Samơ̆ mơnuih arăng đăo kơnang lĕ pơgôp pran prong biă mă amăng bruă pơđĭ kyar bơwih ƀong huă-mơnuih mơnam, pơgang hơđong rơnuk rơnua ƀơi tơring čar. Amăng anun, hơmâo yă H’Bliăk Niê-đah kơmơi hmư̆ hing ƀơi ƀuôn Kram, să Ea Tiêu, tơring glông Čư̆ Kuin.

Sa čô mơnuih hur har, abih pran jua mă bruă djru ba mơnuih pơkŏn tơnap tap anun lĕ tơlơi bơ ră ruai mơ̆ng lu mơnuih ƀơi ƀuôn Kram,  să Ea Tiêu, tơring glông Čư̆ Kuin, Dak Lak sit lăi nao kơ neh H’Bliăk Niê, juăt iâu amĭ Bơ̆ng. Kơ-iăng khua hơđăp tơring glông Čư̆ Kuin, laih glăi pơdơi abih thun bruă, yă H’Bliăk Niê dưi hơmâo mơnuih ƀôn sang đăo kơnang biă mă, ruah ñu yơh jing mơnuih hơmâo kơnuih hiam hmư̆ hing amăng ƀuôn Kram. Ñu hur har ngă hrom bruă pơsir kơđi amăng plơi pla, djru ngă kjăp tui tơlơi gum pơgôp djuai ania plơi pla. Yă H'Bliăk Niê lăi:

“Kâo juăt hyu hrom ƀing khua plơi jak iâu ană plơi pla brơi triăng mă bruă bơwih ƀong huă đôč. Thâo hơdră wai lăng phun kơsu, kơphê, čem rông rơmô, un bui kah mơ̆ng hơmâo prăk pơhrui glăi, čem rông ană bă hrăm hră thâo truh anih. Tui anun, kah mơ̆ng hơmâo tơlơi hơdip mơda kơñ pơgi hiam klă hloh. Dua dơ̆ng lĕ kâo djru pran jua hrom amăng să, plơi pla pơtă pơtăn kơ mơnuih ƀôn sang djă pioh gru grua hiam djuai ania pô kah hăng atông čing, tơlơi ngui ngor ngă yang mơak mơ̆ng mơnuih ƀôn sang ta kiăng rŭ glăi pioh kơ ană tơčô thâo krăn kơ gru grua hiam mơ̆ng djuai ania pô”.

Truh ră anai, să Ea Tiêu dưi ngă djơ̆ tơhnal pơkă plơi pla phrâo. Rơnoh prăk pơhrui glăi pơkă sa čô mơnuih mă bruă sa thun truh 45 klăk prăk. Jơlan glông nao rai tuh pơ alin čuk pơkra hiam, jơlan glông amăng plơi pla, pơkra kjăp hăng simăng. Đơ đam să hơmâo 14 boh sang jơnum ƀut, 7 boh sang jơnum plơi. Dưi hơmâo boh tơhnal anai, hrom hăng djop gưl gong gai kơnuk kơna, khul grup mơ̆ng tơring glông truh pơ să lêng kơ hơmâo tơlơi djru hrom mơ̆ng yă H’Bliăk Niê soh, yua ñu ngă klă bruă hyu pơtô lăi kiăng mơnuih ƀôn sang thâo hluh bruă ngă, anŏ kiăng, boh yôm mơ̆ng bruă man pơdong plơi pla phrâo.

Khă tui anun, tơlơi mơ̆ yă H’Bliăk Niê dŏ pơmin, dŏ ƀlơ̆ng lĕ gru ama grua amĭ đưm ră anai hlăk či rơngiă tui.

“Kâo ƀuh lu tơlơi tơnap lĕ tơlơi hơdip phrâo ră anai, phara hăng hlâo adih, ră anai tơlơi hơdip kơtang kơ mơnong mơnuă pơđĭ kyar hloh, samơ̆ lu mơnuih wor rơbit hĭ yơh gru grua đưm ơi yă amĭ ama pioh glăi. Rơngiao kơ tơlơi gir run mă bruă kiăng kjăp, ăt dŏ mơ̆n ƀiă mơnuih kơnong tơguan kơnuk kơna djru. Kâo gir run jak iâu pioh kơ mơnuih ƀôn sang ta triăng ƀiă mă bruă, huăi ĭn glăi kơ pô pơkŏn djru ba”.

Jing mơnuih thâo hluh tơlơi phiăn kơnuk kơna, thâo lu găn rơgao amăng bruă mă mơnuih mơnam, lơ̆m abih thun bruă glăi hăng ană plơi pla, yă H’Bliăk Niê pơtô lăi na nao mơnuih ƀôn sang brơi ngă tui djơ̆ tơlơi phiăn kơnuk kơna, jơlan hơdră mơ̆ng Ping gah. Ñu pơtô lăi anăm hmư̆ ôh tơlơi ƀing soh sat pơčut plư pleč, hơdui ba ngă sat, khom thâo gum pơgôp khăp pap djru nao rai tơdruă kiăng lui rơmŏn kŏn rin.

“Kâo čang rơmang plơi pla ta hơmâo anŏ pơđĭ kyar, pơklaih mơ̆ng ư̆ rơpa, hrưn đĭ ngă pơdrong kơ tơlơi hơdip mơda, ană bă hrăm hră pơar truh kih. Jak iâu mơnuih ƀôn sang anăm hmư̆ ôh tơlơi ƀing soh sat pơkơdong glăi hăng kơnuk kơna, ping gah, khom hơdip mơda mă bruă djơ̆ hăng tơlơi phiăn. Amăng plơi pla khom triăng, gir run na nao, gum pơgôp hrom hơbit man pơdong plơi pla pơdrong asah hiam rô̆ hloh”.

Ơi Hà Huy Quang, Kơ-iăng khua anom bruă djuai ania tơring čar Dak Lak lăi, ƀing đah kơmơi arăng đăo kơnang hơmâo djru prong pran man pơdong plơi pla, pơtrut bơwih ƀong huă mơnuih mơnam amăng plơi pla djuai ƀiă. Boh pơhiăp, tơlơi pơtô mơ̆ng mơnuih arăng  đăo kơnang hơmâo rơnoh biă mă, pioh kơ mơnuih ƀôn sang pơkŏn đăo kơnang, hmư̆ tui pơphun hăng ngă tui djop bruă pơtrun brơi mơnuih ƀôn sang amăng plơi pla ngă kah hăng pơđĭ kyar bơwih ƀong huă mơnuih mơnam amăng kual mơnuih ƀôn sang djuai ƀiă, kiăng jai hrơi hơmâo tơlơi hơdip klă hloh, tŭ yua hloh.

“Ră anai khul mơnuih arăng đăo kơnang jing đah kơmơi amăng kual plơi pla mơnuih djuai ƀiă amăng tơring čar ƀiă đôč, samơ̆ hăng ƀing mă bruă amăng plơi pla djuai ania ƀiă kual Dap Kơdư hơdip mă kơnung djuai gah amĭ, tơlơi pơhiăp, anih dŏ, tơlơi glăm ba mơ̆ng ƀing đah kơmơi arăng đăo kơnang lĕ yôm biă mă, biă mă ñu amăng bruă pơtô lăi ană bă, kơnung djuai phung wang, sang anŏ, djă pioh hăng pơgang ba gru ama grua amĭ djuai ania pô.

 Laih anun bruă akŏ pơdong hăng pơđĭ kyar bơwih ƀong huă mơnuih mơnam, akŏ pơdong bruă mă tơlơi hơdip mơda, tơlơi pơhiăp, boh hră djuai ania ƀiă dưi djă pioh”.

Hăng tơlơi pơgôp prong pran amăng plơi pla, yă H’Bliăk Niê hing ang dưi hơmâo Anom bruă Djuai ania tơring čar Dak Lak apah bơni hră pơpŭ kơ mơnuih arăng đăo kơnang yua hơmâo bruă mă boh tơhnal pơtô lăi, jak iâu mơnuih ƀôn sang amăng kual mơnuih ƀôn sang djuai ƀiă ngă hrom tŭ yua bơwih ƀong huă mơnuih mơnam, pơgang tơlơi rơnuk rơnua, djă pioh gru grua hăng gum pơgôp djuai ania.