnah ba glăi boh tŭ yua hloh hăng djơ̆ tơhnal pơtrun.