Dua čô khua lêng kơ pơsit  tong hơmâo mông jơnum bơkơtuai hiam klă, tŭ ư amăng hơdôm boh tơhnal ngă hrŏm yôm phăn, hrưn đĭ amăng tơlơi rô nao rai ngă hrŏm dua bơnah. Khua mir sir ơi Nguyễn Xuân Phúc brơi thâo, rơnoh sĭ mơdrô dua bơnah lĕ 11 klai 500 klăk đôlar Mi amăng 2021, anai lĕ mrô dưi ngă tañ ƀiă 2 thun hăng thun anai truh pơ 13 klai đôlar Mi, dua bơnah tŭ ư tañ pơtrut sĭ mơdrô dua bơnah đĭ truh 15 klai đôlar Mi.

Thun pơ anăp anai, dua boh dêh čar amra hơdor glăi 10 thun ngă hrŏm djop mơta, pok rai rơnuk phrâo amăng ngă hrŏm dua bơnah. Khua mir sir Indonesia ơi Joko Widodo rơkâo Việt Nam ngă gêh gal brơi gơnam Indonesia ba sĭ mơdrô pơ Việt Nam, sit biă ñu gơnam đang hmua. Hrŏm hăng pơtrut bơwih brơi tuai čuă ngui, laih dong pơtrut hơdôm anom bruă rơdêh por dua bơnah pơgiong hơdôm akŏ bruă pok glông por phrâo kơplah wah Đà Nẵng hăng Java hăng hơmâo lu dong glông por kơplah wah ƀôn prong Hồ Chí Minh hăng Jakarta. Kiăo tui dong, Khua mir sir ơi Joko Widodo git gai mông ƀong huă hrŏm gưl Kơnuk kơna hăng Khua mir sir ơi Nguyễn Xuân Phúc.